റിയാദ്: സൗദി അറേബ്യയിൽ സ്വകാര്യ മേഖലയിലെ തൊഴിലാളികൾക്ക് നേരിട്ടുള്ള സൂര്യപ്രകാശത്തിൽ ജോലി ചെയ്യുന്നതിന് ഏർപ്പെടുത്തിയ ഉച്ചസമയത്തെ നിരോധനം ജൂൺ 15 മുതൽ സെപ്റ്റംബർ 15 വരെ പ്രാബല്യത്തിൽ വരുമെന്ന് മാനവശേഷി, സാമൂഹിക വികസന മന്ത്രാലയം (MHRSD) അറിയിച്ചു.
തൊഴിലാളികളുടെ ആരോഗ്യവും സുരക്ഷയും ഉറപ്പാക്കുന്നതിനും, കഠിനമായ ചൂടിൽ ജോലി ചെയ്യുന്നതുമൂലമുള്ള ആരോഗ്യപ്രശ്നങ്ങൾ കുറയ്ക്കുന്നതിനുമായാണ് ഉച്ചയ്ക്ക് 12:00 മുതൽ വൈകുന്നേരം 3:00 മണി വരെ നേരിട്ടുള്ള സൂര്യപ്രകാശത്തിൽ ജോലി ചെയ്യുന്നത് നിരോധിച്ചിരിക്കുന്നത്. നാഷണൽ കൗൺസിൽ ഫോർ ഒക്യുപേഷണൽ സേഫ്റ്റി ആൻഡ് ഹെൽത്തുമായി സഹകരിച്ചാണ് മന്ത്രാലയം ഈ നിയമം നടപ്പിലാക്കുന്നത്.
കഴിഞ്ഞ വർഷങ്ങളിൽ ഈ നിരോധനം മികച്ച ഫലം നൽകിയിരുന്നു. 2025-ൽ 94 ശതമാനം സ്ഥാപനങ്ങളും നിയമം പാലിച്ചതായാണ് കണക്കുകൾ വ്യക്തമാക്കുന്നത്.
തൊഴിലുടമകൾ ഈ നിയമത്തിനനുസൃതമായി ജോലി സമയം ക്രമീകരിക്കണമെന്നും, ജോലിസ്ഥലങ്ങളിൽ മതിയായ കുടിവെള്ളം, തണൽ സൗകര്യങ്ങൾ, ആവശ്യമായ സുരക്ഷാ ഉപകരണങ്ങൾ എന്നിവ ഉറപ്പാക്കണമെന്നും മന്ത്രാലയം നിർദ്ദേശിച്ചു. ചൂടുകാലത്ത് ജോലി ചെയ്യുമ്പോൾ ഉണ്ടാകാവുന്ന ആരോഗ്യപ്രശ്നങ്ങളെക്കുറിച്ച് തൊഴിലാളികളെ ബോധവൽക്കരിക്കാനും, അവരുടെ ശാരീരിക അവസ്ഥകൾ കൃത്യമായി നിരീക്ഷിക്കാനും തൊഴിലുടമകളോട് മന്ത്രാലയം ആവശ്യപ്പെട്ടു.
നിയമം ലംഘിക്കുന്നവരെക്കുറിച്ച് പൊതുജനങ്ങൾക്ക് മന്ത്രാലയത്തിന്റെ 19911 എന്ന നമ്പറിലോ, സ്മാർട്ട്ഫോൺ ആപ്ലിക്കേഷൻ വഴിയോ പരാതിപ്പെടാവുന്നതാണ്.
Leave a Reply