വാഹനങ്ങളുടെ ഗ്ലാസ് ടിൻ്റിങ്: നിയമലംഘകർക്ക് 900 റിയാൽ വരെ പിഴ ചുമത്തുമെന്ന് സൗദി ട്രാഫിക് വകുപ്പ്

റിയാദ്: സൗദി അറേബ്യയിൽ നിശ്ചിത നിബന്ധനകൾ ലംഘിച്ച് വാഹനങ്ങളുടെ ഗ്ലാസുകളിൽ കരിമ്പടം (ടിൻ്റിങ്) ഒട്ടിക്കുന്ന വാഹന ഉടമകൾക്കെതിരെ മുന്നറിയിപ്പുമായി സൗദി ട്രാഫിക് ഡയറക്ടറേറ്റ്. നിയമലംഘകർക്ക് 500 റിയാൽ മുതൽ 900 റിയാൽ വരെ പിഴ ചുമത്തുമെന്ന് അധികൃതർ മുന്നറിയിപ്പ് നൽകി.

വാഹനങ്ങളുടെ വിൻഡോ ടിൻ്റിങ്ങുമായി ബന്ധപ്പെട്ട് വ്യക്തമായ മാർഗ്ഗനിർദ്ദേശങ്ങളാണ് ട്രാഫിക് വകുപ്പ് പുറപ്പെടുവിച്ചിട്ടുള്ളത്. സുരക്ഷയും സ്വകാര്യതയും ഉറപ്പാക്കുന്ന രീതിയിൽ, വാഹനങ്ങളുടെ പിൻഭാഗത്തെ സൈഡ് ഗ്ലാസുകളിൽ 30 ശതമാനത്തിൽ കൂടാത്ത രീതിയിൽ ടിൻ്റിങ് അനുവദനീയമാണ്. യാത്രക്കാരുടെ കാഴ്ചയ്ക്ക് തടസ്സമാകാത്ത രീതിയിലുള്ള ഈ ടിൻ്റിങ്, വാഹനത്തിനുള്ളിലെ ചൂട് കുറയ്ക്കുന്നതിനും സൂര്യപ്രകാശത്തിലെ ഹാനികരമായ കിരണങ്ങളിൽ നിന്ന് സംരക്ഷണം നൽകുന്നതിനും സഹായിക്കും. എന്നാൽ സുരക്ഷിതമായ ഡ്രൈവിംഗിന് ആവശ്യമായ വ്യക്തമായ കാഴ്ച ഉറപ്പാക്കുന്നതിനായി, മുൻവശത്തെ പ്രധാന ഗ്ലാസിൽ (വിൻഡ്ഷീൽഡ്) അനുവദനീയമായ പരിധിയിൽ കൂടുതൽ ടിൻ്റിങ് ചെയ്യുന്നത് പൂർണ്ണമായും നിരോധിച്ചിരിക്കുന്നു.

പുതിയ നിയന്ത്രണങ്ങൾ പ്രകാരം, കാഴ്ച്ച പൂർണ്ണമായും മറയ്ക്കാത്ത വിധം സുതാര്യമാണെങ്കിൽ മുൻവശത്തെ സൈഡ് ഗ്ലാസുകളിലും പിൻഗ്ലാസിലും ടിൻ്റിങ് ചെയ്യാൻ അനുവാദമുണ്ട്. എന്നാൽ, പുറത്തുനിന്നുള്ള കാഴ്ച മറയ്ക്കുന്ന തരത്തിലുള്ള റിഫ്ലക്ടീവ് അല്ലെങ്കിൽ മിറർ പോലുള്ള ടിൻ്റുകൾ ഉപയോഗിക്കാൻ പാടില്ല. കൂടാതെ, കാഴ്ചയ്ക്ക് തടസ്സമുണ്ടാക്കുന്ന രീതിയിലുള്ള ചിത്രങ്ങളോ മറ്റ് അലങ്കാര വസ്തുക്കളോ ഗ്ലാസുകളിൽ പതിക്കുന്നതും കർശനമായി നിരോധിച്ചിട്ടുണ്ടെന്ന് ട്രാഫിക് വകുപ്പ് വ്യക്തമാക്കി.