ജിദ്ദ: സൗദി അറേബ്യയിലെ വിവിധ പ്രവിശ്യകളിൽ ഞായറാഴ്ച മുതൽ ഈ ആഴ്ച അവസാനം വരെ ഇടിമിന്നലോടു കൂടിയ മഴ തുടരുമെന്ന് നാഷണൽ സെന്റർ ഫോർ മെറ്റീരിയോളജി (NCM) അറിയിച്ചു. ‘സൗദി ന്യൂമെറിക്കൽ മോഡൽ’ (Saudi Numerical Model) പ്രവചനങ്ങളെ അടിസ്ഥാനമാക്കിയാണ് കാലാവസ്ഥാ നിരീക്ഷണം പുറത്തുവിട്ടിരിക്കുന്നത്.
വിവിധ ദിവസങ്ങളിൽ മഴ ബാധിക്കാൻ സാധ്യതയുള്ള പ്രദേശങ്ങൾ താഴെ പറയുന്ന രീതിയിലാണ്:
ഞായർ, തിങ്കൾ: ഞായറാഴ്ച ഉച്ചയ്ക്ക് ശേഷം അസീർ പ്രവിശ്യയുടെ തെക്കേ അറ്റത്ത് നേരിയ മഴയോടെ തുടക്കം കുറിക്കും. തുടർന്ന് ചൊവ്വാഴ്ച ഉച്ചവരെ രാജ്യത്ത് മറ്റ് ഭാഗങ്ങളിൽ മഴ മാറിനിൽക്കും.
ചൊവ്വാഴ്ച: ഉച്ചയ്ക്ക് ശേഷം അസീറിന്റെ തെക്കൻ ഭാഗങ്ങളിലും വടക്കുപടിഞ്ഞാറൻ മേഖലകളിലും മിതമായ രീതിയിൽ മഴ തിരിച്ചെത്തും. ചൊവ്വാഴ്ച രാത്രിയോടെ അസീറിന്റെ തെക്കൻ ഭാഗങ്ങളിൽ നേരിയ മഴ പെയ്യുകയും അത് ബുധനാഴ്ച പുലർച്ചെ വരെ തുടരുകയും ചെയ്യും.
ബുധനാഴ്ച: ഉച്ചയ്ക്ക് ശേഷം അസീറിന്റെ ഭൂരിഭാഗം പ്രദേശങ്ങളിലും അബഹയിലും മിതമായ മഴയ്ക്ക് സാധ്യതയുണ്ട്. കൂടാതെ, റിയാദ് പ്രവിശ്യയുടെ തെക്കുപടിഞ്ഞാറൻ ഭാഗങ്ങളിൽ ഒറ്റപ്പെട്ട മഴയും, മക്ക പ്രവിശ്യയിലെ ത്വാഇഫിൽ (Taif) ശക്തമായ മഴയും ലഭിക്കും. ബുധനാഴ്ച രാത്രിയോടെ മഴ ജിസാനിലേക്കും (Jazan) ഫറസാൻ ദ്വീപുകളിലേക്കും വ്യാപിക്കും.
വ്യാഴാഴ്ച: ഉച്ചയ്ക്ക് ശേഷം മഴ കനക്കും. ജിസാന്റെ കിഴക്കൻ ഭാഗങ്ങളിലും അസീറിന്റെ തെക്കൻ മേഖലകളിലും കനത്ത മഴ പെയ്യും. നജ്റാൻ (Najran), റിയാദിന്റെ തെക്കൻ ഭാഗങ്ങൾ എന്നിവിടങ്ങളിൽ പെയ്യുന്ന മഴ വെള്ളിയാഴ്ച പുലർച്ചെയോടെ ശമിക്കും.
വെള്ളിയാഴ്ച: ഉച്ചയ്ക്ക് ശേഷം അബഹയിലും അസീർ പ്രവിശ്യയുടെ ഭൂരിഭാഗം പ്രദേശങ്ങളിലും കനത്ത മഴയ്ക്ക് സാധ്യതയുണ്ട്. വെള്ളിയാഴ്ച രാത്രിയോടെ മഴയുടെ ശക്തി കുറയുമെങ്കിലും ശനിയാഴ്ച പുലർച്ചെ വരെ നേരിയ തോതിൽ തുടരും.
ശനിയാഴ്ച: ഉച്ചയ്ക്ക് ശേഷം അസീറിന്റെ തെക്കൻ ഭാഗങ്ങളിലും ജിസാന്റെ തെക്കുകിഴക്കൻ മേഖലകളിലും നേരിയ മഴയോടെ തുടങ്ങി പിന്നീട് മഴ ശക്തിപ്പെടും. ശനിയാഴ്ച രാത്രിയോടെ മഴ പൂർണ്ണമായും ശമിക്കുമെന്നാണ് പ്രവചനം.
മഴയും ഇടിമിന്നലും ഉള്ള സമയങ്ങളിൽ പ്രവാസികൾ ഉൾപ്പെടെയുള്ള പൊതുജനങ്ങൾ മലയോര മേഖലകളിലേക്കുള്ള യാത്രകൾ പരമാവധി ഒഴിവാക്കണമെന്നും സുരക്ഷാ നിർദ്ദേശങ്ങൾ പാലിക്കണമെന്നും അധികൃതർ അറിയിച്ചു.
About the Author
