റിയാദ്: ബഹ്റൈനുനേരെ ഇറാൻ നടത്തിയ വ്യോമാക്രമണങ്ങളെ സൗദി അറേബ്യ ശക്തമായി അപലപിച്ചു. ബഹ്റൈന്റെ സുരക്ഷയും സ്ഥിരതയും സംരക്ഷിക്കുന്നതിനായി സ്വീകരിക്കുന്ന എല്ലാ നടപടികൾക്കും പൂർണ പിന്തുണയും ഐക്യദാർഢ്യവും പ്രഖ്യാപിച്ചു.
നവംബർ 15 ഞായറാഴ്ച സൗദി വിദേശകാര്യ മന്ത്രാലയം പുറത്തിറക്കിയ ഔദ്യോഗിക പ്രസ്താവനയിലൂടെയാണ് ഇറാന്റെ ആക്രമണങ്ങൾക്കെതിരെ ശക്തമായ പ്രതിഷേധം അറിയിച്ചത്.
ബഹ്റൈനിലെ അമേരിക്കൻ സൈനിക താവളത്തിലുള്ള റഡാർ സംവിധാനം ലക്ഷ്യമിട്ട് ആറ് ഡ്രോണുകൾ ഉപയോഗിച്ച് ആക്രമണം നടത്തിയതായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) അവകാശപ്പെട്ടതിന് പിന്നാലെയാണ് സൗദിയുടെ പ്രതികരണം.
അതേസമയം, ഇറാന്റെ വ്യോമാക്രമണശ്രമങ്ങൾ വ്യോമപ്രതിരോധ സംവിധാനങ്ങൾ ഉപയോഗിച്ച് തടഞ്ഞതായി ബഹ്റൈൻ പ്രതിരോധ സേന അറിയിച്ചു.
ഇറാന്റെ ആക്രമണങ്ങൾ അന്താരാഷ്ട്ര നിയമങ്ങളുടെയും അയൽരാജ്യങ്ങൾ തമ്മിലുള്ള സൗഹൃദപരമായ സഹവർത്തിത്വത്തിന്റെയും അടിസ്ഥാന തത്വങ്ങളുടെ ലംഘനമാണെന്ന് സൗദി വിദേശകാര്യ മന്ത്രാലയം വ്യക്തമാക്കി.
മേഖലയിലെ രാജ്യങ്ങൾക്കെതിരായ ഇറാന്റെ ആക്രമണങ്ങൾ ഉടൻ അവസാനിപ്പിക്കേണ്ടത് അനിവാര്യമാണെന്നും ഇത്തരം നടപടികൾ പ്രാദേശിക സുരക്ഷയ്ക്കും സ്ഥിരതയ്ക്കും ഭീഷണിയാണെന്നും സൗദി അറേബ്യ ചൂണ്ടിക്കാട്ടി.
ബഹ്റൈന്റെ പരമാധികാരവും സുരക്ഷയും സംരക്ഷിക്കുന്നതിനുള്ള നടപടികളിൽ സൗദി അറേബ്യ ബഹ്റൈനൊപ്പം ഉറച്ചുനിൽക്കുമെന്നും മന്ത്രാലയം ആവർത്തിച്ചു.
മേഖലയിലെ രാജ്യങ്ങൾക്കും ജനങ്ങൾക്കും സുരക്ഷയും സമാധാനവും സ്ഥിരതയും ഉറപ്പാക്കുന്നതിനായി ഗൗരവമായ നടപടികൾ സ്വീകരിക്കണമെന്നും സൗദി വിദേശകാര്യ മന്ത്രാലയം ആവശ്യപ്പെട്ടു.
