കുവൈറ്റ് സിറ്റി: നിശ്ചിത മാനദണ്ഡങ്ങൾ പാലിക്കുന്ന വിദേശികൾക്ക് തങ്ങളുടെ എൻട്രി വിസിറ്റ് വിസകൾ സാധാരണ റസിഡൻസ് വിസകളാക്കി (ഇഖാമ) മാറ്റാൻ അനുമതി നൽകിക്കൊണ്ട് കുവൈറ്റ് ആഭ്യന്തര മന്ത്രാലയം ഞായറാഴ്ച ഉത്തരവിറക്കി. 150 കുവൈറ്റി ദിനാർ ഫീസ് അടച്ച് ഈ സേവനം പ്രയോജനപ്പെടുത്താം. എന്നാൽ ഗാർഹിക തൊഴിലാളികളെ ഈ ഫീസിൽ നിന്ന് ഒഴിവാക്കിയിട്ടുണ്ട്.
ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് ഫഹദ് അൽ യൂസഫ് അൽ സബാഹ് പുറപ്പെടുവിച്ച ഉത്തരവ് ഗസറ്റിൽ (Kuwait Al-Youm) പ്രസിദ്ധീകരിച്ചതോടെ ഉടനടി പ്രാബല്യത്തിൽ വന്നു.
റസിഡൻസി നിയമത്തിലെ ഉപചട്ടങ്ങൾ അനുസരിച്ച് 5 വിഭാഗത്തിൽപ്പെട്ട പ്രവാസികൾക്കാണ് 150 ദിനാർ ഫീസ് നൽകി വിസിറ്റ് വിസ റസിഡൻസ് വിസയാക്കി മാറ്റാൻ അനുമതിയുള്ളത്:
1. സർക്കാർ എൻട്രി വിസയിൽ എത്തുന്നവർ: വിവിധ മന്ത്രാലയങ്ങളോ പൊതു സ്ഥാപനങ്ങളോ അതോറിറ്റികളോ നൽകുന്ന എൻട്രി വിസയിൽ എത്തുന്നവർ. (യൂണിവേഴ്സിറ്റി ബിരുദധാരികൾക്കും സാങ്കേതിക വിദഗ്ദ്ധർക്കും മാത്രമാണ് ഈ ആനുകൂല്യം).
2. ആശ്രിതർ (Dependents): നിയമപരമായ റസിഡൻസ് വിസയുള്ള പ്രവാസികളുടെ ഫാമിലി വിസിറ്റ് വിസയിലോ ടൂറിസ്റ്റ് വിസയിലോ എത്തുന്ന ആശ്രിതർ.
3. ജോലി വിസയിലുള്ളവർ (Work Visas): ജോലി വിസയിൽ കുവൈറ്റിലെത്തി ഇഖാമ നടപടികൾ ആരംഭിച്ച ശേഷം അടിയന്തിര ആവശ്യങ്ങളാൽ രാജ്യം വിടുകയും ഒരു മാസത്തിനുള്ളിൽ തിരികെയെത്തുകയും ചെയ്ത പ്രവാസികൾ.
4. പ്രത്യേക അനുമതിയുള്ള കേസുകൾ: പട്ടികയിൽ ഉൾപ്പെടാത്തതും എന്നാൽ റസിഡൻസി വിഭാഗം ഡയറക്ടർ ജനറലിന്റെ പ്രത്യേക വിവേചനാധികാരത്തിൽ അനുവദിക്കുന്നതുമായ കേസുകൾ.
5. ഗാർഹിക തൊഴിലാളികൾ (Domestic Helpers): ഗാർഹിക തൊഴിലാളികൾക്കും സമാന തസ്തികയിലുള്ളവർക്കും വിസ മാറ്റത്തിന് അനുമതിയുണ്ട്. എന്നാൽ ഇവർ 150 ദിനാർ ഫീസ് അടക്കേണ്ടതില്ല.
About the Author
