ന്യൂയോർക്ക്: സൗദി അറേബ്യക്കെതിരെ ഹൂതി സായുധസംഘം തുടരുന്ന ആക്രമണങ്ങളെ ഐക്യരാഷ്ട്രസഭയുടെ സുരക്ഷാസമിതി അംഗങ്ങൾ അപലപിച്ചു. സാധാരണക്കാർക്കും ഊർജ അടിസ്ഥാനസൗകര്യങ്ങൾക്കും നാശനഷ്ടമുണ്ടാക്കിയ ആക്രമണങ്ങളും ഇതിൽ ഉൾപ്പെടുന്നു.
സംയുക്ത പ്രസ്താവനയിൽ, സാധാരണക്കാരെയും സിവിലിയൻ കേന്ദ്രങ്ങളെയും ലക്ഷ്യമിട്ടുള്ള ആക്രമണങ്ങളെ നേരിടുന്നതിൽ സൗദി അറേബ്യയ്ക്കുള്ള ഐക്യദാർഢ്യം സുരക്ഷാസമിതി അംഗങ്ങൾ അറിയിച്ചു. അന്താരാഷ്ട്ര നിയമത്തിന് അനുസൃതമായി സ്വയം പ്രതിരോധിക്കാനുള്ള സൗദിയുടെ സ്വാഭാവിക അവകാശവും അവർ അംഗീകരിച്ചു.
സൗദിയെ ലക്ഷ്യമിട്ടുള്ള മിസൈൽ ആക്രമണങ്ങൾക്കൊപ്പം ചെങ്കടലിലും ബാബ് അൽ മന്ദബ് കടലിടുക്കിലും വാണിജ്യ കപ്പലുകൾക്കെതിരായ ആക്രമണങ്ങളും ഭീഷണികളും സുരക്ഷാസമിതി അപലപിച്ചു. ഐക്യരാഷ്ട്രസഭയുടെ കടൽ നിയമ കൺവെൻഷൻ പ്രകാരമുള്ള അന്താരാഷ്ട്ര നാവിഗേഷൻ സ്വാതന്ത്ര്യം സംരക്ഷിക്കുന്നതിനൊപ്പം വാണിജ്യ കപ്പലുകളുടെയും ജീവനക്കാരുടെയും സുരക്ഷ ഉറപ്പാക്കേണ്ടത് നിർണായകമാണെന്നും അംഗങ്ങൾ വ്യക്തമാക്കി.
യമൻ സർക്കാരിനുള്ള പിന്തുണ ആവർത്തിച്ച സുരക്ഷാസമിതി, യമന്റെ ഐക്യം, പരമാധികാരം, സ്വാതന്ത്ര്യം, ഭൗമിക അഖണ്ഡത എന്നിവ സംരക്ഷിക്കാനുള്ള പ്രതിബദ്ധതയും വ്യക്തമാക്കി.
അംഗീകരിച്ച അടിസ്ഥാനരേഖകളും സുരക്ഷാസമിതിയുടെ പ്രസക്തമായ പ്രമേയങ്ങളും അടിസ്ഥാനമാക്കി സമഗ്രമായ രാഷ്ട്രീയ ഒത്തുതീർപ്പിന് മധ്യസ്ഥത വഹിക്കുന്ന യുഎൻ പ്രത്യേക ദൂതൻ ഹാൻസ് ഗ്രുൻഡ്ബർഗിന്റെ ശ്രമങ്ങൾക്ക് പിന്തുണ തുടരുമെന്നും സുരക്ഷാസമിതി അറിയിച്ചു.
About the Author
