അൽ-ഖഫ്ജിയിൽ വൻ വികസന പദ്ധതി; 16,000ത്തിലേറെ വീടുകളും 1,400 ഹോട്ടൽ മുറികളും ഒരുങ്ങും
റിയാദ്: സൗദി അറേബ്യയിലെ കിഴക്കൻ പ്രവിശ്യയിലെ അൽ-ഖഫ്ജിയിൽ 20 ചതുരശ്ര കിലോമീറ്റർ വിസ്തൃതിയിലുള്ള പുതിയ റെസിഡൻഷ്യൽ, ടൂറിസം കേന്ദ്രം വികസിപ്പിക്കുന്നതിനായി ഗൾഫ് കോസ്റ്റ് ഡെവലപ്മെന്റ് കമ്പനി ആരംഭിച്ചതായി പബ്ലിക് ഇൻവെസ്റ്റ്മെന്റ് ഫണ്ട് (PIF) അറിയിച്ചു.
അറേബ്യൻ ഗൾഫ് തീരത്ത് 10 കിലോമീറ്റർ നീളത്തിൽ വ്യാപിക്കുന്ന പദ്ധതിയിൽ 16,000ത്തിലേറെ താമസ യൂണിറ്റുകളും ഏകദേശം 1,400 ഹോട്ടൽ മുറികളും ഉൾപ്പെടും. സ്വകാര്യ മേഖലയുമായും പ്രാദേശിക, ഗൾഫ് മേഖലയിലെ നിക്ഷേപകരുമായും സഹകരിച്ചായിരിക്കും പദ്ധതി നടപ്പാക്കുക.
വടക്കൻ കിഴക്കൻ പ്രവിശ്യയിൽ താമസ, ടൂറിസം സൗകര്യങ്ങൾക്കുള്ള വർധിച്ചുവരുന്ന ആവശ്യം നിറവേറ്റുന്നതിനും സൗദി, കുവൈത്ത്, മറ്റ് ഗൾഫ് രാജ്യങ്ങളിൽ നിന്നുള്ള താമസക്കാരെയും സന്ദർശകരെയും ആകർഷിക്കുന്നതിനുമാണ് പദ്ധതി ലക്ഷ്യമിടുന്നത്.
പൂർത്തിയാകുമ്പോൾ എട്ട് റെസിഡൻഷ്യൽ മേഖലകൾ, 16,000ത്തിലേറെ താമസ യൂണിറ്റുകൾ, ഏകദേശം 1,400 ഹോട്ടൽ മുറികൾ, വാണിജ്യ-ടൂറിസം സൗകര്യങ്ങൾ, വിദ്യാഭ്യാസ സ്ഥാപനങ്ങൾ, ബോട്ടുകൾക്കായുള്ള പ്രത്യേക മറീനകൾ എന്നിവ പദ്ധതിയുടെ ഭാഗമാകും.
പദ്ധതി മൂന്ന് ഘട്ടങ്ങളിലായാണ് വികസിപ്പിക്കുക. ആദ്യഘട്ടം 2030ൽ പൂർത്തിയാക്കാനാണ് ലക്ഷ്യമിടുന്നത്. ഇതിൽ മൂന്ന് റെസിഡൻഷ്യൽ മേഖലകൾ വികസിപ്പിച്ച് സമഗ്രമായ താമസ-ടൂറിസം കേന്ദ്രത്തിനുള്ള അടിസ്ഥാന സൗകര്യങ്ങൾ ഒരുക്കും.
അൽ-ഖഫ്ജിയുടെ സാംസ്കാരികവും ഗതാഗതപരവുമായ പ്രത്യേകതകൾ പ്രയോജനപ്പെടുത്തി പ്രദേശവാസികൾക്ക് പുതിയ അവസരങ്ങൾ സൃഷ്ടിക്കുകയും അടിസ്ഥാന സൗകര്യങ്ങൾ മെച്ചപ്പെടുത്തുകയും സ്വകാര്യ മേഖലയുമായുള്ള പങ്കാളിത്തം ശക്തിപ്പെടുത്തുകയും ചെയ്യുമെന്ന് PIF-ലെ ലോക്കൽ റിയൽ എസ്റ്റേറ്റ് ഇൻവെസ്റ്റ്മെന്റ്സ് മേധാവി സഅദ് അൽക്രൂദ് പറഞ്ഞു.
PIF-ന്റെ 2026–2030 തന്ത്രത്തിലെ ആറ് പ്രധാന മേഖലകളിൽ ഒന്നായ നഗരവികസനവും ജീവിതനിലവാരവും എന്ന മേഖലയിലാണ് പദ്ധതി ഉൾപ്പെടുന്നത്. ജീവിതനിലവാരം ഉയർത്തുകയും നഗര നവീകരണത്തിന് പിന്തുണ നൽകുകയും സുസ്ഥിരവും ജനകേന്ദ്രിതവുമായ നഗരങ്ങൾ വികസിപ്പിക്കുകയും ചെയ്യുന്ന റിയൽ എസ്റ്റേറ്റ് പദ്ധതികളിൽ നിക്ഷേപം നടത്തുകയാണ് ഈ മേഖലയിലൂടെ PIF ലക്ഷ്യമിടുന്നത്.
നഗരവികസന മേഖലയിലെ നിക്ഷേപങ്ങളിലൂടെ സമ്പദ്വ്യവസ്ഥ വൈവിധ്യവത്കരിക്കുക, പുതിയ അവസരങ്ങൾ സൃഷ്ടിക്കുക, വ്യാപാര-നിക്ഷേപ പ്രവർത്തനങ്ങൾ വിപുലീകരിക്കുക, ദേശീയ സമ്പദ്വ്യവസ്ഥയിൽ സൗദി നഗരങ്ങളുടെ സംഭാവന വർധിപ്പിക്കുക എന്നിവയാണ് PIF ലക്ഷ്യമിടുന്നത്.
About the Author
