റിയാദ്: ഓഡിറ്റിങ്, അക്കൗണ്ടിങ് രംഗത്തെ പ്രവർത്തന മികവിൽ ജി20 രാജ്യങ്ങൾക്കിടയിൽ സൗദി അറേബ്യ ഒന്നാം സ്ഥാനത്തെത്തി. രാജ്യത്തെ ബിസിനസ് മേഖലയിലെ പ്രൊഫഷനൽ നിലവാരവും അക്കൗണ്ടിങ് രംഗത്തെ പുരോഗതിയുമാണ് നേട്ടത്തിന് പിന്നിലെന്ന് അധികൃതർ വ്യക്തമാക്കി.
സൗദി വിഷൻ 2030ന്റെ ഭാഗമായി കഴിഞ്ഞ പത്ത് വർഷത്തിനിടെ അക്കൗണ്ടിങ്, ഓഡിറ്റിങ് മേഖലയിൽ വലിയ മാറ്റങ്ങളാണ് നടപ്പാക്കിയത്. നിയമങ്ങൾ, പ്രൊഫഷനൽ മാനദണ്ഡങ്ങൾ, ജീവനക്കാരുടെ നൈപുണ്യ വികസനം, പ്രവർത്തനങ്ങളുടെ ഗുണനിലവാര പരിശോധന എന്നിവയിൽ പരിഷ്കാരങ്ങൾ കൊണ്ടുവന്നു.
ഓഡിറ്റിങ് ആൻഡ് അക്കൗണ്ടിങ് പ്രാക്ടീസസ് ഇൻഡക്സിൽ ആഗോളതലത്തിൽ സൗദി ഒൻപതാം സ്ഥാനത്തെത്തിയതായി സൗദി ഓർഗനൈസേഷൻ ഫോർ ചാർട്ടേഡ് ആൻഡ് പ്രൊഫഷനൽ അക്കൗണ്ടന്റ്സ് (SOCPA) ജൂണിൽ അറിയിച്ചിരുന്നു. ഇന്റർനാഷനൽ ഇൻസ്റ്റിറ്റ്യൂട്ട് ഫോർ മാനേജ്മെന്റ് ഡെവലപ്മെന്റ് (IMD) പുറത്തിറക്കിയ 2026ലെ വേൾഡ് കോംപറ്റിറ്റീവ്നസ് ഇയർബുക്കിന്റെ ഭാഗമായാണ് ഈ സൂചിക. ഡെൻമാർക്ക്, അയർലൻഡ്, തായ്‌വാൻ, ഓസ്ട്രിയ, ഐസ്‌ലൻഡ്, സ്വിറ്റ്സർലൻഡ്, സിംഗപ്പൂർ, ഹോങ്കോങ് എന്നിവയാണ് സൗദിക്ക് മുന്നിലുള്ളത്.
300ലധികം പരിഷ്കാരങ്ങൾ
അക്കൗണ്ടിങ് മേഖലയിലെ നിയമപരവും ഔദ്യോഗികവും പ്രൊഫഷനലുമായ വിവിധ രംഗങ്ങളിലായി 300ലധികം പരിഷ്കാരങ്ങൾ സൗദി നടപ്പാക്കിയിട്ടുണ്ട്. സാമ്പത്തിക ഇടപാടുകളുടെ സുരക്ഷയും കാര്യക്ഷമതയും വർധിപ്പിക്കാനും സാമ്പത്തിക റിപ്പോർട്ടുകളിലെ വിവരങ്ങൾ കൂടുതൽ സുതാര്യമാക്കാനും ഈ നടപടികൾ സഹായിച്ചു.
നല്ല ഓഡിറ്റിങ്, അക്കൗണ്ടിങ് രീതികൾ സാമ്പത്തിക റിപ്പോർട്ടുകളിലുള്ള വിശ്വാസം വർധിപ്പിക്കുമെന്ന് SOCPA സി.ഇ.ഒ ഡോ. അഹ്മദ് അൽ മിഘാമസ് പറഞ്ഞു. നിക്ഷേപകർക്ക് അവസരങ്ങൾ വിലയിരുത്താനും ധനകാര്യ സ്ഥാപനങ്ങൾക്ക് സാമ്പത്തിക അപകടസാധ്യതകൾ മനസ്സിലാക്കാനും കമ്പനികൾക്ക് തീരുമാനങ്ങളെടുക്കാനും ഇത്തരം റിപ്പോർട്ടുകൾ സഹായിക്കുന്നുണ്ടെന്നും അദ്ദേഹം വ്യക്തമാക്കി.
2026–2030 കാലയളവിലെ സംഘടനയുടെ തന്ത്രപരമായ പദ്ധതിയിലൂടെ അക്കൗണ്ടിങ് മേഖലയിലെ ഗുണനിലവാരം കൂടുതൽ ഉയർത്താനും നിയമങ്ങൾ പാലിക്കുന്നത് ഉറപ്പാക്കാനും സേവനങ്ങൾ മെച്ചപ്പെടുത്താനും ലക്ഷ്യമിടുന്നുണ്ട്. പ്രൊഫഷനിലേക്ക് കൂടുതൽ ആളുകളെ ആകർഷിക്കുന്നതിനും സൗദി അക്കൗണ്ടിങ് അംഗത്വത്തിന് അന്താരാഷ്ട്ര അംഗീകാരം വർധിപ്പിക്കുന്നതിനും നടപടികൾ സ്വീകരിക്കുമെന്നും അദ്ദേഹം കൂട്ടിച്ചേർത്തു.
About the Author
