റിയാദ്: സൗദി അറേബ്യയിലെ വിവിധ മേഖലകളിൽ അടുത്ത ചൊവ്വാഴ്ച വരെ ഇടിയോടുകൂടിയ മഴ തുടരുമെന്ന കാലാവസ്ഥാ പ്രവചനത്തിന്റെ പശ്ചാത്തലത്തിൽ സിവിൽ ഡിഫൻസ് ഡയറക്ടറേറ്റ് ജനങ്ങൾക്ക് ജാഗ്രതാ നിർദേശം നൽകി.
സുരക്ഷിതമായ സ്ഥലങ്ങളിൽ തുടരണമെന്നും വെള്ളപ്പൊക്ക സാധ്യതയുള്ള പ്രദേശങ്ങൾ, താഴ്വരകൾ എന്നിവിടങ്ങളിൽ നിന്ന് അകന്നുനിൽക്കണമെന്നും അധികൃതർ ആവശ്യപ്പെട്ടു. ഇത്തരം പ്രദേശങ്ങളിൽ നീന്താൻ ശ്രമിക്കരുതെന്നും ബന്ധപ്പെട്ട അധികാരികളുടെ നിർദേശങ്ങൾ കൃത്യമായി പാലിക്കണമെന്നും മുന്നറിയിപ്പുണ്ട്.
ദേശീയ കാലാവസ്ഥാ കേന്ദ്രത്തിന്റെ (NCM) റിപ്പോർട്ട് പ്രകാരം മക്ക മേഖലയിൽ മിതമായത് മുതൽ ശക്തമായ മഴ വരെ ലഭിക്കാം. ഇതിനെ തുടർന്ന് മിന്നൽ പ്രളയം, ആലിപ്പഴം, ശക്തമായ താഴേക്കാറ്റ് എന്നിവയ്ക്ക് സാധ്യതയുണ്ട്. തായിഫ്, മൈസാൻ, അദ്ഹം, അൽ-അർദിയാത്ത് എന്നിവിടങ്ങളെയാണ് ഇത് പ്രധാനമായും ബാധിക്കുക.
മക്ക നഗരം, അൽ-കാമിൽ, അൽ-ജുമൂം, ബഹ്റ എന്നിവിടങ്ങളിൽ നേരിയതോ മിതമായതോ ആയ മഴയ്ക്കും സാധ്യതയുണ്ട്.
അതേസമയം ജിസാൻ, അസീർ, അൽ-ബാഹ മേഖലകളിൽ മിതമായത് മുതൽ ശക്തമായ മഴയും മിന്നൽ പ്രളയവും ആലിപ്പഴവും പൊടിയും മണലും ഉയർത്തുന്ന ശക്തമായ കാറ്റും പ്രതീക്ഷിക്കുന്നു.
മദീന, നജ്റാൻ മേഖലകളിൽ നേരിയതോ മിതമായതോ ആയ മഴയ്ക്കും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം അറിയിച്ചു.
About the Author
