റിയാദ്: സൗദി അറേബ്യയിലെ കിംഗ് ഖാലിദ് റോയൽ റിസർവിൽ 140ലേറെ സ്പൈനി-ടെയിൽഡ് ലിസാർഡുകളെ അനുയോജ്യമായ വിവിധ കേന്ദ്രങ്ങളിൽ സ്വാഭാവിക ആവാസവ്യവസ്ഥയിലേക്ക് വിട്ടയച്ചു. ഇമാം അബ്ദുൽ അസീസ് ബിൻ മുഹമ്മദ് റോയൽ റിസർവ് ഡെവലപ്മെന്റ് അതോറിറ്റിയും നാഷണൽ സെന്റർ ഫോർ വൈൽഡ്ലൈഫും (NCW) സംയുക്തമായാണ് പദ്ധതി നടപ്പാക്കിയത്.
വന്യജീവി സംരക്ഷണം ശക്തിപ്പെടുത്തുക, ജൈവവൈവിധ്യം വർധിപ്പിക്കുക, റിസർവിലെ ആവാസവ്യവസ്ഥകളുടെ സുസ്ഥിരത ഉറപ്പാക്കുക എന്നിവയാണ് പദ്ധതിയുടെ ലക്ഷ്യം.
പല്ലികളെ വിട്ടയക്കുന്നതിനായി തെരഞ്ഞെടുത്ത സ്ഥലങ്ങൾ വിദഗ്ധർ ഫീൽഡ് പഠനങ്ങളിലൂടെ വിലയിരുത്തിയ ശേഷമാണ് നടപടി സ്വീകരിച്ചത്. ഇവയുടെ സ്വാഭാവിക ആവാസവ്യവസ്ഥ, കാലാവസ്ഥ, പരിസ്ഥിതി സവിശേഷതകൾ എന്നിവയും പല്ലികളുടെ ആവാസ ആവശ്യങ്ങളുമായുള്ള പൊരുത്തവും പരിശോധിച്ചാണ് സ്ഥലങ്ങൾ തെരഞ്ഞെടുത്തത്.
വിട്ടയച്ച പല്ലികൾ പുതിയ ആവാസകേന്ദ്രങ്ങളുമായി എങ്ങനെ പൊരുത്തപ്പെടുന്നു, അവയുടെ സഞ്ചാരം, സ്വഭാവം എന്നിവ മനസ്സിലാക്കുന്നതിനായി തുടർനിരീക്ഷണവും നടത്തും. ഇതിലൂടെ പദ്ധതിയുടെ ഫലപ്രാപ്തി വിലയിരുത്താനും ഭാവിയിലെ വന്യജീവി സംരക്ഷണ പദ്ധതികൾ കൂടുതൽ കാര്യക്ഷമമാക്കാനും ആവശ്യമായ വിവരങ്ങൾ ലഭ്യമാക്കാനാകുമെന്ന് അധികൃതർ വ്യക്തമാക്കി.
അധികാര സമിതിയിലെ വന്യജീവി വിഭാഗം മേധാവി അബ്ദുൽലത്തീഫ് അൽ അബ്ദുൽവഹാബ് പറഞ്ഞു: സ്പൈനി-ടെയിൽഡ് ലിസാർഡുകളെ സ്വാഭാവിക ആവാസവ്യവസ്ഥയിലേക്ക് തിരിച്ചെത്തിക്കുന്നത് വന്യജീവി ഇനങ്ങളെയും അവയുടെ പ്രകൃതിദത്ത ആവാസകേന്ദ്രങ്ങളെയും വികസിപ്പിക്കുന്നതിനുള്ള അതോറിറ്റിയുടെ പദ്ധതികളുടെ ഭാഗമാണെന്ന്.
സൗദി അറേബ്യയിലെ മരുഭൂമി പരിസ്ഥിതിയുമായി അടുത്ത ബന്ധമുള്ള ജീവിവർഗമാണ് സ്പൈനി-ടെയിൽഡ് ലിസാർഡ്. ഭക്ഷ്യശൃംഖലയിലും മരുഭൂമി ആവാസവ്യവസ്ഥയുടെ സന്തുലിതാവസ്ഥ നിലനിർത്തുന്നതിലും ഇവയ്ക്ക് പ്രധാന പങ്കുണ്ടെന്നും അധികൃതർ വ്യക്തമാക്കി.
വന്യജീവി സംരക്ഷണം, പ്രകൃതിദത്ത ആവാസകേന്ദ്രങ്ങളുടെ പുനഃസ്ഥാപനം, സസ്യാവരണം വർധിപ്പിക്കൽ, ജൈവവൈവിധ്യം സംരക്ഷിക്കൽ എന്നിവ ലക്ഷ്യമിട്ടുള്ള സൗദിയുടെ പ്രവർത്തനങ്ങളുടെ ഭാഗമായാണ് പദ്ധതി നടപ്പാക്കിയത്. സൗദി വിഷൻ 2030യുടെ പരിസ്ഥിതി ലക്ഷ്യങ്ങൾ കൈവരിക്കുന്നതിനും ഇത്തരം സംരംഭങ്ങൾ സഹായിക്കുമെന്ന് അധികൃതർ അറിയിച്ചു.
About the Author
