മക്ക: മക്കയിൽ കൈയേറ്റ ഭൂമിയിൽ നിലവിലുള്ള പാർപ്പിടങ്ങൾക്ക് (Squatter housing) ഉടമസ്ഥാവകാശ രേഖ (ആധാരം) നൽകുന്നതിനായി 7 പ്രധാന ഉപാധികളും 7 അപേക്ഷാ നടപടിക്രമങ്ങളും മക്ക പ്രവിശ്യാ നഗരസഭ (Holy Makkah Municipality) പ്രഖ്യാപിച്ചു. യഥാർത്ഥത്തിൽ താമസയോഗ്യവും ആളുകൾ താമസിക്കുന്നതുമായ വീടുകൾക്കായിരിക്കണം അപേക്ഷിക്കേണ്ടത്. അപേക്ഷകന് മറ്റ് വീടുകൾ ഉണ്ടായിരിക്കരുത്, കെട്ടിടം മക്ക ഹറം അതിർത്തിക്ക് ഉള്ളിലോ (Haram boundaries) ഉടമസ്ഥാവകാശം നിരോധിച്ച പ്രദേശങ്ങളിലോ വികസന പദ്ധതികളുടെ പരിധിയിലോ വരരുത്, തർക്കഭൂമിയോ സർവീസ് ലൈനുകളുടെ പരിധിയിലോ ആകരുത് എന്നിവയാണ് പ്രധാന ഉപാധികൾ.
അംഗീകൃത എഞ്ചിനീയറിംഗ് ഓഫീസുകൾ വഴി സമർപ്പിക്കുന്ന അപേക്ഷകളിൽ പൗരന് മറ്റ് വീടുകളില്ലെന്ന് ഉറപ്പുവരുത്തിയ ശേഷമായിരിക്കും തുടർന്നുള്ള നടപടികൾ. തുടർന്ന് സ്ഥലം നേരിട്ട് സന്ദർശിച്ച് അതിരുകളും കൃത്യമായ വിസ്തീർണ്ണവും തിട്ടപ്പെടുത്തും. ശേഷം പ്രത്യേക മൂല്യനിർണ്ണയ സമിതി (Land valuation committee) ഭൂമിയുടെ വില നിശ്ചയിക്കുകയും ആധാരം അനുവദിക്കുന്നതിനായി ഫയൽ മേലധികാരികൾക്ക് കൈമാറുകയും ചെയ്യും. അർഹരായവർ എഞ്ചിനീയറിംഗ് ഓഫീസുകൾ വഴി അപേക്ഷ സമർപ്പിക്കണമെന്ന് കഴിഞ്ഞ വ്യാഴാഴ്ച നഗരസഭ അറിയിച്ചിരുന്നു.
കൈയേറ്റ ഭൂമിയിലെ പാർപ്പിടങ്ങൾക്ക് ആധാരം നൽകുന്നതിനുള്ള നടപടിക്രമങ്ങൾ 35 പ്രവൃത്തി ദിവസത്തിനുള്ളിൽ പൂർത്തിയാക്കാൻ അമാനത്തുകൾക്കും നഗരസഭകൾക്കും മുൻസിപ്പൽ-ഭവന മന്ത്രാലയം നൽകിയ നിർദ്ദേശത്തിന് പിന്നാലെയാണ് മക്ക നഗരസഭയുടെ ഈ പ്രഖ്യാപനം.
About the Author
