ദുബായ്: ദുബായിലെ കൊടും ചൂടിൽ ഡെലിവറി സാധനങ്ങളുമായി ബൈക്കുകളിൽ സഞ്ചരിക്കുന്ന റൈഡർ മാർക്ക് ഇനി ശീതീകരിച്ച ഷെൽട്ടറുകളിൽ വിശ്രമിക്കാം. ദുബായ് റോഡ്സ് ആന്‍ഡ് ട്രാന്‍സ്പോര്‍ട്ട് അതോറിറ്റി (ആര്‍ടിഎ) ഡെലിവറി റൈഡർമാർക്കായി എമിറേറ്റിലുടനീളം ആസൂത്രണം ചെയ്ത 40 എയര്‍കണ്ടീഷന്‍ ചെയ്ത വഴിയോര വിശ്രമകേന്ദ്രങ്ങളില്‍ 20 എണ്ണം പൂര്‍ത്തിയാക്കിയതോടെയാണിത്.
ഡെലിവറി കമ്പനികളുടെ പ്രവര്‍ത്തന വിവരങ്ങളുടെ വിശകലനത്തിലൂടെയും ഡെലിവറി സേവനങ്ങള്‍ക്കായി ഏറ്റവും കൂടുതല്‍ ഡിമാന്‍ഡുള്ള പ്രദേശങ്ങള്‍ പഠിച്ചുമാണ് വിശ്രമകേന്ദ്രങ്ങള്‍ക്കുള്ള സ്ഥലങ്ങള്‍ തിരഞ്ഞെടുത്തതെന്ന് ആര്‍ടിഎ ഡയറക്ടര്‍ ജനറല്‍ മത്താർ അല്‍ തായര്‍ പറഞ്ഞു. കൂടുതൽ പേർക്ക് പദ്ധതിയുടെ ആനുകൂല്യം ലഭ്യമാക്കുക എന്ന ലക്ഷ്യത്തോടെയാണിത്.
ഹെസ്സ സ്ട്രീറ്റ്, അല്‍ ബര്‍ഷ ഹൈറ്റ്‌സ്, അല്‍ ബര്‍ഷ, അല്‍ കരാമ, റിഗ്ഗത്ത് അല്‍ ബുതീന്‍, ഉമ്മു സുഖീം (ജുമൈറ 3), ജുമൈറ (അല്‍ വാസല്‍ റോഡ്), ദി ഗ്രീന്‍സ്, ദുബായ് വേള്‍ഡ് ട്രേഡ് സെന്റര്‍, അല്‍ റാഷിദിയ്യ, അല്‍ സത്വ, നാദ് അല്‍ ഹമര്‍, അല്‍ നഹ്ദ, ഔദ് മേത്ത, അറേബ്യന്‍ റാഞ്ചസ്, ഇന്റര്‍നാഷണല്‍ സിറ്റി, ബിസിനസ് ബേ, ദുബായ് മറീന, അല്‍ ജദ്ദാഫ്, മിര്‍ദിഫ്, ലാസ്റ്റ് എക്‌സിറ്റ് അല്‍ ഖവാനീജ്, ദുബായ് മോട്ടോര്‍ സിറ്റി, അല്‍ ഗര്‍ഹൂദ് എന്നിവിടങ്ങളിലാണ് റൈഡർമാർക്ക് വിശ്രമ കേന്ദ്രങ്ങൾ ഒരുക്കിയിരിക്കുന്നത്. കൊടുംചൂടിൽ ബൈക്കുകൾ ഓടിക്കുന്ന ആയിരക്കണക്കിന് പ്രവാസികൾക്ക് ഇത് ഏറെ ആശ്വാസകരമാവും.
കാഴ്ചയെ തടസ്സപ്പെടുത്താതെ മതിയായ ഇന്‍സുലേഷന്‍ ഉറപ്പാക്കിക്കൊണ്ട് സൂര്യപ്രകാശത്തിന്റെ ആഘാതം കുറയ്ക്കുന്നതിന് ശ്രദ്ധാപൂര്‍വ്വം ആസൂത്രണം ചെയ്താണ് കേന്ദ്രങ്ങളുടെ ഘടന രൂപകൽപന ചെയ്തിരിക്കുന്നത്. ഓരോ വിശ്രമ കേന്ദ്രത്തിലും ഡ്രൈവര്‍മാര്‍ക്ക് വിശ്രമിക്കാന്‍ എയര്‍കണ്ടീഷന്‍ ചെയ്ത ഇടം, ലഘുഭക്ഷണ വെന്‍ഡിംഗ് മെഷീനുകള്‍, വാട്ടര്‍ ഡിസ്‌പെന്‍സര്‍, മൊബൈല്‍ ഫോണ്‍ ചാര്‍ജിംഗ് സ്റ്റേഷന്‍ എന്നിവ സജ്ജീകരിച്ചിരിക്കുന്നു. ഓരോ കേന്ദ്രത്തിലും നിര്‍ദ്ദിഷ്ട സ്ഥലത്തെ ആശ്രയിച്ച് 10 പേരെ വരെ ഉള്‍ക്കൊള്ളാന്‍ കഴിയും.
സുരക്ഷ മെച്ചപ്പെടുത്തുക, ട്രാഫിക് നിയമങ്ങളും ചട്ടങ്ങളും പാലിക്കുന്നത് പ്രോത്സാഹിപ്പിക്കുക, ഉപഭോക്താക്കള്‍ക്ക് കമ്പനികള്‍ നല്‍കുന്ന സേവനങ്ങളുടെ ഗുണനിലവാരം ഉയര്‍ത്തുക എന്നിവയാണ് പദ്ധതിയുടെ ലക്ഷ്യങ്ങള്‍. അതുവഴി റൈഡർമാരുടെ മൊത്തത്തിലുള്ള സന്തോഷ റേറ്റിംഗ് വര്‍ദ്ധിപ്പിക്കുകയും ട്രാഫിക് നിയമങ്ങളും ചട്ടങ്ങളും പാലിക്കാന്‍ അവരെ പ്രോത്സാഹിപ്പിക്കുകയും ചെയ്യുന്നു. ഡെലിവറി ഡ്രൈവര്‍മാര്‍ക്ക് സുരക്ഷിതവും സൗകര്യപ്രദവുമായ അന്തരീക്ഷം നല്‍കാന്‍ ആര്‍ടിഎ പ്രതിജ്ഞാബദ്ധമാണെന്ന് അല്‍ തായര്‍ പറഞ്ഞു.
സമീപ വര്‍ഷങ്ങളിൽ ദുബായിലെ ഡെലിവറി മേഖലയിലുണ്ടായ ഗണ്യമായ വളര്‍ച്ചയുടെ പശ്ചാത്തലത്തിലാണ് റൈഡർമാർക്കായി പുതിയ സൗകര്യങ്ങൾ ഏർപ്പെടുത്തിയിരിക്കുന്നത്. കഴിഞ്ഞ ജൂണ്‍ അവസാനത്തോടെ, ദുബായില്‍ മോട്ടോര്‍ സൈക്കിളുകള്‍ വഴി ഡെലിവറി സേവനങ്ങള്‍ നല്‍കുന്ന കമ്പനികളുടെ എണ്ണം 2,535 ആയി ഉയര്‍ന്നു. മൊത്തം 40,088 ഡെലിവറി ബൈക്കുകള്‍ ദുബായിൽ പ്രവര്‍ത്തിക്കുന്നുണ്ടെന്നാണ് കണക്കുകൾ.
