ടെഹ്റാൻ: ആണവനിലയങ്ങൾക്ക് നേരെ അമേരിക്കൻ സൈനിക ആക്രമണത്തിന് സാധ്യതയുണ്ടെന്ന ഭീതി ശക്തമായതോടെ, ആണവ ദുരന്ത സാധ്യതകൾ നേരിടാനും അണുവികിരണങ്ങളിൽ (Nuclear Radiation) നിന്ന് ജനങ്ങളെ സംരക്ഷിക്കാനുമുള്ള അടിയന്തര മുൻകരുതലുകളുമായി ഇറാൻ. രാജ്യത്തെ സുപ്രധാന ആണവനിലയങ്ങൾക്ക് സമീപം താമസിക്കുന്ന പൗരന്മാർക്ക് ഇറാനിയൻ അധികൃതർ ‘അയോഡിൻ ഗുളികകൾ’ (Iodine Tablets) വിതരണം ചെയ്തു തുടങ്ങിയതായി ബ്രിട്ടീഷ് മാധ്യമമായ ‘ദി ടൈംസ്’ (The Times) റിപ്പോർട്ട് ചെയ്തു.
ആണവനിലയങ്ങളുടെ രണ്ട് മുതൽ മൂന്ന് കിലോമീറ്റർ വരെയുള്ള ചുറ്റളവിൽ താമസിക്കുന്ന ജനങ്ങൾക്കാണ് പ്രാഥമിക ഘട്ടത്തിൽ ഈ ഗുളികകൾ വിതരണം ചെയ്യുന്നത്. ടെഹ്റാനിലെ അതീവ സുരക്ഷിതമായ ‘ജബൽ അൽ ഫഅസ്’ (Jabal Al-Fas) ഉൾപ്പെടെയുള്ള ആണവ കേന്ദ്രങ്ങൾക്ക് നേരെ അമേരിക്കയുടെ ഭാഗത്തുനിന്ന് ഗുരുതരമായ ആക്രമണമുണ്ടാകാൻ സാധ്യതയുണ്ടെന്നാണ് ഇറാനിയൻ ഉദ്യോഗസ്ഥരുടെ വിലയിരുത്തൽ. യു.എസ് ആണവാക്രമണ ഭീഷണിയെ അതീവ ഗൗരവത്തോടെയാണ് രാജ്യം കാണുന്നത് എന്ന് വിവരങ്ങൾ വ്യക്തമാക്കുന്നു.
ആണവ ചോർച്ചയോ ആക്രമണമോ ഉണ്ടാകുമ്പോൾ പുറത്തുവരുന്ന റേഡിയോ ആക്ടീവ് അയോഡിനെ മനുഷ്യശരീരത്തിലെ തൈറോയ്ഡ് ഗ്രന്ഥി ആഗിരണം ചെയ്യുന്നത് തടയാനാണ് അയോഡിൻ ഗുളികകൾ ഉപയോഗിക്കുന്നത്. റേഡിയോ ആക്ടീവല്ലാത്ത അയോഡിൻ ശരീരത്തിലെത്തിക്കുന്നതിലൂടെ തൈറോയ്ഡ് ഗ്രന്ഥിയെ സംരക്ഷിക്കാനും അണുവികിരണം മൂലമുണ്ടാകുന്ന അർബുദം (Thyroid Cancer) ഉൾപ്പെടെയുള്ള മാരക രോഗങ്ങളുടെ സാധ്യത കുറയ്ക്കാനും ഇതിലൂടെ സാധിക്കുമെന്ന് വൈദ്യശാസ്ത്രരംഗം വ്യക്തമാക്കുന്നു.
About the Author
