കുവൈറ്റിൽ സോഷ്യൽ മീഡിയ പരസ്യങ്ങൾക്ക് കർശന നിയന്ത്രണം; ഇൻഫ്ലുവൻസർമാർക്ക് അഞ്ച് വർഷം രേഖകൾ സൂക്ഷിക്കൽ നിർബന്ധം❕

കുവൈത്ത് സിറ്റി – കുവൈത്തിൽ ഓൺലൈൻ പരസ്യങ്ങൾക്കും വിൽപ്പനക്കും വാണിജ്യ, വ്യവസായ മന്ത്രാലയ ലൈസൻസ് നിർബന്ധമാക്കി. നിയമലംഘകർക്ക് ജയിൽ ശിക്ഷയും 1,000 കുവൈത്തി ദീനാർ മുതൽ 10,000 കുവൈത്തി ദീനാർ വരെ പിഴയും ലഭിക്കും. ഡിജിറ്റൽ വാണിജ്യ മേഖലാ പ്രവർത്തനങ്ങൾ നിയന്ത്രിക്കുന്ന അമീരി ഉത്തരവ് പ്രകാരം, വാണിജ്യ, വ്യവസായ മന്ത്രാലയത്തിൻ്റെ ലൈസൻസ് നേടാതെ സോഷ്യൽ മീഡിയ പ്ലാറ്റ്ഫോമുകളിലൂടെയോ വാങ്ങൽ-വിൽക്കൽ ആപ്ലിക്കേഷനുകളിലൂടെയോ ഉൽപ്പന്നങ്ങൾ, സാധനങ്ങൾ, സേവനങ്ങൾ എന്നിവ പരസ്യപ്പെടുത്തുന്നതും പ്രമോട്ട് ചെയ്യുന്നതും ഇനി അനുവദിക്കില്ല. നവീകരണം, ഉപഭോക്തൃ സംരക്ഷണം, വാണിജ്യ ഇടപാടുകളിലെ സുതാര്യത എന്നിവ സന്തുലിതമാക്കുന്നതിനൊപ്പം ആഗോള ഡിജിറ്റൽ പരിവർത്തനത്തിനൊപ്പം മുന്നേറാനാണ് ഈ നീക്കത്തിലൂടെ ലക്ഷ്യമിടുന്നത്. ഔദ്യോഗിക ഗസറ്റിൽ പ്രസിദ്ധീകരിച്ച് ആറ് മാസത്തിന് ശേഷം നിയമം പ്രാബല്യത്തിൽ വരും. ഈ കാലയളവിനുശേഷം, വ്യക്തികളോ കമ്പനികളോ ആയാലും, കുവൈത്തള്ളിൽ ഏതെങ്കിലും ഡിജിറ്റൽ വാണിജ്യ പ്രവർത്തനം നടത്തുന്നതിന് വാണിജ്യ മന്ത്രാലയത്തിൽ നിന്ന് ലൈസൻസ് നേടൽ നിർബന്ധമാകും. പരസ്യങ്ങളിൽ ഉൽപ്പന്നത്തിന്റെയോ സേവന ദാതാവിന്റെയോ ഐഡൻ്റിറ്റി, വിലനിർണ്ണയം, സ്പെസിഫിക്കേഷനുകൾ, കോൺടാക്റ്റ് വിശദാംശങ്ങൾ എന്നിവ വ്യക്തമായി വെളിപ്പെടുത്തണം. തെറ്റിദ്ധരിപ്പിക്കുന്നതോ തെറ്റായതോ ആയ പ്രമോഷണൽ ഉള്ളടക്കം കർശനമായി നിരോധിച്ചിരിക്കുന്നു.

ആധുനിക സാങ്കേതിക പരിഹാരങ്ങൾ വഴിയോ രാജ്യത്തിനകത്തോ പുറത്തോ ലൈസൻസുള്ള സ്ഥാപനങ്ങൾ വഴിയോ സംഭരണം, ഷിപ്പിംഗ്, ഗതാഗതം, നേരിട്ടുള്ള ഡെലിവറി തുടങ്ങിയ ലോജിസ്റ്റിക്സ് സേവനങ്ങൾ നൽകാൻ സേവന ദാതാക്കളെ അമീരി ഉത്തരവ് അനുവദിക്കുന്നു. ഇലക്ട്രോണിക് കരാർ നിബന്ധനകൾക്കുള്ളിൽ മുൻകൂട്ടി വ്യക്തമായി പറഞ്ഞിട്ടില്ലെങ്കിൽ ഉപഭോക്താക്കളിൽ നിന്ന് അധിക നിരക്കുകൾ ഈടാക്കാൻ പാടില്ല.

ഇൻഫ്ളുവൻസർമാർ പ്രമോഷണൽ കാമ്പെയ്നു‌കളിൽ ഉൾപ്പെടുമ്പോൾ, സേവന ദാതാക്കൾ ബന്ധപ്പെട്ട എല്ലാ ഡാറ്റയും കരാറുകളും രേഖകളും കുറഞ്ഞത് അഞ്ച് വർഷത്തേക്ക് സൂക്ഷിക്കുകയും മന്ത്രാലയം ആവശ്യപ്പെടുന്ന പക്ഷം അവ സമർപ്പിക്കുകയും വേണം. ഇൻഫ്ളുവൻസർമാർക്കുള്ള പേയ്മെൻ്റുകൾ കുവൈത്ത് സെൻട്രൽ ബാങ്ക് പുറപ്പെടുവിച്ച പണംവെളുപ്പിക്കൽ വിരുദ്ധ ചട്ടങ്ങളും നിർദേശങ്ങളും പാലിക്കുന്ന വിശ്വസനീയമായ രീതികളിലൂടെ നടത്തണം. വഞ്ചനാപരമോ തെറ്റിദ്ധരിപ്പിക്കുന്നതോ ആയ ഏതെങ്കിലും പ്രമോഷണൽ രീതികൾ നിരോധിച്ചിരിക്കുന്നു. നിയമ ലംഘനങ്ങളുടെ ഉത്തരവാദിത്തം നിയമപരമായ സ്ഥാപനത്തിന്റെ യഥാർഥ മാനേജർക്കാണ്. നടപടിക്രമപരമായ വഴക്കം വർധിപ്പിക്കാനും ജുഡീഷ്യൽ ബാധ്യതകൾ കുറക്കാനും ചില കുറ്റകൃത്യങ്ങളിൽ അനുരഞ്ജന നടപടിക്രമങ്ങളും അമീരി ഉത്തരവ് അനുവദിക്കുന്നു.

ആർട്ടിക്കിൾ 39 പ്രകാരം, നിയമ ലംഘകർക്ക് ഒരു വർഷം വരെ തടവും 1,000 കുവൈത്തി ദീനാർ മുതൽ 10,000 കുവൈത്തി ദീനാർ വരെ പിഴയും ലഭിക്കും. തെറ്റായ വിവരങ്ങൾ സമർപ്പിക്കൽ, വ്യാജ രേഖകൾ നൽകൽ, നിയമവിരുദ്ധമായ ഉൽപ്പന്നങ്ങളോ സേവനങ്ങളോ വാഗ്‌ദാനം ചെയ്യൽ, പൊതുക്രമമോ ആരോഗ്യ നിയന്ത്രണങ്ങളോ ലംഘിക്കൽ, തർക്ക പരിഹാര സമിതിയുടെ തീരുമാനങ്ങൾ പാലിക്കാൻ വിസമ്മതിക്കൽ എന്നിവ നിയമ ലംഘനങ്ങളിൽ ഉൾപ്പെടുന്നു. കുറ്റകൃത്യങ്ങൾ ആവർത്തിച്ചാൽ പിഴകൾ ഇരട്ടിയാക്കുകയും നിയമ ലംഘനങ്ങളുമായി ബന്ധപ്പെട്ട ഉപകരണങ്ങളും ഫണ്ടുകളും കണ്ടുകെട്ടുകയും കുറ്റകരമായ ബിസിനസ്സ് അടച്ചുപൂട്ടുകയും ചെയ്യും.

ഡിജിറ്റൽ വാണിജ്യ മേഖലയെ നിയന്ത്രിക്കുകയും മേൽനോട്ടം വഹിക്കുകയും ചെയ്യുക, ഇലക്ട്രോണിക് ലേലങ്ങൾക്കും ഇടനില പ്ലാറ്റ്ഫോമുകൾക്കും നിയമങ്ങൾ പുറപ്പെടുവിക്കുക, പിഴകൾ നിർണയിക്കുക എന്നിവ വാണിജ്യ മന്ത്രാലയത്തിൻ്റെ ചുമതലകളാണ്. സേവന ദാതാക്കൾ ബിസിനസ്സ് വിലാസം നിലനിർത്തുക, വാണിജ്യ രജിസ്ട്രേഷൻ വിശദാംശങ്ങളും ബന്ധപ്പെടാനുള്ള വിവരങ്ങളും വെളിപ്പെടുത്തുക, ഉൽപ്പന്ന വിവരണങ്ങൾ, അന്തിമ വിലനിർണ്ണയം, പേയ്മെൻ്റ് രീതികൾ, ഓഫർ ദൈർഘ്യം, റിട്ടേൺ നയങ്ങൾ എന്നിവയുൾപ്പെടെയുള്ള കരാർ നിബന്ധനകൾ വ്യക്തമായി അവതരിപ്പിക്കുക എന്നിവയും ഉത്തരവ് ആവശ്യപ്പെടുന്നു. പ്രത്യേക സാഹചര്യങ്ങളിലൊഴികെ, ഉൽപ്പന്നം അതിൻ്റെ യഥാർഥ അവസ്ഥയിൽ തുടരുകയാണെങ്കിൽ ഉൽപ്പന്നം ലഭിച്ച് 14 ദിവസത്തിനുള്ളിൽ കരാറുകളിൽ നിന്ന് പിന്മാറാനോ, അധിക ചെലവില്ലാതെ അത് തിരികെ നൽകാനോ, മാറ്റിവാങ്ങാനോ ഉപഭോക്താക്കൾക്ക് അവകാശമുണ്ട്. നിയമ ലംഘനങ്ങൾ നിരീക്ഷിക്കുന്നതിന് ചില മന്ത്രാലയ ജീവനക്കാർക്ക് ജുഡീഷ്യൽ എൻഫോഴ്സസ്മെൻ്റ് അധികാരം നൽകും.

ഡിജിറ്റൽ സമ്പദ്വ്യവസ്ഥയെ നിയന്ത്രിക്കാനും ഇലക്ട്രോണിക് ഇടപാടുകളിൽ ആത്മവിശ്വാസം ശക്തിപ്പെടുത്താനും ഉപഭോക്തൃ അവകാശങ്ങൾ സംരക്ഷിക്കാനും കുവൈത്തിൽ കൂടുതൽ സുതാര്യവും അച്ചടക്കമുള്ളതുമായ ഡിജിറ്റൽ വിപണി സൃഷ്ടിക്കാനുമുള്ള വിശാലമായ സർക്കാർ തന്ത്രത്തിൻ്റെ ഭാഗമാണ് ഈ ഉത്തരവ്. ദേശീയ സൈബർ സുരക്ഷാ മാനദണ്ഡങ്ങൾ പാലിക്കൽ, പതിവ് ഡാറ്റ സംരക്ഷണ അപ്ഡേറ്റുകൾ, സെൻട്രൽ ബാങ്ക് ലൈസൻസുള്ള സ്ഥാപനങ്ങളിൽ മാത്രമായി ഇലക്ട്രോണിക് പേയ്മെന്റ് പ്രോസസ്സിംഗ് പരിമിതപ്പെടുത്തൽ എന്നിവയും അമീരി ഉത്തരവ് ആവശ്യപ്പെടുന്നു. മുൻകൂർ അനുമതിയില്ലാതെ അധിക പേയ്മെൻ്റ് ഫീസ് ഉത്തരവ് നിരോധിക്കുന്നു. നിയമത്തിന് വിധേയമായ ബിസിനസുകൾ, ലൈസൻസിംഗ് നടപടിക്രമങ്ങൾ, ഡിജിറ്റൽ വാണിജ്യത്തിലെ പരസ്യ മാനദണ്ഡങ്ങൾ, ബാധകമായ ഫീസ്, പിഴകൾ എന്നിവയെ കുറിച്ചുള്ള നിരവധി ചോദ്യങ്ങൾ ഉയർന്നതിനൊപ്പം, പുതിയ ഉത്തരവ് സോഷ്യൽ മീഡിയ പ്ലാറ്റ്ഫോമുകളിൽ വ്യാപകമായ ചർച്ചക്ക് കാരണമായി.