റിയാദ്: സൗദി അറേബ്യയിൽ റെയിൽവേ യാത്രക്കാരുടെ എണ്ണം 2025ൽ 266.5 ശതമാനം വർധിച്ച് ഏകദേശം 15.64 കോടിയിലെത്തി. 2024ൽ ഇത് 4.27 കോടിയായിരുന്നു. ജനറൽ അതോറിറ്റി ഫോർ സ്റ്റാറ്റിസ്റ്റിക്സ് (ഗാസ്റ്റാറ്റ്) പുറത്തുവിട്ട 2025ലെ റെയിൽ ഗതാഗത കണക്കുകളിലാണ് ഇക്കാര്യം വ്യക്തമാക്കുന്നത്.
നഗരങ്ങൾക്കുള്ളിലെ റെയിൽ യാത്രക്കാരുടെ എണ്ണത്തിലാണ് വൻ വർധന. 2024ലെ 3.11 കോടിയിൽനിന്ന് 368 ശതമാനം ഉയർന്ന് 14.54 കോടിയായി. എന്നാൽ നഗരങ്ങൾക്കിടയിലെ റെയിൽ യാത്രക്കാരുടെ എണ്ണം 5.6 ശതമാനം കുറഞ്ഞ് 1.16 കോടിയിൽനിന്ന് 1.09 കോടിയായി.
മാസാടിസ്ഥാനത്തിൽ ഡിസംബറിലാണ് ഏറ്റവും കൂടുതൽ യാത്രക്കാർ രേഖപ്പെടുത്തിയത്—ഏകദേശം 1.59 കോടി. ഏപ്രിലിൽ ഇത് 1.08 കോടിയായിരുന്നു. 2025ൽ യാത്രാ ട്രെയിനുകൾ 14 ലക്ഷം സർവീസുകൾ നടത്തി 4.23 കോടി കിലോമീറ്റർ സഞ്ചരിച്ചു. റിയാദ് മെട്രോ 9,49,400 സർവീസുകളിലായി 2.68 കോടി കിലോമീറ്റർ പിന്നിട്ടു.
ഹറമൈൻ ട്രെയിനിന് യാത്രാ പ്രകടനത്തിൽ 76% പങ്ക്
യാത്രക്കാരുടെ സഞ്ചരിച്ച ദൂരത്തെ അടിസ്ഥാനമാക്കിയുള്ള കണക്കിൽ ഹറമൈൻ ഹൈസ്പീഡ് റെയിൽവേയ്ക്കാണ് ഏറ്റവും വലിയ പങ്ക്. ആകെ 2,743 ദശലക്ഷം യാത്രക്കാരൻ-കിലോമീറ്റർ രേഖപ്പെടുത്തിയെങ്കിലും 2024നെ അപേക്ഷിച്ച് 6.1 ശതമാനം കുറവുണ്ടായി. കിഴക്കൻ ട്രെയിനിൽ ഈ കണക്ക് 8.3 ശതമാനം വർധിച്ച് 496 ദശലക്ഷം യാത്രക്കാരൻ-കിലോമീറ്ററായും വടക്കൻ ട്രെയിനിൽ 6.9 ശതമാനം ഉയർന്ന് 370 ദശലക്ഷമായും.
രാജ്യത്തെ മൊത്തം റെയിൽ യാത്രാ ഗതാഗത പ്രകടനം 3.1 ശതമാനം കുറഞ്ഞ് 3,609.3 ദശലക്ഷം യാത്രക്കാരൻ-കിലോമീറ്ററായി.
ചരക്കുനീക്കത്തിൽ 1.61 കോടി ടൺ
2025ൽ റെയിൽവേ വഴി ആകെ 1.61 കോടി ടൺ ചരക്കുകളാണ് നീക്കിയത്. ഇതിൽ 1.44 കോടി ടണ്ണും വടക്കൻ ട്രെയിൻ വഴിയായിരുന്നു. മൊത്തം ചരക്കുനീക്കത്തിന്റെ 89.7 ശതമാനമാണിത്. ഫോസ്ഫേറ്റ്, ബോക്സൈറ്റ്, ഫോസ്ഫോറിക് ആസിഡ്, ഉരുകിയ സൾഫർ എന്നിവയായിരുന്നു പ്രധാന ചരക്കുകൾ.
കിഴക്കൻ ട്രെയിൻ വഴി ചുണ്ണാമ്പുകല്ല്, ധാന്യങ്ങൾ, സിമന്റ് എന്നിവയുൾപ്പെടെ 17 ലക്ഷം ടൺ ചരക്കുകൾ നീക്കി. കൂടാതെ 9,15,400 ഇരുപത് അടി തുല്യ കണ്ടെയ്നർ യൂണിറ്റുകളും (TEU) കൈകാര്യം ചെയ്തു.
റെയിൽ ചരക്കുനീക്കത്തിന്റെ പ്രകടനം 3.6 ശതമാനം വർധിച്ച് 17,011.5 ദശലക്ഷം ടൺ-കിലോമീറ്ററായി. ഇതിൽ വടക്കൻ ട്രെയിനിന് 96.3 ശതമാനം പങ്കുണ്ട്. കിഴക്കൻ ട്രെയിനിന്റെ ചരക്കുനീക്ക പ്രകടനം 9.4 ശതമാനം വർധിച്ച് 637 ദശലക്ഷം ടൺ-കിലോമീറ്ററിലെത്തി.
സമയനിഷ്ഠയിൽ ഹറമൈൻ ട്രെയിൻ മുന്നിൽ
കൃത്യസമയത്ത് സർവീസ് നടത്തുന്നതിൽ ഹറമൈൻ ഹൈസ്പീഡ് റെയിൽവേ 97.8 ശതമാനവുമായി മുന്നിലെത്തി. കിഴക്കൻ ട്രെയിൻ 96.1 ശതമാനവും വടക്കൻ ട്രെയിൻ 94.3 ശതമാനവും രേഖപ്പെടുത്തി. ചരക്ക് ട്രെയിനുകൾ വർഷത്തിൽ 8,885 സർവീസുകൾ നടത്തി ഏകദേശം 61 ലക്ഷം കിലോമീറ്റർ സഞ്ചരിച്ചു.
ഗതാഗത ജനറൽ അതോറിറ്റി നൽകിയ ഭരണപരമായ രേഖകളും ചില സൂചികകൾ കണക്കാക്കുന്നതിനുള്ള ഭൗമസ്ഥിതിവിവര മാതൃകകളും അടിസ്ഥാനമാക്കിയാണ് വാർഷിക കണക്കുകൾ തയ്യാറാക്കിയതെന്ന് ഗാസ്റ്റാറ്റ് അറിയിച്ചു.
About the Author
