റിയാദ്: സൗദി അറേബ്യയുടെ അതിർത്തികളിൽ സേവനമനുഷ്ഠിക്കുന്ന സൈനികർക്കും (മുറാബിത്വൂൻ) അറബ് സഖ്യസേനാംഗങ്ങൾക്കും (Arab Coalition) നിർണായക സന്ദേശവുമായി സൗദി അറേബ്യ ഗ്രാന്റ് മുഫ്തിയും ഉയർന്ന പണ്ഡിതസഭാ അധ്യക്ഷനും സയന്റിഫിക് റിസർച്ച് ആൻഡ് ഇഫ്താ ജനറൽ പ്രസിഡന്റുമായ ഡോ. സ്വാലിഹ് ബിൻ ഫൗസാൻ ബിൻ അബ്ദുള്ള അൽ-ഫൗസാൻ. രാജ്യത്തിന്റെ സുരക്ഷയ്ക്കും പുണ്യസങ്കേതങ്ങൾക്കും വേണ്ടി അതിർത്തികളിൽ നിലയുറപ്പിച്ചിരിക്കുന്ന സൈനികരെ അഭിസംബോധന ചെയ്തുകൊണ്ടാണ് അദ്ദേഹം പ്രസ്താവന പുറപ്പെടുവിച്ചത്.
ദൈവത്തെ സ്തുതിച്ചുകൊണ്ടും പ്രവാചകന്റെ മേലുള്ള സ്വലാത്തുകളോടെയും ആരംഭിച്ച സന്ദേശത്തിൽ, സൗദി അറേബ്യ എന്ന അനുഗൃഹീത രാജ്യത്തിന് ഏകദൈവ വിശ്വാസത്തിലധിഷ്ഠിതമായ ഭരണക്രമവും വിശുദ്ധ ഹറമൈനുകളായ മക്കയിലെ മസ്ജിദുൽ ഹറാമിനും മദീനയിലെ മസ്ജിദുന്നബവിക്കും സേവനം ചെയ്യാനുള്ള ഭാഗ്യവും അല്ലാഹു നൽകിയിട്ടുണ്ടെന്ന് അദ്ദേഹം ഓർമ്മിപ്പിച്ചു. ഖുലാഫാഉർ റാഷിദുകളുടെ കാലഘട്ടത്തിന് ശേഷം ചരിത്രത്തിൽ ഇതുവരെ കാണാത്ത വിധത്തിലുള്ള അതിവിശിഷ്ടമായ സേവനങ്ങളും പരിപാലനവുമാണ് ഹറമൈനുകൾക്ക് ഈ രാജ്യം നൽകുന്നത്.
ഈ മഹത്തായ രാജ്യത്തെയും അതിന്റെ അതിർത്തികളെയും സംരക്ഷിക്കുക, ആക്രമണങ്ങളെ ചെറുക്കുക, ഇതിന്റെ മണ്ണിൽ ദ്രോഹം ചെയ്യാൻ തുനിയുന്നവരെ ശിക്ഷിക്കുക എന്നത് ഏറ്റവും വലിയ നിർബന്ധ ബാധ്യതകളിൽ (വാജിബാത്ത്) ഒന്നാണ്.
ലോകമെമ്പാടുമുള്ള മുസ്ലിങ്ങളുടെ പുണ്യസങ്കേതങ്ങളെയും ഇസ്ലാമിന്റെ പ്രധാന തൂണുകളായ ഹജ്ജ്, ഉംറ എന്നിവ നടക്കുന്ന പുണ്യസ്ഥലങ്ങളെയും ഉൾക്കൊള്ളുന്ന മാതൃരാജ്യത്തിന് വേണ്ടി ജീവൻ പോലും സമർപ്പിക്കുന്നത് അല്ലാഹുവിന്റെ പ്രീതി നേടാനുള്ള മഹത്തായ കർമ്മമാണ്.
അതിർത്തി സൈനികർക്കുള്ള സന്ദേശം:
അതിർത്തി കാക്കുന്ന സൈനികർ ക്ഷമയോടും സ്ഥിരതയോടും കൂടിയും ജാഗ്രതയോടെയും നിലകൊള്ളണമെന്ന് അദ്ദേഹം ആഹ്വാനം ചെയ്തു. അല്ലാഹു സൈനികർക്ക് നൽകിയിരിക്കുന്നത് മറ്റാർക്കും ലഭിക്കാത്ത വലിയൊരു പദവിയും പ്രതിഫലവുമാണ്.
“സത്യവിശ്വാസികളേ, നിങ്ങൾ ക്ഷമിക്കുക, ക്ഷമയിൽ മുൻകടക്കുക, അതിർത്തി കാക്കുക, അല്ലാഹുവിനെ സൂക്ഷിക്കുക, എന്നാൽ നിങ്ങൾക്ക് വിജയം വരിക്കാം” എന്ന ഖുർആൻ സൂക്തവും, “അല്ലാഹുവിന്റെ മാർഗ്ഗത്തിൽ ഒരു ദിവസം അതിർത്തി കാക്കുന്നത് ഈ ലോകത്തെക്കാളും അതിലുള്ള സകല വസ്തുക്കളെക്കാളും ഉത്തമമാണ്” എന്ന പ്രവാചക വചനവും അദ്ദേഹം ഉദ്ധരിച്ചു.
ഒരാൾ മരണപ്പെട്ടാൽ അവന്റെ കർമ്മങ്ങളെല്ലാം അവസാനിക്കും, എന്നാൽ അതിർത്തി കാക്കുന്ന സൈനികന്റെ കർമ്മങ്ങളുടെ പ്രതിഫലം അന്ത്യനാൾ വരെ വർദ്ധിച്ചുകൊണ്ടിരിക്കും, ഖബ്റിലെ ചോദ്യം ചെയ്യലിൽ നിന്ന് അവൻ സുരക്ഷിതനായിരിക്കും, അല്ലാഹുവിന്റെ മാർഗ്ഗത്തിൽ കാവൽ നിൽക്കുന്ന കണ്ണുകളെ നരകാഗ്നി സ്പർശിക്കുകയില്ല തുടങ്ങിയ നബിവചനങ്ങളും അദ്ദേഹം പ്രസ്താവനയിൽ ഓർമ്മിപ്പിച്ചു.
അതിർത്തിയിൽ സേവനമനുഷ്ഠിക്കുന്നവർ എപ്പോഴും സജ്ജരായിരിക്കണം. ഭരണാധികാരികളെയും കമാൻഡർമാരെയും പൂർണ്ണമായും അനുസരിക്കുകയും സൈനിക നിർദ്ദേശങ്ങൾ കൃത്യമായി നടപ്പിലാക്കുകയും വേണം. നബിസഖാക്കളുടെ കാൽപാടുകൾ പിന്തുടർന്ന് ഇസ്ലാമിക സങ്കേതങ്ങളെ സംരക്ഷിക്കാനും തൗഹീദിന്റെ കൊടി ഉയർത്താനുമാണ് സൈനികർ പോരാടുന്നത്.
സഖ്യസേനാംഗങ്ങളോടുള്ള ആഹ്വാനം:
അറബ് സഖ്യസേനാംഗങ്ങൾക്ക് അഭിവാദ്യമർപ്പിച്ച ഗ്രാന്റ് മുഫ്തി, അവർ വലിയൊരു കടമയിലാണ് ഏർപ്പെട്ടിരിക്കുന്നതെന്ന് വ്യക്തമാക്കി. സഖ്യസേനാംഗങ്ങൾ അല്ലാഹുവിന്റെ കയറിൽ മുറുകെപ്പിടിക്കുകയും അണിനിരകളിൽ ഐക്യവും പരസ്പര സഹകരണവും ദൃഢമാക്കുകയും വേണം.
നാട്ടിൽ കുഴപ്പങ്ങൾ സൃഷ്ടിക്കുകയും ജനങ്ങളെ ഭിന്നിപ്പിക്കുകയും ഭരണാധികാരികൾക്കെതിരെ തിരിയുകയും മുസ്ലിങ്ങളുടെ പുണ്യസങ്കേതങ്ങൾക്ക് ദ്രോഹം വരുത്താൻ ആഗ്രഹിക്കുകയും ചെയ്യുന്ന ശത്രുക്കൾക്കെതിരെയാണ് നിങ്ങൾ പോരാടുന്നത്. ഹൂതി ഗ്രൂപ്പ് എന്ന് പറയുന്നത് വ്യാജമായ ആശയങ്ങളിലും അക്രമത്തിലും അധിഷ്ഠിതമായ, ശത്രുക്കളുടെ ഗൂഢാലോചനയായ ഒരു വഴിപിഴച്ച സംഘമാണ്. പ്രവാചക അനുചരന്മാരെ അധിക്ഷേപിക്കുക, മുസ്ലിങ്ങളുടെ രക്തം ചിന്തുക, മസ്ജിദുകൾ തകർക്കുക തുടങ്ങിയ പ്രവർത്തനങ്ങളാണ് അവർ ചെയ്യുന്നത്. ഈ വ്യതിചലിച്ച ഗ്രൂപ്പിനെതിരെ അണിനിരകൾ ഒന്നിച്ചു നിൽക്കണം.
ഭരണഘടനാനുസൃതമായ യെമൻ സർക്കാരിന് കീഴിൽ യെമനിൽ സുരക്ഷയും സുസ്ഥിരതയും പുനഃസ്ഥാപിക്കേണ്ടത് ഏറ്റവും പ്രധാനപ്പെട്ട ഉത്തരവാദിത്തമാണ്. എങ്കിൽ മാത്രമേ യെമനി സഹോദരങ്ങൾക്ക് സുരക്ഷിതത്വത്തിലും ഐശ്വര്യത്തിലും ജീവിക്കാനും അവരുടെ രാജ്യത്തിന് മറ്റ് ലോകരാഷ്ട്രങ്ങൾക്കൊപ്പം വികസനത്തിലേക്ക് കുതിക്കാനും സാധിക്കുകയുള്ളൂ. അല്ലാഹുവിന്റെ സഹായത്തിലും വിജയത്തിലും പൂർണ്ണമായി ഭരമേൽപ്പിക്കാനും (തവക്കൽ) അദ്ദേഹം സൈന്യത്തെ ഉപദേശിച്ചു.
സൗദി അറേബ്യയെയും യെമനെയും എല്ലാത്തരം തിന്മകളിൽ നിന്നും സംരക്ഷിക്കാനും ഹൂതി ഭീകരതയെയും അവരുടെ സഹായികളെയും പൂർണ്ണമായും ഇല്ലാതാക്കാനും പ്രാർത്ഥിച്ചുകൊണ്ടാണ് അദ്ദേഹം പ്രസ്താവന അവസാനിപ്പിച്ചത്.
About the Author
