റിയാദ്: സൗദി അറേബ്യയിലെ ഓഹരി വിപണിയിൽ ലിസ്റ്റ് ചെയ്ത കമ്പനികളുടെ അമൂർത്ത ആസ്തികളുടെ (Intangible Assets) വിപണിമൂല്യം 2025 അവസാനത്തോടെ ഏകദേശം 5.78 ലക്ഷം കോടി സൗദി റിയാലിലെത്തിയതായി റിപ്പോർട്ട്. കമ്പനികളുടെ മൊത്തം വിപണിമൂല്യത്തിന്റെ 65.6 ശതമാനമാണിതെന്ന് സൗദി അതോറിറ്റി ഫോർ ഇന്റലക്ച്വൽ പ്രോപ്പർട്ടി (SAIP) അറിയിച്ചു.
അതോറിറ്റി പുറത്തിറക്കിയ ‘സൗദി അറേബ്യയിലെ അമൂർത്ത ആസ്തികൾ 2025’ എന്ന റിപ്പോർട്ടിലാണ് ഈ വിവരങ്ങൾ വ്യക്തമാക്കുന്നത്.
അതേസമയം, കമ്പനികളുടെ സാമ്പത്തിക പ്രസ്താവനകളിൽ രേഖപ്പെടുത്തിയിട്ടുള്ള അമൂർത്ത ആസ്തികളുടെ മൂല്യം ഏകദേശം 31,152 കോടി സൗദി റിയാലാണെന്നും റിപ്പോർട്ട് ചൂണ്ടിക്കാട്ടുന്നു.
കമ്പനികളുടെ ഭൗതികരൂപമില്ലാത്ത ആസ്തികളെയാണ് അമൂർത്ത ആസ്തികൾ എന്ന് വിളിക്കുന്നത്. ബ്രാൻഡ് മൂല്യം, വ്യാപാരമുദ്രകൾ, പേറ്റന്റുകൾ, ബൗദ്ധിക സ്വത്തവകാശങ്ങൾ, സോഫ്റ്റ്വെയറുകൾ, സാങ്കേതികവിദ്യകൾ, ഗുഡ്വിൽ തുടങ്ങിയവ ഈ വിഭാഗത്തിൽ ഉൾപ്പെടുന്നു.
സൗദി ഓഹരി വിപണിയിൽ ലിസ്റ്റ് ചെയ്ത കമ്പനികളുടെ അമൂർത്ത ആസ്തികളുടെ വിപണിമൂല്യം കണക്കാക്കുക, വിവിധ സാമ്പത്തിക മേഖലകളിൽ അവയുടെ വിതരണം വിലയിരുത്തുക, ദേശീയ സമ്പദ്വ്യവസ്ഥയിലെ അവയുടെ പ്രാധാന്യം തിരിച്ചറിയുക എന്നിവയാണ് റിപ്പോർട്ടിന്റെ പ്രധാന ലക്ഷ്യങ്ങൾ.
അറിവും നവീകരണവും അടിസ്ഥാനമാക്കിയുള്ള സാമ്പത്തിക വളർച്ചയിൽ അമൂർത്ത ആസ്തികൾ നിർണായക പങ്കുവഹിക്കുന്നതായി റിപ്പോർട്ട് വ്യക്തമാക്കുന്നു.
കമ്പനികളുടെ മത്സരശേഷി വർധിപ്പിക്കുന്നതിനും പുതിയ നിക്ഷേപങ്ങൾ ആകർഷിക്കുന്നതിനും സാങ്കേതികവിദ്യയും ബൗദ്ധിക സ്വത്തവകാശങ്ങളും ഫലപ്രദമായി വിനിയോഗിക്കുന്നതിനും ഇത്തരം ആസ്തികൾക്ക് വലിയ പ്രാധാന്യമുണ്ടെന്ന് അതോറിറ്റി ചൂണ്ടിക്കാട്ടി.
അമൂർത്ത ആസ്തികളുടെ സാമ്പത്തിക മൂല്യത്തെക്കുറിച്ച് കമ്പനികൾക്കും നിക്ഷേപകർക്കും കൂടുതൽ അവബോധം നൽകുന്നതിനും അവയുടെ പരിപാലനവും നിക്ഷേപ സാധ്യതകളും മെച്ചപ്പെടുത്തുന്നതിനുമുള്ള ശ്രമങ്ങളുടെ ഭാഗമായാണ് റിപ്പോർട്ട് പ്രസിദ്ധീകരിച്ചത്.
സൗദി വിഷൻ 2030 പദ്ധതിയുടെ ഭാഗമായി അറിവിലും സാങ്കേതികവിദ്യയിലും നവീകരണത്തിലും അധിഷ്ഠിതമായ സമ്പദ്വ്യവസ്ഥ വികസിപ്പിക്കുന്നതിനുള്ള രാജ്യത്തിന്റെ ശ്രമങ്ങൾക്കും റിപ്പോർട്ട് പ്രാധാന്യം നൽകുന്നു.
അമൂർത്ത ആസ്തികളുടെ ഫലപ്രദമായ വിനിയോഗം നവീകരണ പ്രവർത്തനങ്ങൾ പ്രോത്സാഹിപ്പിക്കുന്നതിനും നിക്ഷേപങ്ങൾ ആകർഷിക്കുന്നതിനും സൗദി സമ്പദ്വ്യവസ്ഥയുടെ ആഗോള മത്സരശേഷി ശക്തിപ്പെടുത്തുന്നതിനും സഹായിക്കുമെന്ന് അതോറിറ്റി വ്യക്തമാക്കി.
