റിയാദ്: കൈക്കൂലി, പദവി ദുരുപയോഗം, സാമ്പത്തിക കൃത്രിമം, പൊതുമുതൽ കവർച്ച എന്നിവ ഉൾപ്പെടെയുള്ള 15 പ്രമുഖ അഴിമതിക്കേസുകളിൽ ക്രിമിനൽ നടപടികൾ ആരംഭിച്ചതായി സൗദി അഴിമതി വിരുദ്ധ അതോറിറ്റി (നസഹ) അറിയിച്ചു. സംഭവത്തിൽ വിവിധ മന്ത്രാലയങ്ങളിലെ ഉദ്യോഗസ്ഥരും വിദേശികളും പ്രവാസികളും ഉൾപ്പെടെയുള്ളവർ അറസ്റ്റിലായിട്ടുണ്ട്.
പ്രധാന കേസുകൾ ചുരുക്കത്തിൽ:
1.4 കോടിയുടെ നികുതി വെട്ടിപ്പ്: ജിദ്ദ ഇസ്ലാമിക് പോർട്ട് വഴി 1.4 കോടി റിയാലിന്റെ കസ്റ്റംസ് തീരുവ വെട്ടിച്ച് പുകയില ഉൽപ്പന്നങ്ങൾ കടത്താൻ കസ്റ്റംസ് ബ്രോക്കർക്ക് 16 ലക്ഷം റിയാൽ കൈക്കൂലി നൽകാൻ ശ്രമിച്ച സൗദി വ്യവസായി പിടിയിലായി.
ആരോഗ്യ മന്ത്രാലയത്തിൽ 9 ലക്ഷത്തിന്റെ കൈക്കൂലി: സ്വകാര്യ സ്ഥാപനത്തിന് അനധികൃതമായി സർക്കാർ പദ്ധതികൾ കരാർ നൽകിയതിന് 9,00,000 റിയാൽ കൈക്കൂലി വാങ്ങിയ ആരോഗ്യ മന്ത്രാലയത്തിലെ ജീവനക്കാരനെ തടവിലാക്കി.
ഊർജ്ജ മന്ത്രാലയം: സ്ഥാപനത്തിന് ചുമത്തേണ്ടിയിരുന്ന 15 ലക്ഷം റിയാലിന്റെ പിഴ ഒഴിവാക്കി നൽകാൻ 2,00,000 റിയാൽ വാങ്ങുന്നതിനിടെ പദ്ധതിയിലെ ജീവനക്കാരനായ പ്രവാസി പിടിയിലായി.
വാണിജ്യ കോടതി വിദഗ്ധൻ: വാണിജ്യ തർക്ക കേസിൽ ഒരു വിഭാഗത്തിന് അനുകൂലമായി സാങ്കേതിക റിപ്പോർട്ട് സമർപ്പിക്കാൻ 1,00,000 റിയാൽ കൈക്കൂലി ഉറപ്പിക്കുകയും, അതിൽ ആദ്യ ഗഡുവായ 50,000 റിയാൽ സ്വീകരിക്കുകയും ചെയ്ത എൻജിനീയറിങ് കൺസൾട്ടൻസി ജീവനക്കാരൻ അറസ്റ്റിലായി.
പാസ്പോർട്ട്, നികുതി വകുപ്പുകൾ: വിദേശികളുടെ ഇടപാടുകൾ നിയമവിരുദ്ധമായി പൂർത്തിയാക്കാൻ 60,500 റിയാൽ വാങ്ങിയ മുൻ ജവാസാത്ത് (Passports) ഉദ്യോഗസ്ഥനും, ഇറക്കുമതി ചെയ്ത സാധനങ്ങളുടെ വിവരങ്ങളിൽ മാറ്റം വരുത്താൻ 55,000 റിയാൽ കൈക്കൂലി വാങ്ങിയ സകാത്ത്, ടാക്സ് ആൻഡ് കസ്റ്റംസ് (ZATCA) ജീവനക്കാരനും പിടിയിലായി.
ബലദിയ (മുനിസിപ്പാലിറ്റി) കേസ്: ബന്ധുക്കൾക്ക് നിയമവിരുദ്ധമായി ജോലി നൽകുകയും വിദേശ തൊഴിലാളികളുടെ ശമ്പളം തട്ടിയെടുക്കുകയും ചെയ്ത നാല് നഗരസഭാ ജീവനക്കാരെ നസഹ കസ്റ്റഡിയിലെടുത്തു. കൂടാതെ, അഴിമതി നടത്തിയ മറ്റ് മൂന്ന് നഗരസഭാ ജീവനക്കാരും പിടിയിലായിട്ടുണ്ട്.
തൊഴിൽ മന്ത്രാലയം: പരിശോധനയ്ക്കിടെ സ്ഥാപനത്തിന് പിഴ ചുമത്താതിരിക്കാൻ 10,000 റിയാൽ വാങ്ങിയ മാനവ വിഭവശേഷി മന്ത്രാലയത്തിലെ ജീവനക്കാരനെയും, ഹുറൂബ് (Absconding status) റദ്ദാക്കാനും സ്പോൺസർഷിപ്പ് മാറ്റാനും വ്യാജ കത്ത് നൽകിയ ജീവനക്കാരനെയും അറസ്റ്റ് ചെയ്തു.
വ്യാജ മെഡിക്കൽ റിപ്പോർട്ട്: പ്രവാസി നേരിട്ട് ഹാജരാകാതെ തന്നെ മെഡിക്കൽ പരിശോധനാ റിപ്പോർട്ടും ലാബ് ഫലങ്ങളും തയാറാക്കി ബലദി (Balady) പ്ലാറ്റ്ഫോമിൽ അപ്ലോഡ് ചെയ്യാൻ പണം വാങ്ങിയ മെഡിക്കൽ സെന്ററിലെ പ്രവാസി ജീവനക്കാരൻ പിടിയിലായി.
മറ്റ് അറസ്റ്റുകൾ: മന്ത്രാലയത്തിന്റെ വെയർഹൗസിൽ നിന്ന് കമ്പ്യൂട്ടറുകൾ മോഷ്ടിച്ച ഇസ്ലാമിക കാര്യ മന്ത്രാലയ ജീവനക്കാരൻ, ഹാജരാകാതെ ലൈസൻസ് നടപടികൾ പൂർത്തിയാക്കി നൽകിയ ഡ്രൈവിങ് സ്കൂൾ ജീവനക്കാരൻ, വാഹനം നേരിട്ട് പരിശോധിക്കാതെ ഫحص (Periodic Vehicle Inspection) നടപടികൾ പൂർത്തിയാക്കിയ സ്റ്റേഷൻ മാനേജരും ജീവനക്കാരനും എന്നിവരും നസഹയുടെ പിടിയിലായവരിൽ ഉൾപ്പെടുന്നു.
പൊതുമുതൽ ദുരുപയോഗം ചെയ്യുന്നവർക്കും വ്യക്തിപരമായ നേട്ടങ്ങൾക്കായി ഔദ്യോഗിക പദവികൾ ദുരുപയോഗം ചെയ്യുന്നവർക്കുമെതിരെ ശക്തമായ നിയമനടപടികൾ തുടർന്നും സ്വീകരിക്കുമെന്ന് അതോറിറ്റി ആവർത്തിച്ചു വ്യക്തമാക്കി.
About the Author
