റിയാദ്: ഉൽപ്പന്നങ്ങളുടെ സുരക്ഷയും മാനദണ്ഡപാലനവും വേഗത്തിൽ പരിശോധിക്കാൻ സഹായിക്കുന്ന ‘പ്രോവെരിഫയർ’ (ProVerifier) സ്മാർട്ട് ഉൽപ്പന്ന പരിശോധനാ സംവിധാനം സൗദി ഫുഡ് ആൻഡ് ഡ്രഗ് അതോറിറ്റി (SFDA) അവതരിപ്പിച്ചു. SFDA ചീഫ് എക്സിക്യൂട്ടീവ് ഓഫീസർ ഡോ. ഹിഷാം അൽജദ്ഹെ റിയാദിൽ ചൊവ്വാഴ്ച സംവിധാനം ഉദ്ഘാടനം ചെയ്തു.
റിയാദിൽ നടക്കുന്ന LEAP 2026ന്റെ അഞ്ചാം പതിപ്പിന്റെ ഭാഗമായി നടന്ന ചടങ്ങിൽ ഡിജിറ്റൽ ഗവൺമെന്റ് അതോറിറ്റി (DGA) ഗവർണർ എൻജിനീയർ അഹ്മദ് അൽ-സുവൈയാൻ പങ്കെടുത്തു. ‘Into New Worlds’ എന്ന പ്രമേയത്തിൽ നടക്കുന്ന LEAP 2026ൽ സൗദിയിൽനിന്നും വിവിധ രാജ്യങ്ങളിൽനിന്നുമുള്ള സാങ്കേതികവിദ്യാ രംഗത്തെ പ്രമുഖരും കമ്പനികളും ഇന്നൊവേറ്റർമാരും പങ്കെടുക്കുന്നുണ്ട്.
SFDA ആർട്ടിഫിഷ്യൽ ഇന്റലിജൻസ് ലബോറട്ടറിയിൽ (SAIL) രൂപംകൊണ്ട ആശയമാണ് പ്രോവെരിഫയർ എന്ന് ഡോ. അൽജദ്ഹെ പറഞ്ഞു. സൗദി ദേശീയ പ്രതിഭകളാണ് സംവിധാനം വികസിപ്പിച്ചത്. ഉൽപ്പന്നത്തിന്റെ പാക്കേജിംഗിന്റെയോ ലേബലിന്റെയോ ഒറ്റ ചിത്രം പകർത്തിയാൽ ഉൽപ്പന്നം പരിശോധിക്കാൻ കഴിയുന്ന രീതിയിലാണ് സംവിധാനം ഒരുക്കിയിരിക്കുന്നത്.
ഫീൽഡ് ഇൻസ്പെക്ടർമാർക്ക് ബുദ്ധിമാനായ സഹായിയായി പ്രവർത്തിക്കുന്ന പ്രോവെരിഫയർ ആർട്ടിഫിഷ്യൽ ഇന്റലിജൻസ് ഉപയോഗിച്ച് ചിത്രത്തിൽനിന്ന് ആവശ്യമായ വിവരങ്ങൾ സ്വയമേവ ശേഖരിക്കുകയും അംഗീകൃത ചട്ടങ്ങളും മാനദണ്ഡങ്ങളുമായി താരതമ്യം ചെയ്യുകയും ആറ് മുതൽ 20 സെക്കൻഡിനുള്ളിൽ പ്രാഥമിക പരിശോധനാ ഫലം നൽകുകയും ചെയ്യും.
ഉൽപ്പന്ന പരിശോധനാ നടപടികൾ വേഗത്തിലാക്കുന്നതിനൊപ്പം പരിശോധനാ പ്രോട്ടോക്കോളുകളിൽ ഏകീകരണം കൊണ്ടുവരാനും പ്രവർത്തനഭാരം കുറയ്ക്കാനും സംവിധാനത്തിലൂടെ സാധിക്കും. ഇറക്കുമതി ചെയ്യുന്നതും രാജ്യത്ത് വിതരണം ചെയ്യുന്നതുമായ ഉൽപ്പന്നങ്ങളുടെ സുരക്ഷ ശക്തിപ്പെടുത്തുന്നതിനും പരിശോധനാ പ്രവർത്തനങ്ങളുടെ കാര്യക്ഷമത ഉയർത്തുന്നതിനും ഇത് സഹായിക്കുമെന്ന് അധികൃതർ അറിയിച്ചു.
ആദ്യഘട്ടത്തിൽ ഫാർമസ്യൂട്ടിക്കൽ ഉൽപ്പന്നങ്ങളും കോസ്മെറ്റിക് ഉൽപ്പന്നങ്ങളുമാണ് പ്രോവെരിഫയറിന്റെ പരിധിയിൽ വരുന്നത്. തുടർന്നുള്ള ഘട്ടങ്ങളിൽ ഭക്ഷ്യ ഉൽപ്പന്നങ്ങളും മെഡിക്കൽ ഉപകരണങ്ങളും ഉൾപ്പെടുത്തും.
ഉൽപ്പന്ന പരിശോധനയ്ക്കെടുക്കുന്ന സമയം 98 ശതമാനം വരെ കുറയ്ക്കുകയാണ് പദ്ധതിയുടെ ലക്ഷ്യം. ഇതോടെ ഓരോ പരിശോധനാ സന്ദർശനത്തിലും കൂടുതൽ ഉൽപ്പന്നങ്ങൾ പരിശോധിക്കാൻ ഇൻസ്പെക്ടർമാർക്ക് സാധിക്കും. കൂടാതെ ഉയർന്ന അപകടസാധ്യതയുള്ള മേഖലകളിലേക്ക് കൂടുതൽ വിഭവങ്ങൾ വിന്യസിക്കാനും കഴിയും.
ആർട്ടിഫിഷ്യൽ ഇന്റലിജൻസും നൂതന സാങ്കേതികവിദ്യകളും ഉപയോഗിച്ച് നിയന്ത്രണ സംവിധാനത്തെ ആധുനികവൽക്കരിക്കുന്ന SFDAയുടെ വിപുലമായ പദ്ധതിയുടെ ഭാഗമാണ് പ്രോവെരിഫയർ. സൗദി ദേശീയ പ്രതിഭകളെ പ്രോത്സാഹിപ്പിക്കുക, പ്രവർത്തനക്ഷമത വർധിപ്പിക്കുക, പൊതുജനാരോഗ്യവും ഉൽപ്പന്ന സുരക്ഷയും കൂടുതൽ ശക്തിപ്പെടുത്തുക എന്നിവയും പദ്ധതിയുടെ ലക്ഷ്യങ്ങളാണ്.
About the Author
