സൗദി അറേബ്യയിലെ വിവിധ ഭാഗങ്ങളിൽ വരും ദിവസങ്ങളിൽ കനത്ത കാറ്റിനും മഴയ്ക്കും സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകിയിട്ടുണ്ട്. ശനിയാഴ്ച മുതൽ വരുന്ന ബുധനാഴ്ച വരെ മക്കയുടെ വിവിധ ഗവർണറേറ്റുകളിൽ മിതമായതോ ശക്തമായതോ ആയ മഴ പെയ്യുമെന്നാണ് പ്രവചനം. മക്ക സിറ്റി, അൽ-കാമിൽ, അൽ-ജമൂം, ബഹ്‌റ, തായിഫ്, മൈസാൻ, അദാം, അൽ-അർദിയാത്ത്, അൽ-ലൈത്ത്, അൽ-ഖുൻഫുദ തുടങ്ങിയ പ്രദേശങ്ങളെയാണ് ഈ കാലാവസ്ഥാ വ്യതിയാനം പ്രധാനമായും ബാധിക്കുക. ഇതിനുപുറമെ ജിദ്ദ, റാബിഗ്, ഖുലൈസ് എന്നീ പ്രദേശങ്ങളിലും ലഘുവായ മഴയ്ക്ക് സാധ്യതയുണ്ട്. ജനങ്ങളുടെ സുരക്ഷ മുൻനിർത്തി താഴ്വരകളിലും വെള്ളക്കെട്ടുകളിലും ഇറങ്ങരുതെന്നും സിവിൽ ഡിഫൻസ് കർശനമായ ജാഗ്രതാ നിർദ്ദേശം നൽകിയിട്ടുണ്ട്.
മദീന മേഖലയിലും ഞായറാഴ്ച മുതൽ ചൊവ്വാഴ്ച വരെ അൽ-മഹദ്, അൽ-ഹനാകിയ്യ, ഖൈബർ തുടങ്ങിയ സ്ഥലങ്ങളിൽ ലഘുവായതോ മിതമായതോ ആയ മഴ പ്രതീക്ഷിക്കാമെന്ന് കാലാവസ്ഥാ നിരീക്ഷണ കേന്ദ്രം വ്യക്തമാക്കിയിട്ടുണ്ട്. ഈ പ്രദേശങ്ങളിൽ കനത്ത കാറ്റിനും ആലിപ്പഴ വീഴ്ചയ്ക്കും ഇടിമിന്നലിനും പുറമെ മലവെള്ളപ്പാച്ചിലിനും സാധ്യതയുള്ളതിനാൽ കാഴ്ചപരിധി കുറയാൻ ഇടയുണ്ട്. ഇതുപോലെ ഹാഇൽ മേഖലയിലും ശക്തമായ കാറ്റും ആലിപ്പഴ വീഴ്ചയും ഇടിമിന്നലും അനുഭവപ്പെടുമെന്നും, തുറസ്സായ സ്ഥലങ്ങളിലും അതിവേഗ പാതകളിലും സഞ്ചരിക്കുന്നവർ അതീവ ജാഗ്രത പാലിക്കണമെന്നും അധികൃതർ ആവർത്തിച്ച് ഓർമ്മിപ്പിച്ചു.
About the Author
