മക്ക: മക്കയിലെ ഹിറ കൾച്ചറൽ ഡിസ്ട്രിക്റ്റിലുള്ള ഹോളി ഖുർആൻ മ്യൂസിയം (Holy Qur’an Museum), ലോകമെമ്പാടുമുള്ള സന്ദർശകരെ ആകർഷിച്ച് അപൂർവ ഖുർആൻ കയ്യെഴുത്തുപ്രതികളും പുരാവസ്തുക്കളും പ്രദർശിപ്പിക്കുന്നു.
റഷ്യയിലെ പ്രശസ്തമായ ഇസ്ലാമിക ചരിത്ര നഗരമായ കസാനിൽ (Kazan) 1906-ൽ അച്ചടിച്ച, വിശുദ്ധ ഖുർആന്റെ ഏറ്റവും പഴയ അച്ചടി പതിപ്പുകളിലൊന്ന് ഈ പ്രദർശനത്തിലെ പ്രധാന ആകർഷണമാണ്. പണ്ഡിതന്മാരുടെ വ്യാഖ്യാനങ്ങളും മാർജിൻ കുറിപ്പുകളും അടങ്ങിയതാണ് ഈ പതിപ്പ്. ഖുർആൻ വചനങ്ങളെ വ്യാഖ്യാനിക്കാനും വിശദീകരിക്കാനും തലമുറകളായി നടന്ന ശ്രമങ്ങളെ ഇത് പ്രതിഫലിപ്പിക്കുന്നു. ഇസ്ലാമിക ലോകത്ത് ആദ്യമായി മുസ്ലിങ്ങൾ സ്വന്തമായി ഖുർആൻ അച്ചടിശാല സ്ഥാപിച്ച നഗരമെന്ന നിലയിൽ കസാൻ ചരിത്രത്തിൽ ഏറെ പ്രശസ്തമാണ്.
വിശുദ്ധ ഖുർആന്റെ എഴുത്തിലും അച്ചടിയിലുമുള്ള പ്രധാന നാഴികക്കല്ലുകൾ അടയാളപ്പെടുത്തുന്ന അപൂർവ പുരാവസ്തുക്കളും കയ്യെഴുത്തുപ്രതികളും ഖുർആൻ പതിപ്പുകളും ആധുനിക ഇന്ററാക്ടീവ് ഡിസ്പ്ലേ സാങ്കേതികവിദ്യകളുടെ സഹായത്തോടെയാണ് മ്യൂസിയത്തിൽ ഒരുക്കിയിരിക്കുന്നത്.
വിശുദ്ധ ഖുർആന്റെ അവതരണം, സമാഹരണം, വിവിധ കാലഘട്ടങ്ങളിലെ അതിന്റെ സംരക്ഷണവും അച്ചടിയും വരെയുള്ള ചരിത്രം സന്ദർശകർക്ക് ഇവിടെ അടുത്തറിയാം.
സന്ദർശകർക്ക് വിജ്ഞാനപ്രദവും സമ്പന്നവുമായ അനുഭവങ്ങൾ സമ്മാനിക്കുന്ന മക്കയിലെ മുൻനിര സാംസ്കാരിക കേന്ദ്രങ്ങളിലൊന്നാണ് ഹിറ കൾച്ചറൽ ഡിസ്ട്രിക്റ്റ്.
മക്കയിലെ ഖുർആൻ മ്യൂസിയത്തിൽ 1906-ലെ അപൂർവ ‘കസാൻ ഖുർആൻ’ പ്രദർശനത്തിന്!
Leave a Reply