റിയാദ്: തെരുവ് കച്ചവടക്കാരുടെയും (Mobile vendors) മൊബൈൽ വാനുകളുടെയും പ്രവർത്തനം ഒമ്പത് സ്ഥലങ്ങളിൽ നിരോധിച്ചതായി സൗദി ഭവന, നഗരകാര്യ മന്ത്രാലയം അറിയിച്ചു. പൊതു സുരക്ഷ ഉറപ്പാക്കൽ, ഗതാഗത തടസ്സം ഒഴിവാക്കൽ, പൊതുസൗകര്യങ്ങൾ ശരിയായ രീതിയിൽ ഉപയോഗിക്കൽ, നഗരങ്ങളിലെ ജീവിതനിലവാരം ഉയർത്തൽ എന്നിവ കണക്കിലെടുത്താണ് ഈ തീരുമാനം.
റോഡ് കവലകൾ (Intersections), റോഡുകളുടെ മധ്യഭാഗങ്ങൾ (Central medians), ഭിന്നശേഷിക്കാർക്കായുള്ള പാർക്കിംഗ് സ്ഥലങ്ങൾ, പ്രധാന റോഡുകളുടെ പ്രവേശന-നിർഗ്ഗമന കവാടങ്ങൾ, ട്രാഫിക് സിഗ്നലുകൾക്ക് സമീപമുള്ള പ്രദേശങ്ങൾ, പൊതു പാർക്കിംഗ് കേന്ദ്രങ്ങൾ, സൈക്കിൾ പാതകൾ, കനത്ത ഗതാഗതത്തിരക്കുള്ള റോഡുകൾ എന്നിവയാണ് നിരോധനം ഏർപ്പെടുത്തിയ പ്ര പ്രധാന സ്ഥലങ്ങളെന്ന് മന്ത്രാലയം വക്താവ് മുഹമ്മദ് അൽ-റസാസ്മ വ്യക്തമാക്കി. കൂടാതെ പോലീസ്, ട്രാഫിക്, സിവിൽ ഡിഫൻസ്, ആംബുലൻസ് സർവീസുകൾ എന്നിവയ്ക്കായി നീക്കിവെച്ചിട്ടുള്ള സ്ഥലങ്ങളിലും കച്ചവടം പാടില്ല.
തെരുവ് കച്ചവടവുമായി ബന്ധപ്പെട്ട നിയമലംഘനങ്ങൾ ശ്രദ്ധയിൽപ്പെട്ടാൽ 940 എന്ന ഏകീകൃത നമ്പറിലോ ‘ബലാദി’ (Balady) ആപ്പ് വഴിയോ അറിയിക്കണമെന്ന് മന്ത്രാലയം പൊതുജനങ്ങളോട് അഭ്യർത്ഥിച്ചു. പരാതികളിൽ ഉടൻ നടപടിയെടുക്കാനും റോഡുകളുടെയും പൊതുസൗകര്യങ്ങളുടെയും സുരക്ഷിതത്വം ഉറപ്പാക്കാനും ഇത് സഹായിക്കും.
About the Author
