🛑കുറഞ്ഞ ചെലവിൽ ഉംറ നിർവഹിക്കാം

മക്ക : വിദേശ മന്ത്രാലയം കഴിഞ്ഞയാഴ്ച മുതൽ ആരംഭിച്ച സൗജന്യ ട്രാൻസിറ്റ് വിസാ സേവനം കുറഞ്ഞ ചെലവിൽ ഉംറ നിർവഹിക്കാനും മദീന സിയാറത്ത് നടത്താനും സൗദി അറേബ്യ സന്ദർശിക്കാനും വിദേശികൾക്ക് അവസരമൊരുക്കുന്നതായി വിലയിരുത്തപ്പെടുന്നു.

വളരെ എളുപ്പത്തിൽ ലഭിക്കുമെന്ന് ട്രാൻസിറ്റ് വിസയുടെ പ്രധാന സവിശേഷതയാണ്. സൗദിയയിലോ ഫ്‌ളൈ നാസിലോ ടിക്കറ്റ് ബുക്ക് ചെയ്യുന്നതിനൊപ്പം തന്നെ വിസാ അപേക്ഷയും സമർപ്പിക്കാൻ യാത്രക്കാർക്ക് സാധിക്കും. സൗദിയ, ഫ്‌ളൈ നാസ് ടിക്കറ്റ് ബുക്കിംഗ് പ്ലാറ്റ്ഫോമുകൾ വഴി വിസാ അപേക്ഷ ലഭിച്ചാലുടൻ വിദേശ മന്ത്രാലയത്തിന്റെ ഏകീകൃത വിസാ പ്ലാറ്റ്‌ഫോം വഴി സൗജന്യമായി ട്രാൻസിറ്റ് വിസ അനുവദിക്കുകയാണ് ചെയ്യുന്നത്. മൂന്നു മാസ കാലാവധിയുള്ള വിസയാണ് അനുവദിക്കുന്നത്. ഈ വിസ നേടുന്നവർക്ക് 96 മണിക്കൂർ നേരം സൗദിയിൽ തങ്ങാൻ സാധിക്കും. റിയാദ്, ജിദ്ദ, മദീന വിമാനത്താവളങ്ങൾ വഴി ഉംറ തീർഥാടകരും സിയാറത്തുകാരും സന്ദർശകരും ട്രാൻസിറ്റ് വിസയിൽ രാജ്യത്ത് പ്രവേശിക്കാൻ തുടങ്ങിയിട്ടുണ്ട്.

ഹജ്, ട്രാൻസിറ്റ് വിസകളുമായി ബന്ധപ്പെട്ട സൗദി ഗവൺമെന്റിന്റെ പുതിയ തീരുമാനങ്ങൾ മക്കയിലും മദീനയിലും റിയൽ എസ്റ്റേറ്റ്, ആതിഥേയ മേഖലകൾ അടക്കമുള്ള ബിസിനസ് മേഖലക്ക് ഏറെ ഗുണകരമായി മാറുമെന്ന് മക്കയിലെ ദാഖിർ ഡെവലപ്‌മെന്റ് കമ്പനി സി.ഇ.ഒ എൻജിനീയർ അബ്ദുൽ അസീസ് അൽഅബൂദി പറഞ്ഞു. വിമാന ടിക്കറ്റിനൊപ്പം സൗജന്യ ട്രാൻസിറ്റ് വിസ അനുവദിക്കൽ, ഹജ് തീർഥാടകരുടെ എണ്ണം യാതൊരുവിധ പ്രത്യേക നിയന്ത്രണങ്ങളുമില്ലാതെ കൊറോണ മഹാമാരിക്കു മുമ്പുള്ള അതേ തോതിലേക്ക് ഉയർത്തൽ, ഹജ് തീർഥാടകർക്കുള്ള ഇൻഷുറൻസ് നിരക്ക് 73 ശതമാനം തോതിൽ കുറക്കൽ, ഉംറ വിസാ കാലാവധി 90 ദിവസമായി ദീർഘിപ്പിക്കൽ, ഉംറ വിസയിൽ പ്രവേശിക്കുന്നവർക്ക് രാജ്യത്ത് എവിടെയും സ്വതന്ത്രമായി സഞ്ചരിക്കാൻ അനുമതി നൽകൽ എന്നിവ അടക്കമുള്ള തീരുമാനങ്ങൾ തീർഥാടകരുടെയും സന്ദർശകരുടെയും എണ്ണം വലിയ തോതിൽ ഉയരാൻ സഹായിക്കും.