റിയാദ്: ലോകത്തിലെ ഏറ്റവും മികച്ച നാല് ഗതാഗത പദ്ധതികളിലൊന്നായി സൗദി അറേബ്യയുടെ റിയാദ് മെട്രോ തിരഞ്ഞെടുക്കപ്പെട്ടു. സ്പെയിനിലെ ബാഴ്‌സലോണയിൽ നടന്ന സ്മാർട്ട് സിറ്റി എക്‌സ്‌പോ വേൾഡ് കോൺഗ്രസ് 2026-ലാണ് റിയാദ് മെട്രോയ്ക്ക് ഈ അന്താരാഷ്ട്ര അംഗീകാരം ലഭിച്ചത്.
68 രാജ്യങ്ങളിൽ നിന്നുള്ള 533 എൻട്രികൾ പങ്കെടുത്ത ആഗോള മത്സരത്തിലാണ് റിയാദ് മെട്രോ മികച്ച നാല് പദ്ധതികളിൽ ഇടംപിടിച്ചത്. റിയാദ് സിറ്റി റോയൽ കമ്മീഷന്റെ (RCRC) മേൽനോട്ടത്തിൽ നടപ്പാക്കിയ പദ്ധതിയുടെ സാങ്കേതിക മികവും വിപുലമായ അടിസ്ഥാന സൗകര്യങ്ങളുമാണ് ഈ നേട്ടത്തിന് പിന്നിൽ.
ലോകത്തിലെ ഏറ്റവും വലുതും ആധുനികവുമായ പൊതുഗതാഗത പദ്ധതികളിലൊന്നാണ് റിയാദ് മെട്രോ. പരിസ്ഥിതി സൗഹൃദവും സുസ്ഥിരവുമായ നഗരഗതാഗത സംവിധാനം വികസിപ്പിക്കുന്നതിൽ പദ്ധതി നിർണായക പങ്കുവഹിക്കുന്നു. കാർബൺ പുറന്തള്ളൽ കുറയ്ക്കുക, ഗതാഗതക്കുരുക്ക് ലഘൂകരിക്കുക, യാത്രാസൗകര്യങ്ങൾ മെച്ചപ്പെടുത്തുക, വർധിച്ചുവരുന്ന ജനസംഖ്യയ്ക്കും നഗരവികസനത്തിനും അനുയോജ്യമായ ഗതാഗത സംവിധാനം ഒരുക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ.
കോൺഗ്രസിൽ റിയാദ് സിറ്റി റോയൽ കമ്മീഷൻ നഗരാസൂത്രണത്തിലും ഭരണനിർവഹണത്തിലും ആധുനിക സാങ്കേതികവിദ്യകൾ ഉപയോഗിക്കുന്നതിന്റെ അനുഭവങ്ങളും അവതരിപ്പിക്കുന്നുണ്ട്. റിയാദ് ഡാറ്റ ഹബ്, ഡിജിറ്റൽ ട്വിൻ സാങ്കേതികവിദ്യ, ആർട്ടിഫിഷ്യൽ ഇന്റലിജൻസ് എന്നിവയുടെ സഹായത്തോടെ നഗരവികസന പ്രവർത്തനങ്ങൾ കൂടുതൽ കാര്യക്ഷമമാക്കുന്ന രീതികളാണ് പ്രദർശിപ്പിക്കുന്നത്.
റിയാദിലെ പൊതുഗതാഗത സംവിധാനത്തിന്റെ വികസനം, ഗതാഗത നിയന്ത്രണം, ഗ്രീൻ റിയാദ് പദ്ധതിയുടെ പ്രവർത്തനങ്ങൾ, തലസ്ഥാന നഗരിയിലെ പ്രധാന വികസന പദ്ധതികൾ എന്നിവയും കമ്മീഷൻ അന്താരാഷ്ട്ര വേദിയിൽ അവതരിപ്പിക്കുന്നുണ്ട്.
നഗരവികസനത്തിനും ഭാവിയിലെ സ്മാർട്ട് സിറ്റികൾക്കുമായി സംഘടിപ്പിക്കുന്ന ലോകത്തിലെ പ്രധാന സമ്മേളനങ്ങളിലൊന്നാണ് സ്മാർട്ട് സിറ്റി എക്‌സ്‌പോ വേൾഡ് കോൺഗ്രസ്. ‘Urban Solutions, Real Impact’ എന്ന പ്രമേയത്തിൽ നടക്കുന്ന ഇത്തവണത്തെ സമ്മേളനത്തിൽ 600-ലധികം അന്താരാഷ്ട്ര പ്രഭാഷകർ പങ്കെടുക്കുന്നുണ്ട്.
ഡിജിറ്റൽ പരിവർത്തനം, ഗതാഗതം, ഊർജം, പരിസ്ഥിതി, പാർപ്പിടം, അടിസ്ഥാന സൗകര്യ വികസനം തുടങ്ങിയ മേഖലകളിലെ നൂതന ആശയങ്ങളും പരിഹാരങ്ങളുമാണ് സമ്മേളനത്തിൽ ചർച്ച ചെയ്യുന്നത്.
റിയാദ് മെട്രോയ്ക്ക് ലഭിച്ച ഈ അംഗീകാരം ആധുനികവും പരിസ്ഥിതി സൗഹൃദവുമായ നഗരഗതാഗത സംവിധാനങ്ങൾ വികസിപ്പിക്കുന്നതിൽ സൗദി അറേബ്യ കൈവരിക്കുന്ന പുരോഗതിയുടെ മറ്റൊരു തെളിവായി മാറിയിരിക്കുകയാണ്.
About the Author
