റിയാദിൽ പുതിയ വിനോദകേന്ദ്രമായി ഷുഐബ് ഉം ഖസ്ർ

റിയാദ്: തലസ്ഥാന നഗരിയുടെ പടിഞ്ഞാറൻ മേഖലയിൽ സ്ഥിതിചെയ്യുന്ന ‘ഷുഐബ് ഉം ഖസ്ർ’ പ്രകൃതിസൗന്ദര്യവും ആധുനിക വിനോദസൗകര്യങ്ങളും സമന്വയിപ്പിക്കുന്ന ശ്രദ്ധേയമായ പരിസ്ഥിതി കേന്ദ്രമായി മാറുന്നു. നഗരവികസനത്തിനൊപ്പം പരിസ്ഥിതി സംരക്ഷണത്തിനും പ്രാധാന്യം നൽകുന്ന റിയാദിന്റെ വികസനപദ്ധതികളുടെ മികച്ച മാതൃകയായാണ് പ്രദേശം ശ്രദ്ധനേടുന്നത്.

അൽ ഉറൈജ അൽ വുസ്‌ത ജനവാസമേഖലയിൽ സ്ഥിതിചെയ്യുന്ന ഷുഐബ് ഉം ഖസ്ർ, വാദി ഹനീഫ താഴ്‌വരയുടെ പ്രധാന സ്വാഭാവിക പോഷകനദീതടങ്ങളിലൊന്നാണ്. സൗദി സർക്കാരിന്റെ ‘ഗ്രീൻ റിയാദ്’ പദ്ധതിയുടെ ഭാഗമായി പ്രദേശത്തിന്റെ പുനരുദ്ധാരണവും പുനരധിവാസവും പൂർത്തിയാക്കിയിട്ടുണ്ട്.

നടത്തം, ജോഗിങ്, സൈക്ലിങ് എന്നിവയ്ക്കായി പ്രത്യേക പാതകൾ ഇവിടെ ഒരുക്കിയിട്ടുണ്ട്. ആധുനിക രീതിയിൽ രൂപകൽപ്പന ചെയ്ത സ്പോർട്സ് പാലമാണ് പ്രധാന ആകർഷണങ്ങളിലൊന്ന്. താഴ്‌വരയുടെ മനോഹരമായ പനോരമിക് കാഴ്ചകൾ ആസ്വദിക്കാനും രാത്രിയിലെ ദീപാലങ്കാരങ്ങൾ കാണാനും നിരവധി പേർ ഇവിടെ എത്തുന്നു.

പ്രാദേശിക കാലാവസ്ഥയ്ക്ക് അനുയോജ്യമായ മരങ്ങളും സസ്യങ്ങളും നട്ടുപിടിപ്പിച്ചതിനൊപ്പം ജലാശയങ്ങളും വെള്ളച്ചാട്ടങ്ങളും പ്രദേശത്തിന്റെ പ്രകൃതിഭംഗി വർധിപ്പിക്കുന്നു. വിശ്രമകേന്ദ്രങ്ങൾ, ശുചിമുറികൾ തുടങ്ങിയ അടിസ്ഥാന സൗകര്യങ്ങളും സന്ദർശകർക്കായി ഒരുക്കിയിട്ടുണ്ട്.

പ്രകൃതിയോടിണങ്ങി സമയം ചെലവഴിക്കാനും കായിക-വിനോദ പ്രവർത്തനങ്ങളിൽ ഏർപ്പെടാനും കഴിയുന്ന ഇടമായി ഷുഐബ് ഉം ഖസ്ർ മാറിയിരിക്കുകയാണ്. പരിസ്ഥിതി സംരക്ഷണവും നഗരവികസനവും ഒരുമിച്ച് മുന്നോട്ട് കൊണ്ടുപോകുന്ന റിയാദിന്റെ പദ്ധതികളുടെ ശ്രദ്ധേയമായ ഉദാഹരണമായാണ് ഈ കേന്ദ്രം വിലയിരുത്തപ്പെടുന്നത്.