ദോഹ: അടുത്ത മാസം ഖത്തറില്‍ ആരംഭിക്കുന്ന ഫിഫ ലോകകപ്പ് വേളയില്‍ യാത്രക്കായി സജ്ജമാക്കിയ 350 വേള്‍ഡ് കപ്പ് ബസ്സുകളില്‍ സൗജന്യ വൈഫൈ കണക്ഷനുമായി ലോകകപ്പിന്റെ ഔദ്യോഗിക മൊബൈല്‍ സേവന ദാതാക്കളായ ഊരിദു. കളിക്കാര്‍ക്കും ഫിഫ ഉദ്യോഗസ്ഥര്‍ക്കും ലോകത്തിന്റെ വിവിധ ഭാഗങ്ങളില്‍ നിന്നായി എത്തിച്ചേരുന്ന മാധ്യമ പ്രവര്‍ത്തകര്‍ക്കും ഹൈസ്പീഡ് ഇന്റര്‍നെറ്റ് ലഭ്യമാക്കുകയെന്ന ലക്ഷ്യത്തോടെയാണ് പദ്ധതി.
വാർത്തകൾ നേരിട്ട് വാട്ട്സാപ്പിൽ ഉടൻ ലഭിക്കാൻ ഇവിടെ ക്ലിക്ക് ചെയ്യുക
ഇവര്‍ താമസ ഇടങ്ങളില്‍ നിന്ന് ടൂര്‍ണമെന്റ് നടക്കുന്ന സ്റ്റേഡിയങ്ങളിലേക്കും മറ്റ് ഫാന്‍ വില്ലേജുകളിലേക്കും മറ്റും പോകുന്ന വഴിക്ക് ഇന്റര്‍നെറ്റിന്റെ ലഭ്യത ഉറപ്പുവരുത്താന്‍ ഇത് സഹായിക്കുമെന്ന് ഊരിദു അധികൃതര്‍ അറിയിച്ചു.
ഊരിദു ചീഫ് കൊമേഴ്‌സ്യല്‍ ഓഫീസര്‍ ശെയ്ഖ് നാസര്‍ ബിന്‍ ഹമദ് ബിന്‍ നാസര്‍ അല്‍ താനി, ലോകകപ്പ് സിഒഒ കോളിന്‍ സ്മിത്ത്, ലോകകപ്പിന്റെ പ്രാദേശിക സംഘാടകരായ സുപ്രീം കമ്മിറ്റി ഫോര്‍ ഡെലിവറി ആന്റ് ലെഗസി പ്രതിനിധികള്‍ തുടങ്ങിയവര്‍ വാര്‍ത്താസമ്മേളനത്തിലാണ് ഇക്കാര്യം അറിയിച്ചത്. ലോകകപ്പിന്റെ മിഡില്‍ ഈസ്റ്റ് ആന്റ് ആഫ്രിക്ക പ്രദശത്തേക്കുള്ള ഔദ്യോഗിക ടെലി കമ്മ്യൂണിക്കേഷന്‍സ് ഓപ്പറേറ്റര്‍ കൂടിയാണ് ഊരിദു. അതിവേഗ ഇന്റര്‍നെറ്റ് സേവനം ലഭ്യമാക്കുന്നതിന് ക്വിക് റെസ്‌പോണ്‍സ് കോഡുകള്‍ പോലുള്ള പുതിയ സാങ്കേതിക വിദ്യയുടെ സേവനം ഉപയോഗപ്പെടുത്തുന്നുണ്ടെന്ന് അധികൃതര്‍ അറിയിച്ചു. ഊരിദു ഖത്തര്‍ ഡാറ്റ സെന്ററിന്റെ നേതൃത്വത്തിലായിരിക്കും വൈഫൈ സേവനങ്ങള്‍ ലഭ്യമാക്കുക.
അതേപോലെ ലോകകപ്പ് ആസ്വദിക്കാന്‍ എത്തുന്ന ആരാധകര്‍ക്കും മികച്ച മൊബൈല്‍, ഇന്റര്‍നെറ്റ് സേവനങ്ങള്‍ ലഭ്യമാക്കുന്നതിനുള്ള എല്ലാ ഒരുക്കങ്ങളും പൂര്‍ത്തിയാക്കിയതായും അധികൃകര്‍ അറിയിച്ചു. ഖത്തറിലേക്ക് വരുന്ന സന്ദര്‍ശകര്‍ക്കായി ഹയ്യാ സിം കാര്‍ഡും നിലവിലെ ഉപഭോക്താക്കള്‍ക്ക് 2022 ഗിഫ്റ്റ് എന്ന പേരില്‍ ആകര്‍ഷകമായ ഓഫറുകളുമാണ് ഊരിദു ഒരുക്കിയിരിക്കുന്നത്. സന്ദര്‍ശകര്‍ക്ക് നവംബര്‍ ഒന്നു മുതല്‍ പുതിയ ഹയ്യാ സിം കാര്‍ഡുകള്‍ ലഭ്യമായിത്തുടങ്ങും. ഹയ്യാ സിം എടുക്കുന്നവര്‍ക്ക് 2022 പ്രാദേശിക മിനിറ്റുകള്‍, 2022 പ്രാദേശിക എസ്എംഎസ്, 2022 എംബി ഡാറ്റ എന്നിവയാണ് ഊരിദു വാഗ്ദാനം ചെയ്യുന്നത്. മൂന്ന് ദിവസമായിരിക്കും ഈ ഓഫറുകളുടെ വാലിഡിറ്റി. മൂന്ന് ദിവസത്തിനകം സിം കാര്‍ഡ് റീചാര്‍ജ്
ചെയ്താല്‍ ഈ ആനുകൂല്യങ്ങള്‍ തുടര്‍ന്നും ലഭ്യമാവും. നിലവില്‍ ഖത്തറില്‍ താമസിക്കുന്ന ഊരിദുവിന്റെ പ്രീപെയ്ഡ്, പോസ്റ്റ്പെയ്ഡ് ഉപഭോക്താക്കള്‍ക്കും 2022 ഗിഫ്റ്റ് എന്ന പേരില്‍ വ്യത്യസ്ത ആനുകൂല്യങ്ങള്‍ ലഭിക്കും.
എയര്‍പോര്‍ട്ടുകള്‍, തുറമുഖങ്ങള്‍, കര അതിര്‍ത്തികള്‍ എന്നിവിടങ്ങളില്‍ സിം കാര്‍ഡ് ലഭ്യമാകുന്ന നിരവധി ഡിസ്‌പെന്‍സിംഗ് മെഷീനുകള്‍ സ്ഥാപിച്ചിട്ടുണ്ട്. ഇതിനു പുറമെ, ടാക്‌സികള്‍, മെട്രോ സ്റ്റേഷനുകള്‍, ഹോട്ടലുകള്‍, ഫിഫ ഫാന്‍ അക്കമഡേഷനുകള്‍, ഫാന്‍ സോണുകള്‍, ഊരിദു ഷോപ്പുകള്‍, ഫ്രാഞ്ചൈസുകള്‍, ഡീലര്‍മാര്‍ തുടങ്ങി വിവിധ കേന്ദ്രങ്ങളില്‍ നിന്നും ഹയ്യാ സിം കാര്‍ഡ് സ്വന്തമാക്കാം. ഉരീദു ഇ ഷോപ്പിലൂടെ ഓണ്‍ലൈനായും സിം കാര്‍ഡ് ലഭിക്കുമെന്നും അദ്ദേഹം അറിയിച്ചു. ഫിസിക്കല്‍ സിം കാര്‍ഡായും ഇലക്ട്രോണിക് സിം അഥവാ ഇ-സിം ആയും ഇത് ലഭിക്കും. ഊരിദു ഇ സ്റ്റോറില്‍ നിന്നും ഹയ്യാ സിം സബ്സ്‌ക്രൈബ് ചെയ്യുന്ന സന്ദര്‍ശകര്‍ക്ക് ഖത്തറില്‍ എവിടെയും സിം കാര്‍ഡ് എത്തിച്ചു നല്‍കും. ഇ-സിം കാര്‍ഡ്
തെരഞ്ഞെടുക്കുന്നവര്‍ക്ക് അത് ഇമെയില്‍ വഴിയാണ് അയച്ചു തരിക. ഹയ്യാ സിം കാര്‍ഡ് ആക്ടിവേറ്റ് ചെയ്യാനും വളരെ എളുപ്പമാണ്. ഉപഭോക്താവ് ഈരിദു ഇ-സിം കാര്‍ഡ് നെറ്റ്വര്‍ക്കിലേക്ക് കണക്റ്റ് ചെയ്താല്‍ ഉടന്‍ തന്നെ അത് ആക്ടിവേറ്റാകും. ഫിസിക്കല്‍ കാര്‍ഡാണെങ്കില്‍ ഊരിദു ആപ്പ് വഴിയോ ഊരിദു ഇ-ഷോപ്പ് വഴിയോ ആണ് അവ അക്ടിവേറ്റാക്കേണ്ടത്.
