ജസാൻ / അസീർ: സൗദി അറേബ്യയിലെ അസീർ, ജസാൻ മേഖലകളിൽ അതിർത്തി സുരക്ഷാ സേനയും സുരക്ഷാ ഉദ്യോഗസ്ഥരും നടത്തിയ വിവിധ പരിശോധനകളിൽ എട്ട് വിദേശികളും ഒരു സൗദി പൗരനും അറസ്റ്റിലായി. ഇവരിൽ നിന്ന് 293 കിലോഗ്രാം ഖാത്ത് (Khat), 16 കിലോഗ്രാം ഹാഷിഷ്, 37,290 ലഹരി ഗുളികകൾ എന്നിവ പിടിച്ചെടുത്തു.
അസീറിലെ അൽ-റബ്വ സെക്ടറിൽ 160 കിലോഗ്രാം ഖാത്ത് കടത്താൻ ശ്രമിച്ച എട്ട് ഇത്യോപ്യൻ പൗരന്മാരെ ബോർഡർ ഗാർഡ് പിടികൂടി. മറ്റൊരു സംഭവത്തിൽ വാഹനത്തിനുള്ളിൽ ഒളിപ്പിച്ച നിലയിൽ 133 കിലോഗ്രാം ഖാത്തുമായി ഒരു സൗദി പൗരനും അസീറിൽ പിടിയിലായി.
ജസാനിലെ അൽ-ആരിദ സെക്ടറിൽ ബോർഡർ ഗാർഡ് നടത്തിയ പരിശോധനയിലാണ് 16 കിലോഗ്രാം ഹാഷിഷും 37,290 മയക്കുമരുന്ന് ഗുളികകളും കടത്താനുള്ള ശ്രമം തടഞ്ഞത്.
പിടിയിലായ പ്രതികളെയും പിടിച്ചെടുത്ത ലഹരിവസ്തുക്കളെയും തുടർനടപടികൾക്കായി ബന്ധപ്പെട്ട വകുപ്പുകൾക്ക് കൈമാറി.
പൊതുജനങ്ങൾക്ക് വിവരങ്ങൾ നൽകാം:
മയക്കുമരുന്ന് കടത്തിനെക്കുറിച്ചോ കച്ചവടത്തെക്കുറിച്ചോ വിവരങ്ങൾ ലഭിക്കുന്നവർ റിയാദ്, മക്ക, മദീന, ഈസ്റ്റേൺ പ്രൊവിൻസ് എന്നിവിടങ്ങളിൽ 911 എന്ന നമ്പറിലും, മറ്റ് മേഖലകളിൽ 999 എന്ന നമ്പറിലും അറിയിക്കണം. കൂടാതെ ബോർഡർ ഗാർഡിനെ 994 എന്ന നമ്പറിലും ലഹരിവിരുദ്ധ വിഭാഗത്തെ 995 അല്ലെങ്കിൽ 995@gdnc.gov.sa എന്ന ഇമെയിൽ വഴിയും ബന്ധപ്പെടാം. വിവരങ്ങൾ നൽകുന്നവരുടെ വിവരങ്ങൾ പൂർണ്ണമായും രഹസ്യമായി സൂക്ഷിക്കുമെന്ന് അധികൃതർ ഉറപ്പുനൽകി.
About the Author
