റിയാദ്: സൗദി അറേബ്യയുടെ വിദേശനാണ്യ ശേഖരത്തിൽ വാർഷികാടിസ്ഥാനത്തിൽ 7.2 ശതമാനം വർധന രേഖപ്പെടുത്തി. 2026 ആഗസ്റ്റിൽ വിദേശനാണ്യ ശേഖരം 462.15 ബില്യൺ ഡോളറായി (1.733 ട്രില്യൺ റിയാൽ) ഉയർന്നതായി സൗദി സെൻട്രൽ ബാങ്ക് (SAMA) പുറത്തുവിട്ട ഏറ്റവും പുതിയ കണക്കുകൾ വ്യക്തമാക്കുന്നു. 2025 ആഗസ്റ്റിൽ ഇത് 431.11 ബില്യൺ ഡോളർ (1.616 ട്രില്യൺ റിയാൽ) ആയിരുന്നു.
അതേസമയം, 2026 ജൂലൈ അവസാനത്തിൽ വിദേശനാണ്യ ശേഖരം 463.65 ബില്യൺ ഡോളർ (1.738 ട്രില്യൺ റിയാൽ) ആയിരുന്നു. ജൂലൈയുമായി താരതമ്യം ചെയ്യുമ്പോൾ ആഗസ്റ്റിൽ ശേഖരത്തിൽ 0.32 ശതമാനം കുറവ് രേഖപ്പെടുത്തി.
സൗദിയുടെ ഔദ്യോഗിക റിസർവ് ആസ്തികളും വാർഷികാടിസ്ഥാനത്തിൽ 6.7 ശതമാനം വർധിച്ച് 487.31 ബില്യൺ ഡോളറായി (1.827 ട്രില്യൺ റിയാൽ). 2025 ആഗസ്റ്റിൽ ഇത് 456.65 ബില്യൺ ഡോളർ (1.712 ട്രില്യൺ റിയാൽ) ആയിരുന്നു.
എന്നാൽ പ്രതിമാസ കണക്കിൽ ഔദ്യോഗിക റിസർവ് ആസ്തികൾ തുടർച്ചയായ രണ്ടാം മാസവും കുറഞ്ഞു. ജൂലൈയിലെ 488.63 ബില്യൺ ഡോളറിൽ നിന്ന് ആഗസ്റ്റിൽ 0.27 ശതമാനം അഥവാ 1.32 ബില്യൺ ഡോളർ കുറഞ്ഞ് 487.31 ബില്യൺ ഡോളറായി. ജൂൺ അവസാനത്തിൽ ഇത് 494.55 ബില്യൺ ഡോളർ ആയിരുന്നു.
സൗദിയുടെ ഔദ്യോഗിക റിസർവ് ആസ്തികളിൽ മോണിറ്ററി ഗോൾഡ്, പ്രത്യേക പിൻവലിക്കൽ അവകാശങ്ങൾ (SDRs), അന്താരാഷ്ട്ര നാണയനിധിയിലെ (IMF) റിസർവ് സ്ഥാനം, വിദേശനാണ്യ ശേഖരം എന്നിവ ഉൾപ്പെടുന്നു.
ആഗസ്റ്റിൽ SDR-കളുടെ മൂല്യം വാർഷികാടിസ്ഥാനത്തിൽ ഏകദേശം 2 ശതമാനം കുറഞ്ഞ് 21.16 ബില്യൺ ഡോളറായി (79.37 ബില്യൺ റിയാൽ). 2025 ആഗസ്റ്റിൽ ഇത് 21.6 ബില്യൺ ഡോളർ ആയിരുന്നു. എന്നാൽ ജൂലൈയിലെ 21.01 ബില്യൺ ഡോളറുമായി താരതമ്യം ചെയ്യുമ്പോൾ ആഗസ്റ്റിൽ SDR മൂല്യം വർധിച്ചിട്ടുണ്ട്.
അതേസമയം, IMF-ലുള്ള സൗദിയുടെ റിസർവ് സ്ഥാനം 2026 ആഗസ്റ്റിൽ 3.56 ബില്യൺ ഡോളറായി (13.34 ബില്യൺ റിയാൽ) ഉയർന്നു. കഴിഞ്ഞ വർഷം ഇതേ കാലയളവിലെ 3.51 ബില്യൺ ഡോളറുമായി താരതമ്യം ചെയ്യുമ്പോൾ ഇത് 1.4 ശതമാനം വർധനയാണ്.
മോണിറ്ററി ഗോൾഡിന്റെ മൂല്യത്തിൽ മാറ്റമുണ്ടായില്ല. ആഗസ്റ്റ് അവസാനം ഇത് 433.07 മില്യൺ ഡോളറായി (1.624 ബില്യൺ റിയാൽ) തുടർന്നു.
അതേസമയം, ജൂലൈ അവസാനം പുറത്തുവിട്ട സൗദിയെക്കുറിച്ചുള്ള 2026 ആർട്ടിക്കിൾ IV കൺസൾട്ടേഷൻ റിപ്പോർട്ടിൽ, സൗദി ബാങ്കിങ് മേഖലയുടെ ശക്തമായ മൂലധന-ലിക്വിഡിറ്റി നിലയെ അന്താരാഷ്ട്ര നാണയനിധി (IMF) പ്രശംസിച്ചിരുന്നു. നിലവിലെ സാമ്പത്തിക സാഹചര്യങ്ങളുടെ പ്രത്യാഘാതങ്ങൾ നേരിടാനുള്ള ബാങ്കിങ് മേഖലയിലെ ശേഷി ശക്തമാണെന്നും ആസ്തികളുടെ ഗുണനിലവാരത്തിൽ തുടർച്ചയായ പുരോഗതിയുണ്ടെന്നും റിപ്പോർട്ട് ചൂണ്ടിക്കാട്ടി.
രാജ്യത്തെ മൊത്തം വായ്പകളിൽ തിരിച്ചടവ് മുടങ്ങിയ വായ്പകളുടെ (Non-performing loans) അനുപാതം ഒരു ശതമാനമായി കുറഞ്ഞതായും, കഴിഞ്ഞ പത്ത് വർഷത്തിനിടയിലെ ഏറ്റവും താഴ്ന്ന നിലയാണിതെന്നും IMF റിപ്പോർട്ട് വ്യക്തമാക്കി. സാമ്പത്തിക സ്ഥിരത ശക്തിപ്പെടുത്തുന്നതിനും അപകടസാധ്യതകൾ കുറയ്ക്കുന്നതിനുമായി സൗദി സെൻട്രൽ ബാങ്ക് സ്വീകരിച്ച ജാഗ്രതാപരമായ നയങ്ങളെയും റിപ്പോർട്ട് പ്രശംസിച്ചു.
About the Author
