ന്യൂയോർക്ക്: യെമനിലെ സംഘർഷം രൂക്ഷമാക്കുന്നതിന് ഹൂതി മിലീഷ്യ പൂർണ ഉത്തരവാദിയാണെന്ന് ബ്രിട്ടൻ. സൗദി അറേബ്യക്കെതിരായ തുടർച്ചയായ ആക്രമണങ്ങൾ, യെമനിലെ സൈനിക നടപടികളുടെ വ്യാപനം, അന്താരാഷ്ട്ര കപ്പൽ ഗതാഗതത്തിനും മേഖലയുടെ സുരക്ഷയ്ക്കുമുള്ള ഭീഷണി എന്നിവ ബ്രിട്ടൻ ശക്തമായി അപലപിച്ചു.
ചൊവ്വാഴ്ച യെമനെക്കുറിച്ച് ചേർന്ന യുഎൻ സുരക്ഷാ കൗൺസിൽ യോഗത്തിൽ യുഎന്നിലെ ബ്രിട്ടന്റെ ഡെപ്യൂട്ടി സ്ഥിരം പ്രതിനിധി അംബാസഡർ കേറ്റ് ഫോസ്റ്ററാണ് നിലപാട് വ്യക്തമാക്കിയത്. കഴിഞ്ഞ ദിവസം സൗദിക്കെതിരെ ഹൂതികൾ നടത്തിയ ആക്രമണത്തിൽ 13 സാധാരണക്കാർക്ക് പരിക്കേൽക്കുകയും വീടുകൾക്കും താമസ മേഖലകൾക്കും നാശനഷ്ടമുണ്ടാകുകയും വാണിജ്യ വിമാന സർവീസുകൾ തടസ്സപ്പെടുകയും ചെയ്തതായി അവർ പറഞ്ഞു.
സൗദി അറേബ്യയോടും യെമൻ സർക്കാരിനോടും ബ്രിട്ടന്റെ ഐക്യദാർഢ്യം ഫോസ്റ്റർ അറിയിച്ചു. അന്താരാഷ്ട്ര നിയമപ്രകാരം സ്വന്തം സുരക്ഷയും പരമാധികാരവും സംരക്ഷിക്കാൻ ഇരുരാജ്യങ്ങൾക്കും അവകാശമുണ്ടെന്നും അവർ വ്യക്തമാക്കി.
യെമനിലെ ചെങ്കടൽ തീരത്തും ബാബ് അൽ-മന്ദബ് കടലിടുക്കിന് ചുറ്റുമുള്ള പ്രദേശങ്ങളിലും നിയന്ത്രണം ശക്തിപ്പെടുത്താനാണ് ഹൂതികളുടെ ശ്രമമെന്ന് ഫോസ്റ്റർ ആരോപിച്ചു. ലോകത്തിലെ പ്രധാന കപ്പൽപാതകളിലൊന്നായ ഈ മേഖലയിലെ നീക്കങ്ങൾ ആഗോള സമ്പദ്വ്യവസ്ഥയ്ക്ക് നിർണായകമായ സ്വതന്ത്ര നാവിഗേഷന് നേരിട്ടുള്ള ഭീഷണിയാണെന്നും അവർ മുന്നറിയിപ്പ് നൽകി.
സംഘർഷം രൂക്ഷമായതിനെ തുടർന്ന് ഇതുവരെ 1.26 ലക്ഷത്തിലധികം പേർ ഭവനരഹിതരായതായി ഫോസ്റ്റർ പറഞ്ഞു. ഈ എണ്ണം ഇനിയും ഉയരാൻ സാധ്യതയുണ്ടെന്നും അവർ ചൂണ്ടിക്കാട്ടി. മാരിബിലെ സ്ഥിതിഗതികളെക്കുറിച്ചുള്ള മാനുഷിക ഏജൻസികളുടെ മുന്നറിയിപ്പുകളും ഭക്ഷ്യസുരക്ഷ, ആരോഗ്യം, സംരക്ഷണം എന്നിവയുമായി ബന്ധപ്പെട്ട് വർധിച്ചുവരുന്ന ആവശ്യങ്ങളും അവർ പരാമർശിച്ചു. സ്ത്രീകളും കുട്ടികളും കൂടുതൽ അപകടസാധ്യത നേരിടുന്നതായും വ്യക്തമാക്കി.
സാധാരണക്കാർ, അഭയാർഥികൾ, അടിസ്ഥാന സൗകര്യങ്ങൾ, സ്കൂളുകൾ, വീടുകൾ എന്നിവയ്ക്ക് നേരെയുള്ള ആക്രമണങ്ങൾ വർധിക്കുന്നതിലും മാനുഷിക സഹായങ്ങളുടെ വിതരണം തടസ്സപ്പെടുന്നതിലും ബ്രിട്ടൻ ആശങ്ക പ്രകടിപ്പിച്ചു. ഹൂതികൾ തടവിലാക്കിയ സഹായപ്രവർത്തകർ, യുഎൻ ജീവനക്കാർ, നയതന്ത്ര ഉദ്യോഗസ്ഥർ എന്നിവരെ ഉടൻ, ഉപാധികളില്ലാതെ മോചിപ്പിക്കണമെന്നും ഫോസ്റ്റർ ആവശ്യപ്പെട്ടു.
ഹൂതികൾക്ക് ഇറാന്റെ തുടർച്ചയായ പിന്തുണ സാധാരണക്കാർക്കും അയൽരാജ്യങ്ങൾക്കും സമുദ്രസുരക്ഷയ്ക്കും യെമനിലെ സമാധാന സാധ്യതകൾക്കും ഭീഷണിയാകുന്ന ആക്രമണങ്ങൾക്ക് വഴിയൊരുക്കുന്നതായി അവർ പറഞ്ഞു. യുഎൻ സുരക്ഷാ കൗൺസിലിന്റെ 2140, 2216 ഉൾപ്പെടെയുള്ള പ്രമേയങ്ങൾ പ്രകാരമുള്ള ബാധ്യതകൾ അംഗരാജ്യങ്ങൾ പാലിക്കണമെന്നും ഹൂതികൾക്ക് ആയുധങ്ങളും സൈനിക സഹായവും കൈമാറുന്നത് തടയണമെന്നും ബ്രിട്ടൻ ആവശ്യപ്പെട്ടു.
യുഎൻ നേതൃത്വത്തിലുള്ള സമാധാന പ്രക്രിയയ്ക്ക് പിന്തുണ തുടരുമെന്നും ഹൂതികൾ ആക്രമണം അവസാനിപ്പിച്ച് സംഘർഷം കുറയ്ക്കുകയും സമാധാനത്തിലേക്കുള്ള പാതയിലേക്ക് മടങ്ങുകയും വേണമെന്നും ബ്രിട്ടൻ വ്യക്തമാക്കി.
ബൾഗേറിയയും അപലപിച്ചു
അതേസമയം, സൗദി അറേബ്യക്കെതിരെ ഹൂതി മിലീഷ്യ നടത്തുന്ന തുടർച്ചയായ ആക്രമണങ്ങളെ ബൾഗേറിയ ശക്തമായി അപലപിച്ചു. സാധാരണക്കാർക്കും സിവിലിയൻ, സാമ്പത്തിക അടിസ്ഥാന സൗകര്യങ്ങൾക്കും നേരെയുള്ള ആക്രമണങ്ങളും ഇതിൽ ഉൾപ്പെടുന്നതായി ബൾഗേറിയൻ വിദേശകാര്യ മന്ത്രാലയം വ്യക്തമാക്കി.
ആക്രമണങ്ങൾ അംഗീകരിക്കാനാകാത്തതും മേഖലയുടെ സുരക്ഷയെയും യെമനിലെ സമാധാന ശ്രമങ്ങളെയും തകർക്കുന്ന അപകടകരമായ സംഘർഷവ്യാപനവുമാണെന്ന് മന്ത്രാലയം പറഞ്ഞു. ആക്രമണങ്ങൾ ഉടൻ അവസാനിപ്പിക്കണമെന്നും അന്താരാഷ്ട്ര നിയമം പാലിച്ച് സംഘർഷം കുറയ്ക്കണമെന്നും ബൾഗേറിയ ആവശ്യപ്പെട്ടു.
സൗദി അറേബ്യയോടുള്ള ഐക്യദാർഢ്യം അറിയിച്ച ബൾഗേറിയ, യെമനിൽ സമഗ്രവും എല്ലാവരെയും ഉൾക്കൊള്ളുന്നതുമായ ദീർഘകാല സമാധാനം കൈവരിക്കാനുള്ള ശ്രമങ്ങൾക്ക് പിന്തുണയും പ്രഖ്യാപിച്ചു.
About the Author
