റിയാദ്: സൗദി അറേബ്യയിൽ ടാക്സി സർവീസുകൾക്കും സ്വകാര്യ കാർ വാടക സേവനങ്ങൾക്കും ഉപയോഗിക്കുന്ന വാഹനങ്ങളുടെ അനുവദനീയമായ പ്രവർത്തന കാലാവധി ആറുമാസം വരെ നീട്ടിയതായി ട്രാൻസ്പോർട്ട് ജനറൽ അതോറിറ്റി (TGA) അറിയിച്ചു. പുതുക്കിയ തീരുമാനപ്രകാരം 2027 ജൂൺ 30 വരെ വാഹനങ്ങൾ സർവീസിൽ തുടരാൻ അനുമതി ലഭിക്കും.
2026 അവസാനത്തോടെ പ്രവർത്തന കാലാവധി അവസാനിക്കുന്ന വാഹനങ്ങൾക്കാണ് ഈ ഇളവ് ബാധകമാകുക. ഇതിലൂടെ ടാക്സി, കാർ റെന്റൽ സ്ഥാപനങ്ങൾക്ക് നിലവിലുള്ള വാഹനങ്ങൾ ആറുമാസം കൂടി ഉപയോഗിക്കാൻ സാധിക്കും.
ഗതാഗത സ്ഥാപനങ്ങളുടെ പ്രവർത്തനത്തിൽ കൂടുതൽ സൗകര്യം ഉറപ്പാക്കുക, സേവനങ്ങൾ തടസ്സമില്ലാതെ തുടരുക, വാഹനങ്ങൾ മാറ്റിസ്ഥാപിക്കുന്നതുമായി ബന്ധപ്പെട്ട സാമ്പത്തിക ബാധ്യത കുറയ്ക്കുക എന്നിവയാണ് തീരുമാനത്തിന്റെ പ്രധാന ലക്ഷ്യങ്ങൾ.
അതേസമയം, വാഹനങ്ങളുടെ സുരക്ഷാ മാനദണ്ഡങ്ങളിലും സേവന നിലവാരത്തിലും വിട്ടുവീഴ്ച അനുവദിക്കില്ലെന്ന് അതോറിറ്റി വ്യക്തമാക്കി.
നിലവിലുള്ള വാഹനങ്ങളുടെ പരമാവധി ഉപയോഗം ഉറപ്പാക്കാനും സ്ഥാപനങ്ങളുടെ പ്രവർത്തനക്ഷമത മെച്ചപ്പെടുത്താനും പുതിയ തീരുമാനം സഹായിക്കുമെന്നാണ് വിലയിരുത്തൽ.
ഗതാഗത മേഖലയിലെ നിയന്ത്രണ സംവിധാനങ്ങൾ നവീകരിക്കുന്നതിനും സേവനങ്ങളുടെ സുസ്ഥിരത ഉറപ്പാക്കുന്നതിനും മേഖലയുടെ ദീർഘകാല വളർച്ച പ്രോത്സാഹിപ്പിക്കുന്നതിനുമുള്ള നടപടികളുടെ ഭാഗമായാണ് കാലാവധി നീട്ടിയതെന്ന് ട്രാൻസ്പോർട്ട് ജനറൽ അതോറിറ്റി അറിയിച്ചു.
About the Author
