റിയാദ് : അധികാരികൾ രേഖപ്പെടുത്താത്തതോ അധികാരപ്പെടുത്തിയിട്ടില്ലാത്തതോ ആയ ധനസമാഹരണത്തിനായുള്ള പരസ്യങ്ങൾ കണ്ട് തെറ്റിദ്ധരിക്കപ്പെടരുതെന്ന് സൗദി ഇസ് ലാമിക കാര്യ മന്ത്രി ഡോ.അബ്ദുല്ലത്തീഫ് ആൽ-ഷെയ്ഖ് പൊതുജനങ്ങൾക്ക് മുന്നറിയിപ്പ് നൽകി.
എല്ലാവരും ഔദ്യോഗിക മാർഗങ്ങളിലൂടെ മാത്രമേ സംഭാവനകൾ നൽകാവൂ എന്ന് മന്ത്രി പ്രത്യേകം ആഹ്വാനം ചെയ്തു.
നിയമവിരുദ്ധമായ ധനസമാഹരണത്തിന്റെ ചില ഉദാഹരണങ്ങൾ മന്ത്രി ഉദ്ധരിച്ചു. “പള്ളികൾ നിർമ്മിക്കുന്നതിനും പുതുക്കിപ്പണിയുന്നതിനുമായി ഒരു കമ്പനി പൗരന്മാരിൽ നിന്ന് പണം ശേഖരിക്കുകയും വിപണനം ചെയ്യുകയും അധികാരികളുടെ അംഗീകാരമുണ്ടെന്ന് അവരെ വിശ്വസിപ്പിച്ചുകൊണ്ട് ദാതാക്കളെ വഞ്ചിക്കുകയും ചെയ്യുന്നതായി കണ്ടെത്തിയിട്ടുണ്ട്. മക്കയിൽ പള്ളികൾ നിർമ്മിക്കുന്നതിനായി 90 സൗദി റിയാൽ വീതം സംഭാവനകൾ ശേഖരിക്കുന്നതിനായി ഒരു അസോസിയേഷൻ പരസ്യം ചെയ്യുന്നതായും നിരീക്ഷിച്ചു, മന്ത്രാലയത്തിൽ നിന്ന് ഒരു അനുമതിയോ പള്ളികൾ നിർമ്മിക്കുന്നതിനായി അവർക്ക് കൈമാറിയ സ്ഥലങ്ങളോ ലഭിച്ചിട്ടില്ല എന്നതാണ് വസ്തുത” അദ്ദേഹം പറഞ്ഞു.
അതേസമയം, നിയമലംഘകരെ ശിക്ഷിക്കാൻ സൗദി ധനസമാഹരണ നിയമത്തിൽ നിരവധി വ്യവസ്ഥകളുണ്ടെന്ന് അഭിഭാഷകൻ റാമി അൽ-ഷെരീഫ് ചൂണ്ടിക്കാട്ടി. ലൈസൻസുള്ള സ്ഥാപനത്തിന് മാത്രമേ സംഭാവനകൾ ശേഖരിക്കാൻ കഴിയൂ എന്നും ലൈസൻസുള്ള സ്ഥാപനത്തിൽ സംഭാവനകൾ ശേഖരിക്കുന്നതിനും വിതരണം ചെയ്യുന്നതിനും ഉത്തരവാദികളായവർ സൗദികളായിരിക്കണമെന്നും നിയമം അനുശാസിക്കുന്നു. നിയമവിരുദ്ധമായി സംഭാവനകൾ ശേഖരിക്കുന്ന ഒരാൾക്ക് 5 ലക്ഷം റിയാൽ കവിയാത്ത പിഴയോ രണ്ട് വർഷത്തിൽ കൂടാത്ത തടവോ അല്ലെങ്കിൽ രണ്ടും കൂടിയോ ശിക്ഷ ലഭിക്കുമെന്നും ജയിൽ ശിക്ഷ അനുഭവിച്ചതിന് ശേഷം വിദേശികളെ നാടുകടത്തുന്നതിനൊപ്പം ഹജ്ജ്, ഉംറ ചട്ടങ്ങൾ പ്രകാരമല്ലാതെ അവരെ രാജ്യത്തേക്ക് വീണ്ടും പ്രവേശിക്കാൻ അനുവദിക്കില്ലെന്നും നിയമം വ്യവസ്ഥ ചെയ്യുന്നുണ്ടെന്നും അദ്ദേഹം ചൂണ്ടിക്കാട്ടി.
