റിയാദ്: കോൺട്രാക്ടർമാർക്കോ വിതരണക്കാർക്കോ (Suppliers) നൽകാനുള്ള സാമ്പത്തിക കുടിശ്ശികകൾ തീർപ്പാക്കാത്ത സർക്കാർ ഏജൻസികൾക്ക് പുതിയ കരാറുകളും ടെൻഡറുകളും (Award decisions) നൽകുന്നതിന് സർക്കാർ സംഭരണ-മത്സര നിയന്ത്രണ നിയമം (Government Tenders and Procurement Law) വിലക്കേർപ്പെടുത്തി. കരാറുകാരുടെ കുടിശ്ശിക വിതരണം ചെയ്യുന്നതിൽ വീഴ്ച വരുത്തുകയോ തടസ്സങ്ങൾ പരിഹരിക്കാൻ നടപടി സ്വീകരിക്കാതിരിക്കുകയോ ചെയ്യുന്ന ഏജൻസികൾക്ക് ധനമന്ത്രാലയം ഔദ്യോഗിക മുന്നറിയിപ്പ് നൽകും. ഇത് അവഗണിച്ചാൽ പുതിയ പദ്ധതികളുടെ കരാർ നൽകുന്നതിൽ നിന്ന് വിലക്ക് നേരിടേണ്ടിവരും.
സർക്കാർ കരാറുകളിൽ പ്രവർത്തിക്കുന്ന സ്വകാര്യ കമ്പനികളുടെയും കരാറുകാരുടെയും അവകാശങ്ങൾ സംരക്ഷിക്കാനും സാമ്പത്തിക സുതാര്യത ഉറപ്പാക്കാനും ലക്ഷ്യമിട്ടാണ് ഈ ഘടനാപരമായ മാറ്റം. കുടിശ്ശിക തീർപ്പാക്കാതെ പുതിയ പദ്ധതികളിലേക്ക് കടക്കുന്നത് തടയുന്നതിലൂടെ സ്വകാര്യ മേഖലയ്ക്ക് സർക്കാർ കരാറുകളിലുള്ള വിശ്വാസ്യത വർദ്ധിക്കുമെന്ന് പ്രമുഖ അഭിഭാഷകൻ സൽമാൻ അൽ റുമാലി വ്യക്തമാക്കി. അതേസമയം ധനമന്ത്രാലയത്തിന്റെ ഭാഗത്തുനിന്നുള്ള നടപടിക്രമങ്ങൾ കാരണമുള്ള താമസം, അല്ലെങ്കിൽ മതിയായ ബജറ്റ് വിഹിതമില്ലാത്തതുമൂലമുള്ള കുടിശ്ശികകൾ എന്നിവയ്ക്ക് ഈ വിലക്ക് ബാധകമല്ല. കൂടാതെ, കരാർ ലംഘനം നേരിടുന്ന കോൺട്രാക്ടർമാർക്ക് നഷ്ടപരിഹാരത്തിനായി കോടതിയെ സമീപിക്കാനും ധനമന്ത്രിയുടെ അംഗീകാരത്തോടെ ആർബിട്രേഷൻ (Arbitration) വഴി തർക്കങ്ങൾ പരിഹരിക്കാനും പുതിയ നിയമം വ്യവസ്ഥ ചെയ്യുന്നുണ്ട്.
About the Author
