റിയാദ്: ഊർജ മേഖലയിൽ സഹകരണം വിപുലീകരിക്കുന്നതിന്റെ ഭാഗമായി കുവൈത്ത്, ഖത്തർ, ഈജിപ്ത് എന്നീ രാജ്യങ്ങളുമായി സൗദി അറേബ്യ മൂന്ന് ധാരണാപത്രങ്ങളിൽ ഒപ്പുവച്ചു. സൗദി ഊർജ മന്ത്രിയും വ്യവസായ–ധാതുവിഭവ മന്ത്രിയുമായ പ്രിൻസ് അബ്ദുൽ അസീസ് ബിൻ സൽമാനാണ് കരാറുകളിൽ ഒപ്പുവച്ചത്.
കുവൈത്തുമായി വൈദ്യുതി, പുനരുപയോഗ ഊർജം
കുവൈത്ത് വൈദ്യുതി, ജലം, പുനരുപയോഗ ഊർജ മന്ത്രി ഡോ. സുബൈഹ് അബ്ദുൽ അസീസ് അൽ മുഖൈസിമുമായി ഒപ്പുവച്ച ധാരണാപത്രം വൈദ്യുതി ശൃംഖലാ ബന്ധം, വൈദ്യുതി കയറ്റുമതി, ഊർജ സംഭരണം, സ്മാർട്ട് ഗ്രിഡുകൾ, ഊർജ കാര്യക്ഷമത തുടങ്ങിയ മേഖലകളിലെ സഹകരണത്തിന് വഴിയൊരുക്കും. സൈബർ സുരക്ഷ, ആർട്ടിഫിഷ്യൽ ഇന്റലിജൻസ്, ഡിജിറ്റൽ പരിവർത്തനം, കാലാവസ്ഥാ വ്യതിയാനം നേരിടുന്നതിനുള്ള സാങ്കേതികവിദ്യകൾ എന്നിവയും കരാറിന്റെ പരിധിയിൽ വരും.
ഖത്തറുമായി വിപുലമായ ഊർജ സഹകരണം
ഖത്തർ ഊർജകാര്യ സഹമന്ത്രി എൻജിനീയർ സഅദ് ബിൻ ഷെരീദ അൽ കഅബിയുമായി ഒപ്പുവച്ച കരാർ എണ്ണ, പ്രകൃതിവാതകം, പെട്രോകെമിക്കൽസ്, വൈദ്യുതി, ശുദ്ധ ഹൈഡ്രജൻ, പുനരുപയോഗ ഊർജം തുടങ്ങിയ മേഖലകളിലെ സഹകരണം ലക്ഷ്യമിടുന്നു. എണ്ണ–വാതക ഗതാഗത പൈപ്പ്‌ലൈനുകൾ, സുസ്ഥിര പെട്രോകെമിക്കൽ ഉൽപ്പന്നങ്ങളുടെ വികസനം, ഊർജ അടിസ്ഥാനസൗകര്യങ്ങൾ എന്നിവയുമായി ബന്ധപ്പെട്ട സംയുക്ത പദ്ധതികളും പരിഗണിക്കും.
ഊർജ പരിവർത്തനവും കാലാവസ്ഥാ വ്യതിയാനവും സംബന്ധിച്ച അന്താരാഷ്ട്ര ചർച്ചകളിലും വേദികളിലും ഇരു രാജ്യങ്ങളും സഹകരിക്കും.
ഈജിപ്തുമായി എണ്ണ–വാതക മേഖലയിൽ പങ്കാളിത്തം
ഈജിപ്ത് പെട്രോളിയം–ധാതുവിഭവ മന്ത്രി എൻജിനീയർ കരീം ബദാവിയുമായി ഒപ്പുവച്ച ധാരണാപത്രം അസംസ്കൃത എണ്ണ, പെട്രോളിയം ഉൽപ്പന്നങ്ങൾ, പ്രകൃതിവാതകം എന്നിവയുടെ വ്യാപാരം, ഗതാഗതം, സംഭരണം, വിതരണം തുടങ്ങിയ മേഖലകളിലെ സഹകരണം ശക്തിപ്പെടുത്തും.
ഊർജ വിതരണ ശൃംഖലയുടെ വിശ്വാസ്യതയും വിപണികളുടെ ഏകീകരണവും മെച്ചപ്പെടുത്തുന്നതിനൊപ്പം ഇരു രാജ്യങ്ങളിലെയും ഊർജ സുരക്ഷ ശക്തിപ്പെടുത്താനും കരാർ ലക്ഷ്യമിടുന്നു. പെട്രോകെമിക്കൽ മേഖലയിലെ നിക്ഷേപം, ഇന്ധന സ്റ്റേഷനുകളുടെ പ്രവർത്തനം–പരിപാലനം, ദ്രവീകൃത പെട്രോളിയം വാതക (LPG) മേഖലയിൽ സൗദിയുടെ അനുഭവങ്ങൾ പങ്കുവെക്കൽ എന്നിവയും സഹകരണത്തിന്റെ ഭാഗമാണ്.
About the Author
