റിയാദ്: സൗദി അറേബ്യയിൽ അനുവദിച്ച വിസ കാലാവധി കഴിഞ്ഞിട്ടും തങ്ങുന്ന ഹജ്ജ്, ഉംറ തീർത്ഥാടകരെക്കുറിച്ച് അധികൃതരെ വിവരമറിയിക്കുന്നതിൽ വീഴ്ച വരുത്തുന്ന സർവീസ് കമ്പനികൾക്ക് 1,00,000 (ഒരു ലക്ഷം) റിയാൽ വരെ പിഴ ഈടാക്കുമെന്ന് സൗദി പബ്ലിക് സെക്യൂരിറ്റി മുന്നറിയിപ്പ് നൽകി.
തങ്ങൾക്ക് കീഴിൽ എത്തിയ ഹജ്ജ്-ഉംറ തീർത്ഥാടകർ കാലാവധി പൂർത്തിയായിട്ടും രാജ്യം വിടാതെ തങ്ങുന്നത് സംബന്ധിച്ച് ബന്ധപ്പെട്ട അധികാരികളെ അറിയിക്കാൻ വൈകുന്ന കമ്പനികൾക്കും സ്ഥാപനങ്ങൾക്കുമാണ് ഈ പിഴ ബാധകമാകുക എന്ന് പബ്ലിക് സെക്യൂരിറ്റി വ്യക്തമാക്കി.
നിയമലംഘകരുടെ എണ്ണത്തിനനുസരിച്ച് ഈ സാമ്പത്തിക പിഴ ഒരു ലക്ഷം റിയാലിൽ നിന്ന് ഇരട്ടിയായി വർദ്ധിക്കുമെന്നും അതോറിറ്റി കൂട്ടിച്ചേർത്തു.
ഇഖാമ (Residency), തൊഴിൽ, അതിർത്തി സുരക്ഷാ നിയമങ്ങൾ ലംഘിക്കുന്നവരെക്കുറിച്ചുള്ള വിവരങ്ങൾ മക്ക, മദീന, റിയാദ്, ഈസ്റ്റേൺ പ്രൊവിൻസ് എന്നീ മേഖലകളിലുള്ളവർ 911 എന്ന നമ്പറിലും, സൗദിയിലെ മറ്റ് പ്രദേശങ്ങളിലുള്ളവർ 999 എന്ന നമ്പറിലും വിളിച്ച് അറിയിക്കണമെന്ന് അധികൃതർ പൊതുജനങ്ങളോട് അഭ്യർത്ഥിച്ചു.
നിയമലംഘനങ്ങളെക്കുറിച്ച് നൽകുന്ന വിവരങ്ങൾ തികച്ചും രഹസ്യമായി സൂക്ഷിക്കുമെന്നും, വിവരം നൽകുന്ന വ്യക്തികൾക്ക് യാതൊരുവിധ നിയമപരമായ ഉത്തരവാദിത്തവും ഉണ്ടാകില്ലെന്നും പബ്ലിക് സെക്യൂരിറ്റി വ്യക്തമാക്കിയിട്ടുണ്ട്.
About the Author
