ന്യൂയോർക്ക്: മേഖലയിൽ സംഘർഷം നിയന്ത്രിക്കുന്നതിനും അത് കൂടുതൽ രാജ്യങ്ങളിലേക്ക് വ്യാപിക്കുന്നത് തടയുന്നതിനുമുള്ള ശ്രമങ്ങൾ ചർച്ച ചെയ്യാൻ അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നേതൃത്വത്തിൽ ന്യൂയോർക്കിൽ ബഹുരാഷ്ട്ര യോഗം ചേർന്നു.
യുഎൻ ജനറൽ അസംബ്ലിയുടെ 81-ാം സമ്മേളനത്തിന്റെ ഉന്നതതല വാരത്തിന്റെ ഭാഗമായി ചൊവ്വാഴ്ച നടന്ന യോഗത്തിൽ ഗൾഫ് സഹകരണ കൗൺസിൽ (GCC) രാജ്യങ്ങളുടെ പ്രതിനിധികൾ പങ്കെടുത്തു. സൗദി വിദേശകാര്യ മന്ത്രി പ്രിൻസ് ഫൈസൽ ബിൻ ഫർഹാനും യോഗത്തിൽ പങ്കെടുത്തു.
ഈജിപ്ത്, ഇറാഖ്, ജോർദാൻ, ലെബനൻ, സിറിയ, തുർക്കി എന്നീ രാജ്യങ്ങളുടെ പ്രതിനിധികളും യോഗത്തിൽ പങ്കെടുത്തു.
മിഡിൽ ഈസ്റ്റിലെ ഏറ്റവും പുതിയ സംഭവവികാസങ്ങളും മേഖലയിൽ വർധിച്ചുവരുന്ന സംഘർഷവും അതിന്റെ സുരക്ഷയിലും സ്ഥിരതയിലുമുള്ള പ്രത്യാഘാതങ്ങളും യോഗം ചർച്ച ചെയ്തു. നിലവിലെ പ്രതിസന്ധികൾക്ക് രാഷ്ട്രീയ-നയതന്ത്ര മാർഗങ്ങളിലൂടെ പരിഹാരം കണ്ടെത്തുന്നതിനുള്ള ശ്രമങ്ങൾ ശക്തിപ്പെടുത്തുന്നതിനെക്കുറിച്ചും ചർച്ച നടന്നു.
ഹോർമുസ് കടലിടുക്കിലെയും ബാബ് അൽ-മന്ദബ് കടലിടുക്കിലെയും കപ്പൽഗതാഗതത്തിന്റെ സുരക്ഷയും സ്വാതന്ത്ര്യവും നേരിടുന്ന വെല്ലുവിളികളും യോഗത്തിൽ പ്രധാന വിഷയമായി.
അമേരിക്കയിലെ സൗദി അംബാസഡർ പ്രിൻസസ് റീമ ബിൻത് ബന്ദർ, പോളിസി പ്ലാനിങ് ജനറൽ അഡ്മിനിസ്ട്രേഷൻ ഡയറക്ടർ ജനറൽ പ്രിൻസ് ഡോ. അബ്ദുല്ല ബിൻ ഖാലിദ് ബിൻ സൗദ്, വിദേശകാര്യ മന്ത്രിയുടെ ചർച്ചകൾക്കും സമാധാന ശ്രമങ്ങൾക്കുമുള്ള ഉപദേഷ്ടാവും പ്രത്യേക ദൂതയുമായ ഡോ. മനാൽ റദ്വാൻ എന്നിവരും യോഗത്തിൽ പങ്കെടുത്തു.
About the Author
