സൗദിയിലേക്ക് ഇനി യാത്ര കൂടുതൽ എളുപ്പം; വിനോദസഞ്ചാരികൾക്കായി 'പാക്കേജ് വിസ' പൈലറ്റ് പ്രോജക്റ്റ് ആരംഭിച്ചു

റിയാദ്: വിനോദസഞ്ചാര മേഖലയിൽ വൻ പരിഷ്‌കാരങ്ങളുമായി സൗദി അറേബ്യ. വിദേശ സഞ്ചാരികൾക്കായി വിമാന ടിക്കറ്റ്, താമസം, വിസ എന്നിവയെല്ലാം ഒരൊറ്റ പാക്കേജായി ലഭ്യമാക്കുന്ന **’പാക്കേജ് വിസ’ (Package Visa)** പദ്ധതിയുടെ പൈലറ്റ് ഘട്ടത്തിന് രാജ്യത്ത് തുടക്കമായി. തിരഞ്ഞെടുത്ത രാജ്യങ്ങളിലെ അംഗീകൃത ജനറൽ ട്രാവൽ ആന്റ് ടൂറിസം സർവീസ് പ്രൊവൈഡർമാർ വഴിയാണ് നിലവിൽ ഈ സേവനം ലഭ്യമാക്കുന്നത്.

ടൂറിസം മന്ത്രാലയം, വിദേശകാര്യ മന്ത്രാലയം, ആഭ്യന്തര മന്ത്രാലയം, ഇൻഷുറൻസ് അതോറിറ്റി എന്നിവയുടെ സംയുക്ത സഹകരണത്തോടെയാണ് പുതിയ പദ്ധതി നടപ്പിലാക്കുന്നത്. നേരത്തെ അവതരിപ്പിച്ച ടൂറിസ്റ്റ് ഇ-വിസ, വിസ ഓൺ അറൈവൽ, സ്റ്റോപ്പ് ഓവർ ട്രാൻസിറ്റ് വിസ എന്നിവയ്ക്ക് പിന്നാലെയാണ് സഞ്ചാരികൾക്ക് യാത്ര കൂടുതൽ എളുപ്പമാക്കാൻ പുതിയ സംവിധാനം ഒരുക്കിയിരിക്കുന്നത്.

ഈ പദ്ധതി പ്രകാരം യോഗ്യരായ യാത്രക്കാർക്ക് അംഗീകൃത ട്രാവൽ ഏജൻസികൾ വഴി റൗണ്ട് ട്രിപ്പ് ഫ്ലൈറ്റ് ടിക്കറ്റുകൾ, ലൈസൻസുള്ള ഹോട്ടലുകളിലെ താമസം, ഇലക്ട്രോണിക് ടൂറിസ്റ്റ് വിസ എന്നിവ ഒരൊറ്റ പാക്കേജായി ബുക്ക് ചെയ്യാം. ഇതിനൊപ്പം സൗദിയിലെ വിവിധ പരിപാടികൾ, വിനോദങ്ങൾ, ടൂറിസം അനുഭവങ്ങൾ എന്നിവയും പാക്കേജിന്റെ ഭാഗമായി ഏജൻസികൾക്ക് ഉൾപ്പെടുത്താം.

യാത്രക്കാർക്ക് വിസ നടപടികളുടെ സങ്കീർണ്ണതകൾ ഒഴിവാക്കാനും, കൂടുതൽ ദിവസം രാജ്യത്ത് തങ്ങാൻ താല്പര്യപ്പെടുന്ന രീതിയിൽ ആകർഷകമായ പാക്കേജുകൾ ഒരുക്കാൻ ട്രാവൽ ഏജൻസികൾക്ക് ഇത് സഹായകരമാകുമെന്നും മന്ത്രാലയം വ്യക്തമാക്കി. ഡിജിറ്റൽ ബുക്കിംഗ് പ്ലാറ്റ്‌ഫോമുകൾ, 24/7 സാങ്കേതിക സഹായം, കസ്റ്റമർ കെയർ സെന്ററുകൾ എന്നിവയുള്ള മികച്ച ട്രാവൽ പ്രൊവൈഡർമാർക്ക് മാത്രമായിരിക്കും ഈ പ്രോഗ്രാമിൽ പങ്കെടുക്കാൻ അനുമതി നൽകുക.

സൗദി അറേബ്യയെ കൂടുതൽ എളുപ്പത്തിൽ സന്ദർശിക്കാൻ സാധിക്കുന്ന രീതിയിലാണ് പുതിയ മാറ്റങ്ങളെന്ന് ടൂറിസം മന്ത്രി അഹമ്മദ് അൽ ഖത്തീബ് പറഞ്ഞു. കഴിഞ്ഞ വർഷം (2025) മാത്രം 2.9 കോടിയിലധികം അന്താരാഷ്ട്ര സഞ്ചാരികളെയാണ് സൗദി വരവേറ്റത്. 2025-ലെ വാർഷിക റിപ്പോർട്ട് പ്രകാരം ആഭ്യന്തര-അന്തർദേശീയ ടൂറിസ്റ്റുകളുടെ എണ്ണം 12.3 കോടിയായി ഉയർന്നു. ടൂറിസം മേഖലയിലെ മൊത്തം ചിലവഴിക്കൽ 304 ബില്യൺ റിയാൽ എന്ന റെക്കോർഡിലും എത്തിയിട്ടുണ്ട്. കൂടാതെ, ടൂറിസം മേഖലയിലെ തൊഴിൽ പങ്കാളിത്തത്തിൽ സൗദി വനിതകളുടെ എണ്ണം 47 ശതമാനമായി ഉയർന്നതായും റിപ്പോർട്ട് വ്യക്തമാക്കുന്നു.