റിയാദ്: രാജ്യത്തെ ഐസ്‌ക്രീം പാർലറുകളുടെയും (Ice Cream Shops) വിതരണ കേന്ദ്രങ്ങളുടെയും പ്രവർത്തനം കൂടുതൽ സുതാര്യവും സുരക്ഷിതവുമാക്കുന്നതിനായി പുതുക്കിയ നിയമാവലി പുറപ്പെടുവിച്ച് സൗദി നഗരസഭ-പാർപ്പിട മന്ത്രാലയം (Ministry of Municipalities and Housing). ഭക്ഷണത്തിന്റെ ഗുണനിലവാരം ഉറപ്പാക്കുക, ഉപഭോക്താക്കളുടെ ആരോഗ്യം സംരക്ഷിക്കുക, നിക്ഷേപകർക്ക് വ്യക്തമായ മാർഗ്ഗനിർദ്ദേശങ്ങൾ നൽകുക എന്നിവ ലക്ഷ്യമിട്ടാണ് ഫുഡ് ആൻഡ് ഡ്രഗ് അതോറിറ്റിയുമായി (SFDA) സഹകരിച്ച് പുതിയ നിർദ്ദേശങ്ങൾ പ്രാബല്യത്തിൽ വരുത്തിയത്.
ഐസ്‌ക്രീം ഉൽപന്നങ്ങൾ സ്വീകരിക്കുന്നത് മുതൽ സൂക്ഷിക്കുന്നതിലും, നിർമ്മിക്കുന്നതിലും, വിതരണം ചെയ്യുന്നതിലുമുള്ള താപനില കൃത്യമായി ക്രമീകരിക്കണം. കൂടാതെ, ഐസ്‌ക്രീമിൽ അടങ്ങിയിരിക്കുന്ന അലർജിക്ക് കാരണമാകുന്ന ചേരുവകളെക്കുറിച്ചുള്ള ഫുഡ് അലർജി മുന്നറിയിപ്പുകൾ (Allergen Disclosure) ഉപഭോക്താക്കൾക്കായി വ്യക്തമായി രേഖപ്പെടുത്തണമെന്നും നിയമാവലിയിൽ എടുത്തുപറയുന്നു.
ലൈസൻസിംഗും സൗദി ബിൽഡിംഗ് കോഡും
കടകളുടെ ലൈസൻസ്, അനുയോജ്യമായ സ്ഥലം, അകത്തള ക്രമീകരണങ്ങൾ എന്നിവ ഇനിമുതൽ സൗദി ബിൽഡിംഗ് കോഡ് (Saudi Building Code), ഭിന്നശേഷിക്കാർക്കുള്ള പ്രത്യേക പ്രവേശന സൗകര്യങ്ങൾ (Universal Access), അഗ്നിശമന സുരക്ഷാ മാനദണ്ഡങ്ങൾ എന്നിവയ്ക്ക് വിധേയമായിരിക്കണം. ഫ്രണ്ട് ബോർഡുകളും വാണിജ്യ സൈൻ ബോർഡുകളും മന്ത്രാലയത്തിന്റെ ഏകീകൃത ഡിസൈൻ മാനദണ്ഡങ്ങൾ പാലിച്ചായിരിക്കണം സ്ഥാപിക്കേണ്ടത്.
സ്ഥാപനത്തിന്റെ ശുചിത്വം, മാലിന്യ സംസ്കരണം, ഉപകരണങ്ങളുടെ പരിപാലനം എന്നിവയ്ക്ക് ഉയർന്ന പ്രാധാന്യം നൽകണം. ഉൽപന്നങ്ങൾ കേടുകൂടാതെ സൂക്ഷിക്കാൻ ആവശ്യമായ അന്തരീക്ഷം കടയ്ക്കുള്ളിൽ ഉറപ്പാക്കേണ്ടതുണ്ട്.
തൊഴിലാളികളുടെ ശുചിത്വവും ഡിജിറ്റൽ സേവനങ്ങളും
ഐസ്‌ക്രീം കടകളിൽ ജോലി ചെയ്യുന്ന ജീവനക്കാർക്ക് ഇനിപ്പറയുന്ന നിബന്ധനകൾ നിർബന്ധമാണ്:
• ആരോഗ്യ കാർഡും അപ്പാരലുകളും: എല്ലാ ജീവനക്കാരും സാധുതയുള്ള ഹെൽത്ത് സർട്ടിഫിക്കറ്റ് കരുതുകയും, ജോലി സമയത്ത് സുരക്ഷാ വസ്ത്രങ്ങളും മാസ്കും ധരിക്കുകയും വേണം.
• ഡിജിറ്റൽ പെയ്‌‌മെന്റും QR കോഡും: കടകളിൽ ഡിജിറ്റൽ പണമിടപാട് (Electronic Payment) സൗകര്യം നിർബന്ധമായും ലഭ്യമാക്കണം. ഒപ്പം മന്ത്രാലയത്തിന്റെ ഏകീകൃത ക്യു.ആർ കോഡ് (Unified QR Code) ഉപഭോക്താക്കൾക്ക് കാണാവുന്ന രീതിയിൽ പ്രദർശിപ്പിക്കുകയും വേണം.
ബിസിനസ്സ് ആരംഭിക്കുന്ന ഘട്ടം മുതൽ പ്രവർത്തനഘട്ടം വരെയുള്ള മുഴുവൻ മാനദണ്ഡങ്ങളും മുൻകൂട്ടി അറിയാൻ നിക്ഷേപകർക്ക് ഈ പുതിയ പരിഷ്കരണങ്ങൾ സഹായകമാകുമെന്ന് മന്ത്രാലയം വ്യക്തമാക്കി.
About the Author
