റിയാദ്: സൗദി അറേബ്യയുടെ വിവിധ മേഖലകളെ ലക്ഷ്യമിട്ട് ഹൂതി സായുധസംഘം വിക്ഷേപിച്ച രണ്ട് മിസൈലുകളും മൂന്ന് ഡ്രോണുകളും വ്യോമപ്രതിരോധ സേന വിജയകരമായി തടഞ്ഞ് തകർത്തതായി യെമനിലെ നിയമാനുസൃത സർക്കാരിനെ പിന്തുണയ്ക്കുന്ന സഖ്യസേന അറിയിച്ചു.
വെള്ളി, ശനി ദിവസങ്ങളിലായാണ് ആക്രമണശ്രമങ്ങൾ ഉണ്ടായത്. സൗദിയുടെ പടിഞ്ഞാറൻ മേഖലയെ ലക്ഷ്യമിട്ട ക്രൂസ് മിസൈലും തെക്കൻ മേഖലയെ ലക്ഷ്യമിട്ട ബാലിസ്റ്റിക് മിസൈലും തകർത്തതായി സഖ്യസേന വക്താവ് മേജർ ജനറൽ തുർക്കി അൽ മാലിക്കി വ്യക്തമാക്കി.
റിയാദ്, മക്ക, മദീന എന്നിവിടങ്ങളെ ലക്ഷ്യമിട്ട് വിക്ഷേപിച്ച മൂന്ന് ഡ്രോണുകളും വ്യോമപ്രതിരോധ സേന തടഞ്ഞ് നശിപ്പിച്ചു.
വ്യാഴാഴ്ചയും റിയാദിനെ ലക്ഷ്യമിട്ട രണ്ട് ബാലിസ്റ്റിക് മിസൈലുകളും കിഴക്കൻ പ്രവിശ്യയെ ലക്ഷ്യമിട്ട മറ്റൊരു ബാലിസ്റ്റിക് മിസൈലും സൗദി വ്യോമപ്രതിരോധ സേന തകർത്തിരുന്നു.
അതേസമയം, സുരക്ഷാ മുന്നറിയിപ്പുകൾ ലഭിക്കുന്ന സമയങ്ങളിൽ ജനങ്ങൾ അധികൃതരുടെ നിർദേശങ്ങൾ കർശനമായി പാലിക്കണമെന്ന് സൗദി സിവിൽ ഡിഫൻസ് ആവശ്യപ്പെട്ടു. തുറസ്സായ സ്ഥലങ്ങൾ, ഗ്ലാസ് ജനലുകൾ, ബാൽക്കണികൾ, കെട്ടിടങ്ങളുടെ മേൽക്കൂരകൾ എന്നിവിടങ്ങളിൽ നിന്ന് വിട്ടുനിൽക്കണമെന്നും അധികൃതർ നിർദേശിച്ചു.
About the Author
