ദോഹ: ഫിഫ ലോകകപ്പ് 2022 പടിവാതില്ക്കല് എത്തിനില്ക്കെ ഫുട്ബോള് ആരാധകര്ക്ക് ഖത്തറിലേക്ക് വരുന്നതിനുള്ള എന്ട്രി പെര്മിറ്റ് വിതരണം ഉടന് ആരംഭിക്കുമെന്ന് അധികൃതര്. ഫിഫ ഫാന് ഐഡിയായ ഹയ്യാ കാര്ഡ് ഉള്ളവര്ക്ക് ഇ-മെയില് വഴിയാണ് എന്ട്രി പെര്മിറ്റ് ലഭിക്കുക.
വാർത്തകൾ നേരിട്ട് വാട്ട്സാപ്പിൽ ഉടൻ ലഭിക്കാൻ ഇവിടെ ക്ലിക്ക് ചെയ്യുക
ലോകകപ്പ് പ്രാദേശിക സംഘാടകരായ സുപ്രിം കമ്മിറ്റി ഫോര് ഡെലിവറി ആന്റ് ലെഗസിയിലെ ഹയ്യാ പ്ലാറ്റ് ഫോം എക്സിക്യൂട്ടീവ് ഡയറക്ടര് സഈദ് അല് കുവാരിയാണ് ഇക്കാര്യം അറിയിച്ചത്. പിഡിഎഫ് ഫോര്മാറ്റിലായിരിക്കും എന്ട്രി പെര്മിറ്റ് ആരാധകര്ക്ക് ഇ മെയില് വഴി ലഭിക്കുക. ഈ എന്ട്രി പെര്മിറ്റുകള് ഉപയോഗിച്ച് നവംബര് തുടക്കത്തില് തന്നെ ഫുട്ബോള് ആരാധകര്ക്ക് ഖത്തറിലേക്ക് പ്രവേശനം അനുവദിച്ചു തുടങ്ങുമെന്നും അദ്ദേഹം അറിയിച്ചു.
ലോകകപ്പ് നടക്കുന്ന വേളയില് മത്സരങ്ങള് കാണാന് ടിക്കറ്റ് ലഭിച്ച ആരാധകര്ക്ക് ഖത്തറിലേക്ക് വരാനുള്ള ഏക മാര്ഗമാണ് ഹയ്യാ കാര്ഡ്. ടിക്കറ്റ് ഉണ്ടെങ്കിലും ഹയ്യാ കാര്ഡ് ഇല്ലാത്തവര്ക്ക് ഖത്തറിലേക്ക് വരാനാവില്ല. ഹയ്യാ കാര്ഡിന്റെ ഔദ്യോഗിക വെബ്സൈറ്റ് വഴിയാണ് ഇതിനായി അപേക്ഷ നല്കേണ്ടത്. ടിക്കറ്റ് വിവരങ്ങള്ക്കും വ്യക്തിഗത വിവരങ്ങള്ക്കും ഒപ്പം ഖത്തറില് എവിടെ താമസിക്കുന്നു എന്നതിന്റെ വിശദാംശങ്ങളും നല്കിയാല് ഹയ്യാ കാര്ഡ് ലഭിക്കും. ഇങ്ങനെ ഹയ്യാകാര്ഡ് ലഭിച്ചവര്ക്ക് ഖത്തറിലേക്ക് വരാന് എന്ട്രി പെര്മിറ്റ് കൂടി ലഭിക്കേണ്ടതുണ്ട്. അത് ഇ മെയില് വഴി ഉടന് തന്നെ അയച്ചു തുടങ്ങുമെന്ന് അധികൃതര് വ്യക്തമാക്കി.
ഹയ്യാ കാര്ഡ് സേവനങ്ങള് നല്കുന്നതിനായി രണ്ട് സര്വീസ് സെന്ററുകള് ഖത്തറില് പ്രവര്ത്തിക്കുന്നതായും അദ്ദേഹം അറിയിച്ചു. ദോഹ എക്സിബിഷന് ആന്റ് കണ്വെന്ഷന് സെന്ററിലും (ഡിഇസിസി) അബ്ഹ അറീനയിലെ അലി ബിന് ഹമദ് അല് അതിയ്യ അറീനയിലും പ്രവര്ത്തിക്കുന്ന ഈ കേന്ദ്രങ്ങളിലെത്തി ഖത്തറിലുള്ളവര്ക്ക് ഹയ്യാ കാര്ഡുകള് സ്വന്തമാക്കാം. ഡിഇസിസിയില് മാത്രം 80 കൗണ്ടറുകള് കാര്ഡ് വിതരണത്തിനായി സജ്ജീകരിച്ചിട്ടുണ്ടെന്നും അദ്ദേഹം പറഞ്ഞു. ഹയ്യാ കാര്ഡുമായി ബന്ധപ്പെട്ട് എന്ത് സേവനങ്ങളും ഇവിടെ ലഭിക്കും. ഡിജിറ്റല് ഹയ്യാ കാര്ഡുകള് സ്റ്റേഡിയത്തിലേക്കുള്ള പ്രവേശനത്തിന് അടക്കം സ്വീകരിക്കുമെന്ന് അധികൃതര് നേരത്തെ തന്നെ വ്യക്തമാക്കിയിരുന്നു.
Leave a Reply