റിയാദ്: സൗദിയിലെ പങ്കാളിത്ത താമസകേന്ദ്രങ്ങളുടെ (Shared Residential Facilities) ഉടമകൾ പുതുക്കിയ ആരോഗ്യ-സാങ്കേതിക സുരക്ഷാ മാനദണ്ഡങ്ങൾ പാലിക്കണമെന്ന് മുൻസിപ്പാലിറ്റി ആൻഡ് ഹൗസിംഗ് മന്ത്രാലയം ആവശ്യപ്പെട്ടു. സുരക്ഷിതമായ താമസസൗകര്യം ഒരുക്കുന്നതിനും അടിയന്തര സാഹചര്യങ്ങളെ നേരിടാൻ സജ്ജമായിരിക്കുന്നതിനും ഉള്ള ഉത്തരവാദിത്തം ഉടമകൾക്കാണെന്ന് മന്ത്രാലയം ഊന്നിപ്പറഞ്ഞു.
കെട്ടിടങ്ങളിലെ ഒഴിപ്പിക്കൽ പാതകളും (Evacuation routes) എമർജൻസി എക്സിറ്റുകളും എപ്പോഴും തടസ്സങ്ങളില്ലാതെ സൂക്ഷിക്കണം. വൈദ്യുതി തടസ്സപ്പെടുമ്പോൾ സ്വയമേവ പ്രവർത്തിക്കുന്ന വെളിച്ച സംവിധാനവും ലൈറ്റുകളുള്ള ദിശാസൂചക ബോർഡുകളും ഇവിടെ സ്ഥാപിക്കണം. അടിയന്തര സാഹചര്യങ്ങളിൽ യാതൊരു തടസ്സവുമില്ലാതെ അകത്തുനിന്ന് എളുപ്പത്തിൽ തുറക്കാവുന്ന വാതിലുകളായിരിക്കണം അടിയന്തര പുറത്തുകടക്കൽ വഴികളിൽ (Emergency doors) സജ്ജീകരിക്കേണ്ടത്.
തീപിടുത്തം കണ്ടെത്താനുള്ള സംവിധാനങ്ങളും അഗ്നിശമന ഉപകരണങ്ങളും പതിവായി പരിശോധിക്കുകയും പരിപാലിക്കുകയും ചെയ്യേണ്ടതിന്റെ പ്രാധാന്യം മന്ത്രാലയം വ്യക്തമാക്കി. താമസസ്ഥലങ്ങളിലോ കോറിഡോറുകളിലോ എക്സിറ്റുകളിലോ സാമഗ്രികൾ വലിച്ചെറിഞ്ഞ് സൂക്ഷിക്കുന്നത് നിരോധിച്ചിട്ടുണ്ട്. അപകടസാധ്യതകൾ കുറയ്ക്കുന്നതിനും സുരക്ഷ വർദ്ധിപ്പിക്കുന്നതിനുമായി അനുവദനീയമായ ആളുകളുടെ എണ്ണ പരിധി (Occupancy limits) പാലിക്കാനും കെട്ടിട ഓപ്പറേറ്റർമാരോട് ആവശ്യപ്പെട്ടിട്ടുണ്ട്.
നിയമപരമായ മാനദണ്ഡങ്ങൾക്ക് അനുസൃതമായി അംഗീകൃത ഒഴിപ്പിക്കൽ പ്ലാനുകൾ (Evacuation plans) തയ്യാറാക്കാനും, വ്യക്തമായി കാണാവുന്ന ഇടങ്ങളിൽ ഇവാക്വേഷൻ മാപ്പുകൾ പ്രദർശിപ്പിക്കാനും, എമർജൻസി എക്സിറ്റുകളും അസംബ്ലി പോയിന്റുകളും അടയാളപ്പെടുത്താനും തൊഴിലുടമകളോടും താമസകേന്ദ്രങ്ങളുടെ ഉടമകളോടും മന്ത്രാലയം ആവശ്യപ്പെട്ടു. കൂടാതെ, അടിയന്തര നടപടിക്രമങ്ങൾ എല്ലാ താമസക്കാരും മനസ്സിലാക്കിയിട്ടുണ്ടെന്ന് ഉറപ്പുവരുത്തണം.
സുരക്ഷാ സംവിധാനത്തിന്റെ ഏറ്റവും പ്രധാനപ്പെട്ട ഘടകം മനുഷ്യരുടെ സജ്ജീകരണമാണെന്ന് മന്ത്രാലയം വ്യക്തമാക്കി. അതിനാൽ കൃത്യമായ ഇടവേളകളിൽ ഇവാക്വേഷൻ മോക്ക് ഡ്രില്ലുകൾ നടത്താനും, അടിയന്തര സാഹചര്യങ്ങളിലെ പ്രതികരണ രീതികളെക്കുറിച്ചും പ്രാഥമിക അഗ്നിശമന ഉപകരണങ്ങൾ സുരക്ഷിതമായി ഉപയോഗിക്കുന്നതിനെക്കുറിച്ചും താമസക്കാർക്ക് പരിശീലനം നൽകാനും നിർദ്ദേശമുണ്ട്.
സുരക്ഷാ മാനദണ്ഡങ്ങൾ പാലിക്കുന്നത് വെറുമൊരു നിയമപരമായ ബാധ്യത മാത്രമല്ല, മറിച്ച് അപകടങ്ങൾ ഒഴിവാക്കാനും താമസക്കാരെ സംരക്ഷിക്കാനുമുള്ള നേരിട്ടുള്ള ഉത്തരവാദിത്തമാണെന്ന് മന്ത്രാലയം പറഞ്ഞു. അടിയന്തര ഘട്ടത്തിന്റെ ആദ്യ മിനിറ്റുകളിലെ ശരിയായ തയ്യാറെടുപ്പും ഫലപ്രദമായ ഇടപെടലും നാശനഷ്ടങ്ങൾ വലിയ അളവിൽ കുറയ്ക്കാനും സുരക്ഷിതമായ താമസ അന്തരീക്ഷം ഉറപ്പാക്കാനും സഹായിക്കുമെന്നും മന്ത്രാലയം കൂട്ടിച്ചേർത്തു.
About the Author
