മക്ക: മക്ക അൽ മുകർറമ പ്രവിശ്യയിലും അതിനോട് ചേർന്നുള്ള വിശുദ്ധ മക്ക നഗരം, അൽ ജുമൂം, റഹാത്, മുദ്രിക എന്നിവിടങ്ങളിലും ശക്തമായ മഴ പെയ്യുന്ന പശ്ചാത്തലത്തിൽ സൗദി ദേശീയ കാലാവസ്ഥാ കേന്ദ്രം (NCM) തിങ്കളാഴ്ച (2026 സെപ്റ്റംബർ 14) അലർട്ട് ലെവൽ ‘റെഡ്’ ആയി ഉയർത്തി. മണിക്കൂറിൽ അതിവേഗത്തിൽ വീശിയടിക്കുന്ന കാറ്റ്, കാഴ്ചപരിധി പൂർണ്ണമായും തടസ്സപ്പെടൽ, മലവെള്ളപ്പാച്ചിൽ, ആലിപ്പഴ വീഴ്ച, ശക്തമായ ഇടിമിന്നൽ എന്നിവയ്ക്ക് സാധ്യതയുണ്ടെന്ന് കേന്ദ്രം അറിയിച്ചു. ഈ മുന്നറിയിപ്പ് തിങ്കളാഴ്ച രാത്രി 8:00 മണി വരെ തുടരുമെന്ന് അധികൃതർ വ്യക്തമാക്കി.
നജ്റാൻ, ജിസാൻ, അസീർ, അൽ ബാഹ, മക്ക, മദീന എന്നീ മേഖലകളിൽ കനത്ത കാറ്റോടും പൊടിപടലങ്ങളോടും കൂടി മിതമായതോ ശക്തമായതോ ആയ ഇടിമിന്നലോടു കൂടിയ മഴ പെയ്യാനും വെളളപ്പൊക്കത്തിനും സാധ്യതയുണ്ട്. കിഴക്കൻ പ്രവിശ്യയുടെ വടക്കൻ ഭാഗങ്ങൾ, തബൂക്ക്, റിയാദ് എന്നിവിടങ്ങളിൽ ശക്തമായ പൊടിക്കാറ്റിന് സാധ്യതയുണ്ടെന്നും ചെങ്കടലിന്റെയും പേർഷ്യൻ ഗൾഫിന്റെയും തീരപ്രദേശങ്ങളിൽ രാത്രിയിലും പുലർച്ചെയും മൂടൽമഞ്ഞ് രൂപപ്പെടാൻ സാധ്യതയുണ്ടെന്നും റീജിയണൽ റിപ്പോർട്ടിൽ പറയുന്നു.
കിഴക്കൻ പ്രവിശ്യയിലെ ദമാം, ദഹ്റാൻ, ജുബൈൽ, റാസ് തനൂറ, ഖത്തീഫ്, ഖോബാർ, ബഖീഖ്, അൽ അദീദ് എന്നിവിടങ്ങളിൽ കനത്ത മൂടൽമഞ്ഞിനെ തുടർന്ന് കാഴ്ചപരിധി 1 മുതൽ 3 കിലോമീറ്റർ വരെയായി കുറയാൻ സാധ്യതയുള്ളതിനാൽ ഓറഞ്ച്/റെഡ് മുന്നറിയിപ്പ് നൽകിയിട്ടുണ്ട്. കൂടാതെ ഹഫർ അൽ ബാത്തിൻ പ്രവിശ്യയിൽ മണിക്കൂറിൽ 40 മുതൽ 49 കിലോമീറ്റർ വരെ വേഗതയിൽ ശക്തമായ പൊടിക്കാറ്റ് വീശാൻ സാധ്യതയുണ്ടെന്നും ഇത് വൈകുന്നേരം 7:00 മണി വരെ തുടരുമെന്നും കാലാവസ്ഥാ കേന്ദ്രം അറിയിച്ചു. വരും മണിക്കൂറുകളിൽ ജാഗ്രത പാലിക്കാനും സുരക്ഷാ നിർദ്ദേശങ്ങൾ കർശനമായി പിന്തുടരാനും അധികൃതർ പൊതുജനങ്ങളോട് അഭ്യർത്ഥിച്ചു.
About the Author
