റിയാദ് മെട്രോയിലെ അഞ്ച് സ്റ്റേഷനുകൾക്ക് നാമാവകാശ ടെൻഡർ പ്രഖ്യാപിച്ചു

റിയാദ്: റിയാദ് നഗരത്തിനായുള്ള റോയൽ കമ്മീഷൻ, റിയാദ് മെട്രോയിലെ അഞ്ച് പ്രധാന സ്റ്റേഷനുകളുടെ നാമാവകാശം നൽകുന്നതിനായുള്ള ടെൻഡർ പ്രഖ്യാപിച്ചു. ആദ്യ ഘട്ടത്തിൽ 10 വർഷത്തേക്കുള്ള കരാറുകളാണ് ലഭ്യമാകുക. അൽ-മുരൂജ്, അൽ-നുസ്ഹ, കിംഗ് ഫഹ്ദ് ഡിസ്ട്രിക്ട് 1, അൽ-റാബി, ജരീർ ഡിസ്ട്രിക്ട് എന്നീ സ്റ്റേഷനുകളാണ് ഇതിൽ ഉൾപ്പെടുന്നത്.
സൗദി പ്രസ് ഏജൻസിയുടെ റിപ്പോർട്ട് പ്രകാരം, ആഗോള പൊതു ഗതാഗത മാനദണ്ഡങ്ങൾക്ക് അനുസൃതമായ ചട്ടങ്ങൾ പ്രകാരം ദേശീയവും അന്തർദേശീയവുമായ സ്വകാര്യ മേഖലയിലെ നിക്ഷേപകരെ കമ്മീഷൻ ക്ഷണിച്ചിട്ടുണ്ട്.
‘ഫുറാസ്’ പ്ലാറ്റ്ഫോം വഴി മേയ് 10 വരെ ടെൻഡർ സമർപ്പിക്കാം. തുടർന്ന് അപേക്ഷകൾ വിലയിരുത്തി കരാറുകൾ അനുവദിക്കും.
ഈ നാമാവകാശ പദ്ധതി വഴി, ബാങ്കുകൾ, ധനകാര്യ സ്ഥാപനങ്ങൾ, പ്രമുഖ ബ്രാൻഡുകൾ എന്നിവയ്ക്ക് റിയാദ് മെട്രോ പോലുള്ള വൻ ഗതാഗത പദ്ധതിയിൽ തങ്ങളുടെ ബ്രാൻഡ് കൂടുതൽ ശ്രദ്ധേയമാക്കാനുള്ള അവസരം ലഭിക്കും.
അതോടൊപ്പം, സൈൻബോർഡുകൾ, ലിഫ്റ്റുകൾ, എസ്കലേറ്ററുകൾ, ടിക്കറ്റ് ഗേറ്റുകൾ എന്നിവിടങ്ങളിലായി പരസ്യങ്ങൾ പ്രദർശിപ്പിക്കാനുള്ള സൗകര്യവും ഈ പദ്ധതിയുടെ ഭാഗമായുണ്ടാകും.