മോസ്കോ: ഹൂതികളുടെ ആക്രമണത്തിൽ നിന്ന് രാജ്യത്തെ സംരക്ഷിക്കുന്നതിനും സൗദിയുടെ താൽപര്യങ്ങൾ കാത്തുസൂക്ഷിക്കുന്നതിനും ലഭ്യമായ എല്ലാ മാർഗങ്ങളും ഉപയോഗിക്കുമെന്ന് സൗദി വിദേശകാര്യ മന്ത്രി പ്രിൻസ് ഫൈസൽ ബിൻ ഫർഹാൻ വ്യക്തമാക്കി. മോസ്കോയിൽ റഷ്യൻ വിദേശകാര്യ മന്ത്രി സെർഗെയ് ലാവ്റോവുമായി കൂടിക്കാഴ്ച നടത്തിയ ശേഷം നടത്തിയ സംയുക്ത വാർത്താസമ്മേളനത്തിലാണ് അദ്ദേഹം ഇക്കാര്യം പറഞ്ഞത്.
ഹൂതികൾ ‘പാൻഡോറയുടെ പെട്ടി തുറന്നിരിക്കുകയാണ്’ എന്ന് ഫൈസൽ ബിൻ ഫർഹാൻ പറഞ്ഞു. അതേസമയം, നയതന്ത്രത്തിനുള്ള വഴി ഇപ്പോഴും തുറന്നുകിടക്കുകയാണെന്നും യമന്റെയും മേഖലയുടെയും താൽപര്യങ്ങൾ സംരക്ഷിക്കുന്ന ഏത് നടപടിയെയും സൗദി പിന്തുണയ്ക്കുമെന്നും അദ്ദേഹം വ്യക്തമാക്കി.
പ്രതിസന്ധിയിലാകുമ്പോഴെല്ലാം ഹൂതികൾ അക്രമത്തിന്റെ വഴി സ്വീകരിക്കുകയാണെന്ന് സൗദി വിദേശകാര്യ മന്ത്രി ആരോപിച്ചു. യമന്റെ താൽപര്യങ്ങളേക്കാൾ സ്വന്തം സങ്കുചിത താൽപര്യങ്ങൾക്കാണ് അവർ മുൻഗണന നൽകുന്നതെന്നും അദ്ദേഹം പറഞ്ഞു.
ഉത്തരവാദിത്തപരമായ ചർച്ചകൾക്ക് അവസരം ഒരുക്കാൻ നിയമാനുസൃത യമൻ സർക്കാർ തയ്യാറായിട്ടും യമൻ ജനതയ്ക്ക് ദുരിതം സൃഷ്ടിക്കുന്ന നിലപാടിലാണ് ഹൂതികൾ തുടരുന്നതെന്നും ഫൈസൽ ബിൻ ഫർഹാൻ ചൂണ്ടിക്കാട്ടി.
അതേസമയം, സൗദിയിലെ സിവിലിയൻ കേന്ദ്രങ്ങൾക്കെതിരായ ഹൂതി ആക്രമണങ്ങൾ സാധാരണക്കാരുടെ ജീവന് ഭീഷണിയാകുന്നതിന് പുറമെ ആഗോള സമ്പദ്വ്യവസ്ഥയെയും പ്രതികൂലമായി ബാധിക്കുന്നതായി റഷ്യൻ വിദേശകാര്യ മന്ത്രി സെർഗെയ് ലാവ്റോവ് പറഞ്ഞു. ഇത്തരം ആക്രമണങ്ങൾ ഹൂതികൾക്ക് തിരിച്ചടിയാകുമെന്നും അദ്ദേഹം വ്യക്തമാക്കി.
ഇറാനും അമേരിക്കയും തമ്മിലുള്ള ഇസ്ലാമാബാദ് ധാരണാപത്രം നടപ്പാക്കണമെന്ന് മോസ്കോയും റിയാദും ആവശ്യപ്പെടുന്നതായും ലാവ്റോവ് പറഞ്ഞു. യമനിൽ സമാധാനപരമായ പരിഹാരം കണ്ടെത്താനുള്ള സൗദിയുടെ ശ്രമങ്ങൾക്ക് റഷ്യയുടെ പിന്തുണയുണ്ടാകുമെന്നും അദ്ദേഹം വ്യക്തമാക്കി.
പ്രാദേശികവും അന്തർദേശീയവുമായ വിവിധ വിഷയങ്ങളും സംഘർഷങ്ങൾ കുറയ്ക്കുന്നതിനുള്ള മാർഗങ്ങളും പ്രതിസന്ധികൾക്ക് പരിഹാരം കാണാനുള്ള ശ്രമങ്ങളും വാർത്താസമ്മേളനത്തിൽ ഇരുവരും ചർച്ച ചെയ്തു.
മേഖലയിലെയും അന്തർദേശീയ തലത്തിലെയും സംഭവവികാസങ്ങളിൽ റഷ്യയുമായുള്ള നിരന്തര കൂടിയാലോചനയും ഏകോപനവും പ്രധാനമാണെന്ന് ഫൈസൽ ബിൻ ഫർഹാൻ പറഞ്ഞു. സംഘർഷങ്ങൾ കുറയ്ക്കുന്നതിനും പ്രതിസന്ധികൾക്ക് പരിഹാരം കാണുന്നതിനുമുള്ള ശ്രമങ്ങൾക്ക് പിന്തുണ നൽകുന്നതിന് കൂടുതൽ സംഭാഷണം അനിവാര്യമാണെന്നും അദ്ദേഹം വ്യക്തമാക്കി.
ഇതിന് മുമ്പ് നടന്ന ഔദ്യോഗിക കൂടിക്കാഴ്ചയിൽ സൗദി-റഷ്യ ഉഭയകക്ഷി ബന്ധവും വിവിധ മേഖലകളിലെ സഹകരണം കൂടുതൽ ശക്തിപ്പെടുത്തുന്നതിനുള്ള മാർഗങ്ങളും ചർച്ചയായി. ഊർജ വിപണികളുടെ സ്ഥിരത ഉറപ്പാക്കുന്നതിൽ സൗദി-റഷ്യ സഹകരണത്തിന് നിർണായക പങ്കുണ്ടെന്ന് ഫൈസൽ ബിൻ ഫർഹാൻ പറഞ്ഞു.
അതേസമയം, മിഡിൽ ഈസ്റ്റിലെ പ്രശ്നങ്ങൾക്ക് പരിഹാരം കാണാനുള്ള ശ്രമങ്ങളിൽ റഷ്യയ്ക്ക് താൽപര്യമുണ്ടെന്ന് ലാവ്റോവ് വ്യക്തമാക്കി. OPEC+ സഖ്യത്തിനുള്ളിലെ സൗദി-റഷ്യ സഹകരണം എണ്ണ വിപണിയിലെ ആവശ്യവും വിതരണവും തമ്മിൽ സന്തുലിതാവസ്ഥ കൈവരിക്കാൻ സഹായിക്കുന്നുണ്ടെന്നും അദ്ദേഹം പറഞ്ഞു.
ഇരു രാജ്യങ്ങളും തങ്ങളുടെ പങ്കാളിത്തം കൂടുതൽ ശക്തിപ്പെടുത്തുന്നതിനും സഹകരണ മേഖലകൾ വിപുലീകരിക്കുന്നതിനും താൽപര്യപ്പെടുന്നതായും ലാവ്റോവ് വ്യക്തമാക്കി.
About the Author
