ജിദ്ദ/മക്ക: മക്ക, ജിദ്ദ, തായിഫ്, യാംബു, തബൂക്ക് എന്നീ സൗദി നഗരങ്ങളെ ലക്ഷ്യമാക്കി ഹൂതി മിലിഷ്യ തൊടുത്തുവിട്ട 6 ബാലിസ്റ്റിക് മിസൈലുകൾ അറബ് സഖ്യസേന (Arab Coalition) വിജയകരമായി വെടിവെച്ചിട്ടു. സാധാരണക്കാരെയും സിവിലിയൻ കേന്ദ്രങ്ങളെയും ലക്ഷ്യമിട്ട് നടന്ന ഈ വൻ ആക്രമണ നീക്കത്തെ വ്യോമമധ്യത്തിൽ വെച്ചുതന്നെ സഖ്യസേന തകർക്കുകയായിരുന്നു.
മിസൈൽ ആക്രമണ ഭീഷണിയെത്തുടർന്ന് മുൻകരുതൽ നടപടികളുടെ ഭാഗമായി നാഷണൽ ഏർലി വാണിംഗ് പ്ലാറ്റ്ഫോം വഴി അപായ സൈറണുകൾ മുഴങ്ങിയിരുന്നെങ്കിലും, നിമിഷങ്ങൾക്കകം സ്ഥിതിഗതികൾ ശാന്തമാവുകയും അപകടസാധ്യത ഒഴിഞ്ഞതായി സൗദി സിവിൽ ഡിഫൻസ് സ്ഥിരീകരിക്കുകയും ചെയ്തു.
മക്ക, ജിദ്ദ, തായിഫ്, യാംബു, തബൂക്ക് എന്നിവിടങ്ങളിൽ നിലവിൽ സാഹചര്യങ്ങൾ പൂർണ്ണമായും സുരക്ഷിതമാണെന്നും, പ്രദേശവാസികൾ ഔദ്യോഗിക നിർദ്ദേശങ്ങൾ തുടർന്നും പാലിക്കണമെന്നും അധികൃതർ അഭ്യർത്ഥിച്ചു. സംഭവസ്ഥലങ്ങളിൽ തടിച്ചുകൂടുകയോ ദൃശ്യങ്ങൾ പകർത്തി പ്രചരിപ്പിക്കുകയോ ചെയ്യരുതെന്നും വ്യാജവാർത്തകൾ വിശ്വസിക്കരുതെന്നും സിവിൽ ഡിഫൻസ് മുന്നറിയിപ്പ് നൽകി. എന്തെങ്കിലും അടിയന്തര സാഹചര്യങ്ങളുണ്ടായാൽ ‘998’ എന്ന എമർജൻസി നമ്പറിൽ ബന്ധപ്പെടാവുന്നതാണ്.
About the Author
