ജിദ്ദ: സൗദി അറേബ്യയിലെ വിവിധ മേഖലകളിൽ കനത്ത മഴയ്ക്ക് റെഡ് അലേർട്ട് പ്രഖ്യാപിച്ചതായി നാഷണൽ സെന്റർ ഫോർ മെറ്റീരിയോളജി (NCM) അറിയിച്ചു. വ്യാഴാഴ്ച രാജ്യത്തിന്റെ ചില ഭാഗങ്ങളിൽ താപനില 47°C വരെ ഉയരാനും സാധ്യതയുണ്ട്.
മക്ക മേഖലയിലെ തായിഫ്, അൽ-കാമിൽ, അദ്ഹം എന്നിവിടങ്ങളിലും സമീപ പ്രദേശങ്ങളിലുമാണ് കനത്ത മഴ മുന്നറിയിപ്പായ റെഡ് അലേർട്ട് പ്രഖ്യാപിച്ചിരിക്കുന്നത്. മദീന മേഖലയിലെ അൽ-ഐസ്, അൽ-മഹ്ദ്, ബദർ എന്നിവിടങ്ങളിൽ മിതമായ മഴയ്ക്ക് ഓറഞ്ച് അലേർട്ടും മക്ക മേഖലയിലെ റാബിഗ്, ജിദ്ദ, അൽ-ഖുർമ എന്നിവിടങ്ങളിൽ നേരിയ മഴയ്ക്കും പൊടിക്കാറ്റിനും യെല്ലോ അലേർട്ടും പ്രഖ്യാപിച്ചിട്ടുണ്ട്.
ജസാൻ, അസീർ, അൽ-ബഹ, മക്ക, മദീന മേഖലകളിലെ ചില ഭാഗങ്ങളിൽ ഇടിമിന്നലോടുകൂടിയ മിതമായതോ കനത്തതോ ആയ മഴയ്ക്കും ആലിപ്പഴ വർഷത്തിനും ശക്തമായ കാറ്റിനും സാധ്യതയുണ്ട്. ശക്തമായ മഴ മിന്നൽപ്രളയത്തിന് കാരണമാകാനും സാധ്യതയുണ്ടെന്ന് NCM മുന്നറിയിപ്പ് നൽകി.
വടക്കൻ അതിർത്തി മേഖല, ജസാൻ, കിഴക്കൻ പ്രവിശ്യയുടെയും റിയാദ് മേഖലയുടെയും തെക്കൻ ഭാഗങ്ങളിലും മഴയ്ക്കും ശക്തമായ കാറ്റിനും സാധ്യതയുണ്ട്. രാജ്യത്തിന്റെ കിഴക്കൻ തീരപ്രദേശങ്ങളിൽ രാത്രിയിലും പുലർച്ചെയും മൂടൽമഞ്ഞ് രൂപപ്പെടാനും സാധ്യതയുണ്ട്.
താപനിലയിൽ മദീനയിൽ 47°C വരെയും ദമ്മാമിൽ 46°C വരെയും റിയാദിലും ബുറൈദയിലും 45°C വരെയും ഉയരുമെന്നാണ് പ്രവചനം. മക്കയിൽ 43°C, അരാറിലും സകാക്കയിലും 43°C, ഹായിലിൽ 42°C, തബൂക്കിലും നജ്റാനിലും 40°C, ജസാനിൽ 38°C, ജിദ്ദയിൽ 37°C, അബഹയിൽ 31°C, അൽ-ബഹയിൽ 28°C എന്നിങ്ങനെയാണ് പ്രതീക്ഷിക്കുന്ന ഉയർന്ന താപനില.
ജിദ്ദയിൽ മഴയ്ക്കും ശക്തമായ കാറ്റിനും പൊടിക്കാറ്റിനും സാധ്യതയുണ്ട്. അബഹയിൽ കനത്ത ഇടിമിന്നലോടുകൂടിയ മഴയും ശക്തമായ കാറ്റും മൂടൽമഞ്ഞും പ്രതീക്ഷിക്കുന്നു. ജസാൻ, നജ്റാൻ, ഹായിൽ എന്നിവിടങ്ങളിലും മഴയോടൊപ്പം ശക്തമായ കാറ്റിനും പൊടിപടലങ്ങൾക്കും സാധ്യതയുണ്ട്.
About the Author
