സൗദി അറേബ്യയിലെ തൊഴിൽ നിയമത്തിൽ (Saudi Labor Law) ജീവനക്കാരുടെ ജോലി സമയം, റമദാൻ മാസത്തെ പ്രത്യേക സമയം, വിശ്രമ വേളകൾ, ചില പ്രത്യേക മേഖലകൾക്കുള്ള ഇളവുകൾ എന്നിവ വ്യക്തമായി നിർവ്വചിച്ചിട്ടുണ്ട്. നിയമത്തിലെ പ്രധാന വകുപ്പുകൾ (Articles) താഴെ നൽകുന്നു:
ജോലി സമയം (Article 98)
സൗദി തൊഴിൽ നിയമപ്രകാരം ഒരു ജീവനക്കാരനും പ്രതിദിനം 8 മണിക്കൂറിൽ കൂടുതലോ അല്ലെങ്കിൽ ആഴ്ചയിൽ 48 മണിക്കൂറിൽ കൂടുതലോ ജോലി ചെയ്യാൻ പാടില്ല. എന്നാൽ റമദാൻ മാസത്തിൽ മുസ്ലിം ജീവനക്കാർക്ക് ജോലി സമയം പ്രതിദിനം 6 മണിക്കൂറും ആഴ്ചയിൽ 36 മണിക്കൂറുമായി ചുരുക്കിയിട്ടുണ്ട്.
ജോലി സമയത്തിലെ വ്യത്യാസങ്ങൾ (Article 99 & 100)
തൊഴിലിന്റെ സ്വഭാവമനുസരിച്ച് ജോലി സമയത്തിൽ മാറ്റം വരുത്താൻ നിയമം അനുവാദം നൽകുന്നുണ്ട്. തുടർച്ചയായി ജോലി ആവശ്യമില്ലാത്ത ചില പ്രത്യേക മേഖലകളിൽ ജോലി സമയം ദിവസേന 9 മണിക്കൂർ വരെ ഉയർത്താം. അതേസമയം അപകടകരമോ ആരോഗ്യത്തിന് ഹാനികരമോ ആയ ജോലികളിൽ ഇത് 7 മണിക്കൂറായി കുറയ്ക്കണം. ഷിഫ്റ്റ് അടിസ്ഥാനത്തിൽ പ്രവർത്തിക്കുന്ന സ്ഥാപനങ്ങൾക്ക് മൂന്ന് ആഴ്ചത്തെ ശരാശരി കണക്കാക്കി മന്ത്രാലയത്തിന്റെ മുൻകൂട്ടി അനുമതിയോടെ പ്രതിദിന സമയത്തിൽ മാറ്റം വരുത്താവുന്നതാണ്.
വിശ്രമ വേളകൾ (Article 101 & 102)
തുടർച്ചയായി 5 മണിക്കൂറിൽ കൂടുതൽ സമയം ജീവനക്കാരെ കൊണ്ട് ജോലി ചെയ്യിപ്പിക്കാൻ പാടില്ല. നമസ്കാരം, ഭക്ഷണം, വിശ്രമം എന്നിവയ്ക്കായി കുറഞ്ഞത് 30 മിനിറ്റ് ഇടവേള നൽകിയിരിക്കണം. ഈ വിശ്രമ സമയം ജോലി സമയമായി കണക്കാക്കില്ല. കൂടാതെ, വിശ്രമ വേളകളിൽ ജീവനക്കാരെ തൊഴിൽ സ്ഥലത്ത് തന്നെ തുടരാൻ തൊഴിലുടമ നിർബന്ധിക്കരുത്. വിശ്രമ സമയവും ജോലി സമയവും ഉൾപ്പെടെ ഒരു ജീവനക്കാരന്റെ ഒരു ദിവസത്തെ ആകെ സമയം 12 മണിക്കൂറിൽ കൂടരുത്.
പ്രത്യേക സാഹചര്യങ്ങളിലെ ഇളവുകൾ (Article 106)
വാർഷിക ഇൻവെന്ററി പൂർത്തിയാക്കൽ, ബജറ്റ് തയ്യാറാക്കൽ, വർഷാന്ത്യ കണക്കെടുപ്പ്, ഈദ്/സീസണൽ ഓഫറുകൾ, പെട്ടെന്നുണ്ടാകുന്ന അപകടങ്ങൾ തടയൽ, അല്ലെങ്കിൽ സ്ഥാപനത്തിലെ അടിയന്തര ജോലിഭാരം എന്നിവയുള്ള സന്ദർഭങ്ങളിൽ ദിനംപ്രതിയുള്ള 8 മണിക്കൂർ നിയമത്തിൽ ഇളവ് ലഭിക്കും. എന്നാൽ ഇത്തരം അടിയന്തര സാഹചര്യങ്ങളിൽ പോലും ദിവസേനയുള്ള ജോലി സമയം 10 മണിക്കൂറിലും ആഴ്ചയിൽ 60 മണിക്കൂറിലും കൂടാൻ പാടില്ല. ഒരു വർഷത്തിൽ പരമാവധി 30 ദിവസത്തേക്ക് മാത്രമേ ഈ ഇളവ് ഉപയോഗപ്പെടുത്താൻ സാധിക്കൂ.
നിയമത്തിൽ നിന്ന് ഒഴിവാക്കപ്പെട്ടവർ (Article 108)
ഉന്നത നിർവാഹക പദവികളിലുള്ള മാനേജർമാർ, അറ്റകുറ്റപ്പണികളോ തൊഴിലിന് മുൻപോ ശേഷമോ ഉള്ള ജോലികൾ ചെയ്യുന്നവർ, സുരക്ഷാ ജീവനക്കാർ (സിവിൽ സെക്യൂരിറ്റി ഗാർഡുകൾ ഒഴികെ), ജാനിറ്റർമാർ എന്നിവരെ സാധാരണ ജോലി സമയ പരിധി വ്യക്തമാക്കുന്ന വകുപ്പുകളിൽ (98 മുതൽ 101 വരെ) നിന്ന് ഒഴിവാക്കിയിട്ടുണ്ട്.
About the Author
