സൗദിയിൽ ഡിജിറ്റൽ ഉപയോഗം കുതിക്കുന്നു; വാട്‌സ്ആപ്പ് ഏറ്റവും മുന്നിൽ

റിയാദ്: സൗദി അറേബ്യയിൽ ഏറ്റവും കൂടുതൽ ഉപയോഗിക്കുന്ന സോഷ്യൽ മീഡിയ ആപ്ലിക്കേഷനായി വാട്‌സ്ആപ്പ് ഒന്നാം സ്ഥാനം നിലനിർത്തുന്നതായി കമ്മ്യൂണിക്കേഷൻസ്, സ്‌പേസ് ആൻഡ് ടെക്‌നോളജി കമ്മീഷന്റെ (CST) “Saudi Internet 2025” റിപ്പോർട്ട്. പുരുഷന്മാരിൽ 94.4 ശതമാനവും സ്ത്രീകളിൽ 90.4 ശതമാനവും വാട്‌സ്ആപ്പ് ഉപയോഗിക്കുന്നതായാണ് റിപ്പോർട്ടിലെ കണക്ക്.

സ്‌നാപ്ചാറ്റാണ് രണ്ടാം സ്ഥാനത്ത്. സ്ത്രീകളിൽ 88.2 ശതമാനവും പുരുഷന്മാരിൽ 80.2 ശതമാനവും സ്‌നാപ്ചാറ്റ് ഉപയോഗിക്കുന്നു. ഇതോടെ വാട്‌സ്ആപ്പിന് ശേഷം സൗദി സ്ത്രീകൾക്കിടയിൽ ഏറ്റവും പ്രചാരമുള്ള ആപ്ലിക്കേഷനായും സ്‌നാപ്ചാറ്റ് മാറി.

ടിക്‌ടോക്ക് സ്ത്രീകളിൽ 77.6 ശതമാനവും പുരുഷന്മാരിൽ 76.5 ശതമാനവും ഉപയോഗിക്കുന്നതായി റിപ്പോർട്ട് വ്യക്തമാക്കുന്നു. യൂട്യൂബ് പുരുഷന്മാരിൽ 81.1 ശതമാനവും സ്ത്രീകളിൽ 68.8 ശതമാനവും ഉപയോഗിക്കുന്നതോടെ നാലാം സ്ഥാനത്താണ്. ഇൻസ്റ്റാഗ്രാം സ്ത്രീകളിൽ 42.4 ശതമാനവും പുരുഷന്മാരിൽ 39.5 ശതമാനവും ഉപയോഗിക്കുന്നു.

സൗദിയിലെ ഇന്റർനെറ്റ് ഉപയോഗത്തിന്റെ വ്യാപ്തിയും റിപ്പോർട്ട് വ്യക്തമാക്കുന്നു. 61.3 ശതമാനം ഇന്റർനെറ്റ് ഉപയോക്താക്കളും ദിവസവും ഏഴ് മണിക്കൂറോ അതിലധികമോ ഓൺലൈനിൽ ചെലവഴിക്കുന്നു. 34.1 ശതമാനം പേർ മൂന്ന് മുതൽ ആറ് മണിക്കൂർ വരെയും 4.6 ശതമാനം പേർ മൂന്ന് മണിക്കൂറിൽ താഴെയും ഇന്റർനെറ്റ് ഉപയോഗിക്കുന്നു.

രാത്രി 9 മുതൽ 11 വരെയാണ് രാജ്യത്ത് ഇന്റർനെറ്റ് ഉപയോഗം ഏറ്റവും കൂടുതലുള്ള സമയം. ആഴ്ചയിൽ വെള്ളിയാഴ്ചയാണ് ഏറ്റവും സജീവമായ ദിവസമെന്നും മാർച്ചിലാണ് വർഷത്തിലെ ഏറ്റവും ഉയർന്ന ഉപയോഗം രേഖപ്പെടുത്തിയതെന്നും റിപ്പോർട്ട് പറയുന്നു.

യാത്രയ്ക്കിടെയാണ് ഏറ്റവും കൂടുതൽ ഇന്റർനെറ്റ് ഉപയോഗം രേഖപ്പെടുത്തിയത് — 84 ശതമാനം. വീടുകളിൽ ഇത് 77.5 ശതമാനവും ജോലിസ്ഥലങ്ങളിൽ 41.4 ശതമാനവുമാണ്.

ഇന്റർനെറ്റ് ആക്‌സസ് ചെയ്യുന്നതിനുള്ള പ്രധാന ഉപകരണമായി മൊബൈൽ ഫോൺ തുടരുന്നു. 99.6 ശതമാനം പേരാണ് മൊബൈൽ ഫോണിലൂടെ ഇന്റർനെറ്റ് ഉപയോഗിക്കുന്നത്. കമ്പ്യൂട്ടർ ഉപയോഗം 47.4 ശതമാനവും ടാബ്‌ലെറ്റ് ഉപയോഗം 39.2 ശതമാനവുമാണ്. സ്മാർട്ട് വാച്ചുകളും ഗെയിമിംഗ് കൺസോളുകളും ഉൾപ്പെടെയുള്ള മറ്റ് ഉപകരണങ്ങളുടെ ഉപയോഗം 30.7 ശതമാനമാണ്.

രാജ്യത്ത് ഏറ്റവുമധികം സന്ദർശിക്കുന്ന വെബ്‌സൈറ്റുകളിൽ വിക്കിപീഡിയ, യൂട്യൂബ്, ഇൻസ്റ്റാഗ്രാം, വിദ്യാഭ്യാസ മന്ത്രാലയം, വാട്‌സ്ആപ്പ്, അബ്ഷർ, ChatGPT എന്നിവ ഉൾപ്പെടുന്നു. ഇന്റർനെറ്റിൽ ഏറ്റവും കൂടുതൽ തിരഞ്ഞ പദങ്ങളിൽ “വിവർത്തകൻ”, “അബ്ഷർ”, “നൂർ”, “വിവർത്തനം”, “യൂട്യൂബ്”, “ഗൂഗിൾ”, “മദ്രസതി”, “സൗദി റിയാൽ” എന്നിവയും ഉൾപ്പെടുന്നു.