റിയാദ്: സൗദി അറേബ്യയിലെ ഗാർഹിക തൊഴിലാളികളുടെ (Domestic Workers) ഇഖാമ (residency permit) പുതുക്കുന്നതിൽ വൻ ഇളവുകളുമായി ആഭ്യന്തര മന്ത്രാലയം. ഇനി മുതൽ തൊഴിലുടമകൾക്ക് (സ്പോൺസർമാർക്ക്) തങ്ങളുടെ ആവശ്യാനുസരണം മൂന്ന് മാസം മുതൽ കാലാവധിയുള്ള ഇഖാമകൾ അബ്ഷീർ (Absher) പ്ലാറ്റ്ഫോം വഴി ഇഷ്യൂ ചെയ്യാനോ പുതുക്കാനോ സാധിക്കും.
ജനറൽ ഡയറക്ടറേറ്റ് ഓഫ് പാസ്പോർട്ട്സ് (ജവാസത്ത്), മാനവ വിഭവശേഷി സാമൂഹിക വികസന മന്ത്രാലയം, മുസാനിദ് (Musaned) പ്ലാറ്റ്ഫോം എന്നിവയുമായി സഹകരിച്ചാണ് ഈ പുതിയ ഡിജിറ്റൽ സേവനം ആരംഭിച്ചിരിക്കുന്നത്.
മുമ്പ് കുറഞ്ഞത് ഒരു വർഷത്തേക്കോ രണ്ട് വർഷത്തേക്കോ മാത്രമേ ഇഖാമ പുതുക്കാൻ സാധിച്ചിരുന്നുള്ളൂ. ഇതിനാണ് ഇപ്പോൾ മാറ്റം വന്നിരിക്കുന്നത്.
പ്രധാന മാറ്റങ്ങൾ:
പുതുക്കാവുന്ന കാലാവധികൾ: തൊഴിലുടമകൾക്ക് ഇനി മുതൽ 3, 6, 9, 12, 15, 18, 21 അല്ലെങ്കിൽ 24 മാസത്തെ കാലാവധിയിലേക്ക് ഇഖാമ പുതുക്കാം.
ഫീസ് അടയ്ക്കുന്നതിൽ ഇളവ്: ഇഖാമ പുതുക്കാൻ തിരഞ്ഞെടുക്കുന്ന കൃത്യമായ മാസങ്ങളിലെ ഫീസ് മാത്രം അടച്ചാൽ മതിയാകും. 3 മാസമോ അതിന്റെ ഗുണിതങ്ങളോ ആയ കാലാവധിയിലേക്ക് പുതുക്കുമ്പോൾ, തുക മൂന്ന് മാസ തവണകളായി (Quarterly basis) അടയ്ക്കാനുള്ള സൗകര്യവും ലഭ്യമാണ്.
സ്പോൺസർമാരുടെ സാമ്പത്തിക ബാധ്യതകൾ കുറയ്ക്കാനും ഡിജിറ്റൽ സേവനങ്ങൾ കൂടുതൽ എളുപ്പമാക്കാനും ലക്ഷ്യമിട്ടാണ് ഈ പരിഷ്കാരം നടപ്പിലാക്കിയിരിക്കുന്നത്. ഹൗസ് ഡ്രൈവർമാർ, വീട്ടുജോലിക്കാർ തുടങ്ങിയ ഗാർഹിക വിസകളിലുള്ള ലക്ഷക്കണക്കിന് പ്രവാസികൾക്കും അവരുടെ സ്പോൺസർമാർക്കും ഈ തീരുമാനം വലിയ ആശ്വാസമാകും.
About the Author
