ഗാസയിൽ നടക്കുന്നത് അന്താരാഷ്ട്ര നിയമങ്ങളുടെ കടുത്ത ലംഘനം; കുട്ടികളുടെ സംരക്ഷണം ഉറപ്പാക്കാൻ അന്താരാഷ്ട്ര ഇടപെടൽ ആവശ്യപ്പെട്ട് സൗദി

ന്യൂയോർക്ക്: സായുധ സംഘർഷങ്ങളിൽ കുട്ടികളെ സംരക്ഷിക്കുന്നത് ഒരു കൂട്ടായ ഉത്തരവാദിത്തമാണെന്നും, സംഘർഷങ്ങളുടെ അനന്തരഫലങ്ങളും അവയുടെ മൂലകാരണങ്ങളും പരിഹരിക്കാൻ ഏകോപിപ്പിച്ചുള്ള അന്താരാഷ്ട്ര ശ്രമങ്ങൾ ആവശ്യമാണെന്നും സൗദി അറേബ്യ വീണ്ടും വ്യക്തമാക്കി.

കുട്ടികളും സായുധ സംഘർഷങ്ങളും എന്ന വിഷയത്തിൽ കഴിഞ്ഞ വ്യാഴാഴ്ച ചേർന്ന ഐക്യരാഷ്ട്രസഭാ സുരക്ഷാ കൗൺസിൽ യോഗത്തിലാണ് യുഎന്നിലെ സൗദിയുടെ സ്ഥിരം പ്രതിനിധി ഡോ. അബ്ദുൽ അസീസ് അൽവാസിൽ ഇക്കാര്യം പ്രസ്താവിച്ചത്.

കിംഗ് സൽമാൻ ഹ്യൂമാനിറ്റേറിയൻ എയ്ഡ് ആൻഡ് റിലീഫ് സെന്റർ (കെഎസ്റിലീഫ്) വഴി തൊണ്ണൂറിലധികം രാജ്യങ്ങളിൽ നടപ്പിലാക്കുന്ന മാനുഷിക-ദുരിതാശ്വാസ പദ്ധതികളിലൂടെ സിവിലിയന്മാരെ, പ്രത്യേകിച്ച് കുട്ടികളെ സംരക്ഷിക്കാനുള്ള ശ്രമങ്ങൾക്ക് പിന്തുണ നൽകാൻ സൗദി അറേബ്യ പ്രതിജ്ഞാബദ്ധമാണെന്ന് അൽവാസിൽ പറഞ്ഞു. വിവേചനമില്ലാതെ സംഘർഷങ്ങളും ദുരന്തങ്ങളും ബാധിച്ച ജനങ്ങൾക്ക് ഈ കേന്ദ്രം സഹായം നൽകുന്നുണ്ടെന്നും അദ്ദേഹം ചൂണ്ടിക്കാട്ടി.

ഗാസയിലെ നിലവിലെ സ്ഥിതിഗതികളെക്കുറിച്ച് പരാമർശിച്ച അൽവാസിൽ, അവിടെ നടക്കുന്ന സംഭവങ്ങൾ അന്താരാഷ്ട്ര മാനുഷിക നിയമങ്ങളുടെയും മാനവിക മൂല്യങ്ങളുടെയും കടുത്ത ലംഘനമാണെന്ന് പറഞ്ഞു. മാനുഷിക ദുരന്തത്തിന് അടിയന്തരമായി അറുതി വരുത്താനും, കുട്ടികൾക്ക് സംരക്ഷണം ഉറപ്പാക്കാനും, ഗുരുതരമായ നിയമലംഘനങ്ങൾക്ക് ഉത്തരവാദികളായവരെ നിയമത്തിന് മുന്നിൽ കൊണ്ടുവരാനും അടിയന്തര അന്താരാഷ്ട്ര ഇടപെടൽ അദ്ദേഹം ആവശ്യപ്പെട്ടു.

സായുധ സംഘർഷങ്ങൾ ബാധിച്ച ജനങ്ങളുടെ സുരക്ഷയും സ്ഥിരതയും പ്രോത്സാഹിപ്പിക്കുന്നതിനും കുട്ടികളെ സംരക്ഷിക്കുന്നതിനുമുള്ള ഐക്യരാഷ്ട്രസഭയുടെ ആത്മാർത്ഥമായ എല്ലാ ശ്രമങ്ങൾക്കും സൗദി അറേബ്യയുടെ പിന്തുണ അദ്ദേഹം ആവർത്തിച്ചു.

ഇസ്‌ലാമിക നിയമങ്ങളുടെ തത്വങ്ങളും മൂല്യങ്ങളും, മാനുഷിക സംരക്ഷണത്തോടുള്ള രാജ്യത്തിന്റെ ദീർഘകാല പ്രതിബദ്ധതയും പ്രതിഫലിപ്പിക്കുന്നതാണ് സംഘർഷ മേഖലകളിൽ കുട്ടികളുടെ അവകാശങ്ങൾ സംരക്ഷിക്കുന്നതിന് സൗദി അറേബ്യ നൽകുന്ന പ്രത്യേക പ്രാധാന്യമെന്നും അൽവാസിൽ കൂട്ടിച്ചേർത്തു.