റിയാദ്: സൗദി അറേബ്യ, പാകിസ്ഥാൻ, തുർക്കിയ എന്നീ രാജ്യങ്ങളിലെ പ്രതിരോധ സേനാ മേധാവികൾ റിയാദിൽ കൂടിക്കാഴ്ച നടത്തി. കൂട്ടായ പ്രതിരോധത്തിനുള്ള പ്രതിബദ്ധത ആവർത്തിച്ച സേനാ മേധാവികൾ, മക്ക സംയുക്ത പ്രതിരോധ കരാർ ഉടൻ നടപ്പാക്കുന്നതിനുള്ള നടപടികൾ ശക്തമാക്കാനും തീരുമാനിച്ചു.
സൗദി അറേബ്യ നേരിടുന്ന സുരക്ഷാ സാഹചര്യങ്ങളും ഭീഷണികളും യോഗത്തിൽ വിലയിരുത്തി. മക്കയെയും സൗദിയിലെ സിവിലിയൻ, സാമ്പത്തിക അടിസ്ഥാന സൗകര്യങ്ങളെയും ലക്ഷ്യമിട്ടുള്ള ആക്രമണങ്ങളെ സേനാ മേധാവികൾ ശക്തമായി അപലപിച്ചു.
പൗരന്മാരുടെയും താമസക്കാരുടെയും സുരക്ഷ ഉറപ്പാക്കുന്നതിലും രാജ്യത്തിന്റെ സുരക്ഷ സംരക്ഷിക്കുന്നതിലും സൗദി സായുധ സേന പുലർത്തുന്ന ജാഗ്രതയെയും പ്രൊഫഷണലിസത്തെയും അവർ പ്രശംസിച്ചു.
മൂന്ന് രാജ്യങ്ങളുടെയും സായുധ സേനകൾ തമ്മിലുള്ള സഹകരണം കൂടുതൽ ശക്തിപ്പെടുത്തുന്നതിന്റെ ഭാഗമായി രഹസ്യാന്വേഷണ വിവര കൈമാറ്റം, സൈനിക ഏകോപനം, പ്രതിരോധ ശേഷികളുടെ സംയോജനം തുടങ്ങിയ വിഷയങ്ങളും ചർച്ച ചെയ്തു.
സൗദി, പാകിസ്ഥാൻ, തുർക്കിയ ജനതകളും സായുധ സേനകളും തമ്മിലുള്ള ദീർഘകാല ബന്ധവും പരസ്പര വിശ്വാസവും യോഗം എടുത്തുപറഞ്ഞു.
മക്ക സംയുക്ത പ്രതിരോധ കരാറിലെ പ്രതിബദ്ധതകൾ ഫലപ്രദമായ സൈനിക സഹകരണമായി ഉടൻ മാറ്റാനുള്ള മൂന്ന് രാജ്യങ്ങളുടെയും ഉറച്ച തീരുമാനമാണ് റിയാദ് യോഗം വ്യക്തമാക്കുന്നതെന്ന് സേനാ മേധാവികൾ പറഞ്ഞു.
സൗദി അറേബ്യയുടെ സുരക്ഷ, പരമാധികാരം, ഭൂപ്രദേശിക അഖണ്ഡത എന്നിവ സംരക്ഷിക്കുന്നതിനുള്ള കൂട്ടായ പ്രതിരോധ പ്രതിബദ്ധതയും മൂന്ന് രാജ്യങ്ങളും ശക്തമായി ആവർത്തിച്ചു.
About the Author
